વિધાનસભા ચૂંટણી પહેલા ભાજપે નવી રણનીતિ અમલમાં મૂકી, એક આખો દિવસ એક જિલ્લા માટે ફાળવાશે
ભાજપ દ્વારા રાજ્યમાં એક દિવસ એક જિલ્લો યોજના અમલમાં
હવે એક આખો દિવસ એક જિલ્લા માટે ફાળવાશે-પાટીલ
ભાજપ પ્રદેશ પ્રમુખ, પ્રદેશ મહામંત્રીઓ આખો દિવસ ફાળવશે-પાટીલ
ગુજરાત રાજ્યમાં ભાજપ દ્વારા હવે એક દિવસ, એક જિલ્લો નામની એક નવી જ પહેલ શરૂ કરવામાં આવી છે. આ આયોજન અંતર્ગત ગુજરાત ભાજપના પ્રદેશ પ્રમુખ અને પ્રદેશ મહામંત્રીઓ એક આખો દિવસ એક જિલ્લા માટે ફાળવશે. આ અંગે ગુજરાત ભાજપના પ્રદેશ પ્રમુખ સી. આર. પાટિલે વાપીમાં ભાજપના દિવાળી સ્નેહમિલન કાર્યક્રમમાં જાણકારી આપી હતી.
સ્નેહમિલન બાદ હવે વન ડે, વન ડ્રિસ્ટ્રીક્ટ
જાહેરાત કરતી વેળાએ પાટીલ, રાજ્યના નાણા-ઊર્જા અને પેટ્રોકેમિકલ મંત્રી કનુભાઇ દેસાઇ, રાજ્યના નર્મદા-કલ્પસર અને પાણી પુરવઠા મંત્રી જીતુભાઈ ચૌધરી અને સાંસદ ડો. કે. સી. પટેલ સહિત અગ્રણીઓ અને કાર્યકર્તાઓ ઉપસ્થિત રહ્યાં હતાં. આ સમયે સી. આર. પાટિલે આગળના કાર્યક્રમ વિશે માહિતી આપતા કહ્યું હતું કે હવે ભાજપના પ્રદેશ પ્રમુખ સી. આર. પાટીલ સહિત ભાજપના પ્રદેશ મહામંત્રીઓ એક આખો દિવસ એક જિલ્લાને ફાળવશે. આ દરમિયાન તેઓ ભાજપના પદાધિકારીઓ અને કાર્યકર્તાઓ સહિત સામાજિક સંગઠનોના અગ્રણીઓને પણ મળશે. અને તેમને સાંભળવામાં આવશે.
ભાજપ કાર્યકર્તાની દરેક રજૂઆત ખુદ સંગઠનના નેતાઓ જિલ્લે જઇ સાંભળશે
મહત્વપૂર્ણ છે કે વાપી નગરપાલિકાની ચૂંટણી યોજાઈ રહી છે અને આગામી 2022માં રાજ્યમાં વિધાનસભાની ચૂંટણીઓ આવી રહી છે. ત્યારે અત્યારથી જ ભાજપ દ્વારા રણનીતિપૂર્વક આયોજન કરવામાં આવી રહ્યું છે. કાર્યકર્તાઓની સાથે પાર્ટીના અગ્રણીઓને પણ એક જૂથમાં રાખવા અને તેમના સમસ્યાઓ અને પ્રશ્નોને સાંભળવા માટે આયોજન કરવામાં આવી રહ્યું છે. જેમાં મહામંત્રી અને મોટા નેતાઓ જિલ્લામાં 24 કલાક રોકાણ કરશે. જે તે જિલ્લામાં સામાન્ય લોકો, પાર્ટીના કાર્યકર્તાઓ, સંઘના આગેવાનો, ઉદ્યોગપતિઓ સાથે ચર્ચાઑ કરવામાં આવશે. સાથે જ કાર્યકરની તકલીફો પર વિશેષ ધ્યાન આપી તેણે અલગથી સાંભળવામા આવશે.