સુરતમાં આજે CMના હસ્તે ગ્લોબલ ટેક્સટાઈલ માર્કેટ ખાતે એક્ઝિબિશનનું ઉદ્ઘાટન કરાયું. દરમ્યાન CR પાટીલે મફત પાણી અને રોજગારી મુદ્દે કેજરીવાલને આડે હાથ લીધા હતા.
ગ્લોબલ ટેક્સટાઈલ માર્કેટ ખાતે એક્ઝિબિશનનું CMના હસ્તે ઉદ્ઘાટન
કાર્યક્રમમાં CR પાટીલે આડકતરી રીતે કેજરીવાલ પર કર્યા પ્રહાર
ગુજરાતમાં નોકરીની લાલચ આપવાનું બંધ કરી દો: પાટીલ
આજે સુરતમાં મુખ્યમંત્રી ભૂપેન્દ્ર પટેલે ગ્લોબલ ટેક્સટાઇલ માર્કેટ (Surat Global Textile Market ) ખાતે એક્ઝિબિશનનું ઉદ્ઘાટન કર્યું. જે પ્રસંગે પ્રદેશ અધ્યક્ષ CR પાટીલ અને હર્ષ સંઘવી સહિત દિગ્ગજ નેતાઓ અને ધારાસભ્ય કાર્યક્રમમાં ઉપસ્થિત રહ્યાં હતા. એ દરમ્યાન CR પાટીલે નામ લીધા વિના દિલ્હીના મુખ્યમંત્રી અરવિંદ કેજરીવાલ પર આકરા પ્રહાર કર્યા હતા.
ગુજરાતી એટલે હાથ લાંબો કરે તો આપવા માટે કરે લેવા માટે નહીં: પાટીલ
CR પાટીલે કાર્યક્રમમાં સંબોધન દરમ્યાન આડકતરી રીતે કેજરીવાલ પર પ્રહાર કરતા કહ્યું કે, 'હમણાં-હમણાં એક ભાઈ ગુજરાત આવે છે. આ ભાઇ મફત પાણી આપવાની વાત કરે છે. સુરતમાં દરરોજ 1.10 પૈસામાં પાણી આપે છે. અમે ફ્રી પાણી આપીશું પણ પાવર આવશે કે કેમ એ કહેતા નથી. આ તો ચાઇનીઝ માલ જેવું છે. વિશ્વાસ કરશો તો ફસાઇ જશો. તમે ફ્રીની યોજનામાં ફસાશો નહીં. 10 લાખ રોજગારી આપવાની વાત કરે છે. આખાય દેશમાં ગુજરાત સૌથી વધુ રોજગારી આપે છે. ગુજરાતમાં નોકરીની લાલચ આપવાનું બંધ કરી દો. વચન આપવામાં આપણે ક્યાં દરિદ્રતા આવે છે અને એટલાં જ માટે આજે આ સરકારમાં સાડા પાંચ લાખ સરકારી નોકરી છે. આ ભાઇ યુવાનોને 10 લાખ સરકારી નોકરી આપવાની વાત કરે છે. તેઓને એમ લાગે છે કે જો જુઠ્ઠું જ બોલવું તો થોડું વધારે બોલવું. ગુજરાતી એટલે હાથ લાંબો કરે તો આપવા માટે કરે લેવા માટે નહીં.'
એક રૂપિયો ને દસ પૈસામાં આટલું સસ્તું ટ્રીટેડ પાણી આખાય દેશમાં કોઇ નથી આપતું: પાટીલ
આપણે ત્યાં અહીં દરેક બંગલામાં એક વર્ષમાં 407 રૂપિયામાં પાણી આપવામાં આવે છે. આ 407 ને 365 દિવસ વડે ગુણીએ તો એક રૂપિયોને દસ પૈસા જેવો એક દિવસનો ભાવ થાય. એમાં એક બંગલો હોય તેમાં પતિ-પત્ની અને બે બાળકો હોય, એક નોકર હોય, એક ગાર્ડન હોય, એને ત્યાં એક ડૉગ હોય, એક ગાડી હોય આ બધા માટે આ પાણીનો ઉપયોગ થાય. ત્યારે એક રૂપિયો ને દસ પૈસામાં આટલું સસ્તું ટ્રીટેડ પાણી આખાય દેશમાં કોઇ આપતું નથી. એટલે કોઇ અમને મફત આપવાની લાલચ ના આપે.