સંકટના એંધાણ! / 5 બિલ્ડિંગોમાં તિરાડ, 250 પરિવારોનું સ્થળાંતર: ઉત્તરાખંડ બાદ હવે મહારાષ્ટ્રના આ વિસ્તારના 'જોશીમઠ' જેવાં હાલ!

• મહારાષ્ટ્રમાં પણ જોશીમઠ જેવી સ્થિતિ જોવા મળી 
• થાણે જિલ્લામાં 250 પરિવારો થયા બેઘર 
• બિલ્ડીંગના થાંભલાઓમાં તિરાડો પડી ગઈ

ઉત્તરાખંડના જોશીમઠ જેવી સ્થિતિ મહારાષ્ટ્રના થાણે જિલ્લામાં પણ જોવા મળી રહી છે. થાણેના ડોમ્બિવલીમાં રહેણાંક સંકુલની અંદર આવેલી ઇમારતોમાં તિરાડો જોવા મળી છે અને ડોમ્બિવલીમાં એ પાંચ ઈમારતોને વહીવટીતંત્રે સંપૂર્ણપણે ખાલી કરી દીધી છે. હાલ એવું કહેવામાં આવી રહ્યું છે કે ઈમારતોના સ્લેબ ઢીલા થઈ ગયા છે અને એ કારણે બિલ્ડીંગના થાંભલાઓમાં તિરાડો પડી ગઈ છે. 

250 પરિવારો થયા બેઘર 
જણાવી દઈએ કે શનિવારે મોડી રાત્રે ઈમારતોમાં તિરાડો જોવા મળી હતી અને ત્યારબાદ આ ઈમારતોમાં રહેતા પરિવારોને બહાર કાઢવામાં આવ્યા હતા. રિપોર્ટ અનુસાર આ ઈમારતોમાં લગભગ 250 પરિવારો રહેતા હતા. કેટલાક લોકો બિલ્ડીંગના બાંધકામમાં હલકી ગુણવત્તાવાળા મટિરિયલનો ઉપયોગ કરી રહ્યા હોવાનો આક્ષેપ કરી રહ્યા છે. 

1998માં બનાવવામાં આવી હતી બિલ્ડિંગ 
ઈમારતોમાં તિરાડો નજરે પડતાં જ સંબંધિત અધિકારીઓને જાણ કરવામાં આવી હતી. આ પછી સંબંધિત અધિકારીઓ ઘટનાસ્થળે પહોંચ્યા. અધિકારીઓના જણાવ્યા અનુસાર, ફાયર બ્રિગેડની ટીમ પણ બિલ્ડિંગનું નિરીક્ષણ કરવા અંદર પહોંચી હતી.  અધિકારીઓએ જણાવ્યું કે શનિવારે રાત્રે 11 વાગ્યે સ્લેબ અને થાંભલાઓમાં તિરાડો જોવા મળી હતી. આ પછી ફાયર વિભાગ, પોલીસ અને નાગરિક સંસ્થાના કર્મચારીઓ નિલજે સ્થિત પરિસરમાં પહોંચ્યા અને ઇમારતો ખાલી કરાવી.  ફાયર ઓફિસરે જણાવ્યું કે આ ઇમારતો 1998માં બનાવવામાં આવી હતી. આ ઈમારતો કલ્યાણ ડોમ્બિવલી મ્યુનિસિપલ કોર્પોરેશન હેઠળની ખતરનાક ઈમારતોની યાદીમાં નથી. જો કે હાલ વોર્ડ ઓફિસરો માળખાકીય તપાસ કર્યા બાદ આ ઈમારતો અંગે નિર્ણય લેશે.

Video report | Evacuation of neighbouring buildings, following Cracks in Shanti Upavan F wing building at Lodha Heaven on Shil phata Road in Dombivli. pic.twitter.com/vUpyu6soIV

— MUMBAI NEWS (@Mumbaikhabar9) March 5, 2023

લોકોને સુરક્ષિત ઘરોમાંથી બહાર કાઢવામાં આવ્યા 
જણાવી દઈએ કે અત્યાર સુધી કોઈ જાનહાનિ કે ઈજા થઈ નથી અને લોકોને સુરક્ષિત રીતે બહાર કાઢવામાં આવ્યા છે અને લોકોને સુરક્ષાના કારણોસર પરિસરથી દૂર રહેવા માટે કહેવામાં આવ્યું છે. ઘટના બાદ સ્થાનિક પ્રશાસને લોકોને નજીકની સરકારી શાળા અને મંદિરોમાં આશ્રય લેવા જણાવ્યું છે.  વહીવટી તંત્ર દ્વારા કોઈના માટે રહેવાની વ્યવસ્થા કરવામાં આવી નથી. ઘણા લોકો તેમના સંબંધીના ઘરે ગયા છે. આ ઘટના બાદ હલચલ પણ વધી ગઈ હતી અને લોકોએ આ ઘટનાને જોશીમઠ સાથે જોડવાનું શરૂ કર્યું હતું.