નિવેદન / શ્વાન અને ભિક્ષુકોનું કંઈક કરો, ઈમેજ ખરાબ થાય છે: જાહેરમાં પાટીલની મેયરને ટકોર

• વડોદરા બાદ રાજકોટમાં સી.આર.પાટીલની મેયરને ટકોર
• રાજકોટના રોડ પર ઢોર ન હોવા જોઇએ-પાટીલ
• શ્વાન અને ભિક્ષુકો માટે પણ કંઇક કરજો- પાટીલ

ભાજપ પ્રદેશ પ્રમુખ સી આર પાટીલ આજે રાજકોટનાં પ્રવાસે છે, રાજકોટમાં ફૂલોથી ભવ્ય સ્વાગતની સાથે સાથે પાટીલે અનેક કાર્યક્રમોમાં હાજરી આપી હતી. આ સાથે તેમણે નરેશ પટેલનાં ઘરે શુભેચ્છા મુલાકાત અને સિનિયર નેતા વજુભાઈ વાળા સાથે પણ ચર્ચા કરી હતી. 

શ્વાન અને ભિક્ષુકો માટે પણ કંઇક કરો, ફોરેનરો સામે છાપ ખરાબ થાય છે: પાટીલ 
ગુજરાત ભાજપ પ્રમુખ સી.આર.પાટીલ રાજકોટના પ્રવાસે છે ત્યારે મેયરને ટકોર કરતા કહ્યું કે, રાજકોટના રોડ પર ઢોર ન હોવા જોઇએ. શ્વાન અને ભિક્ષુકો માટે પણ કંઇક કરજો. ભિક્ષુકો મંદિર પાસે હોય ત્યારે વિદેશી લોકો મુલાકાતે આવે છે. વિદેશી લોકોની નજરમાં દેશની છાપ સારી પડતી નથી. 

ખૂંટીયાનો ત્રાસ હવે નહીં થાય 
પાટીલે કહ્યું કે ખૂંટીયા અને રોજડાનો ત્રાસ હવે નહીં થાય ચિંતા ન કરશો, રાજ્યના મુખ્યમંત્રી ભૂપેન્દ્ર પટેલે જ કહ્યું છે કે 10-15 વીઘા જમીનમાં NGOને ગ્રાન્ટ આપીને ખૂંટીયા અને રોજડા રાખીએ તો લોકોના ખેતરને નુકસાન થતું બંધ થાય અને લોકોને ત્રાસ ન થાય. 

શું એક્શનમાં આવશે પ્રદીપ ડવ? 
નોંધનીય છે કે આ પહેલા પાટીલે વડોદરાના મેયરને પણ રખડતાં ઢોર માટે ટકોર કરી હતી તે બાદ વડોદરામાં મોટા પાયે અભિયાન ચલાવીને પશુઓને પકડવામાં આવ્યા હતા. હવે રાજકોટમાં પણ આવી ટકોર બાદ પ્રદીપ ડવ શું કાર્યવાહી કરે છે તે જોવાનું રહ્યું. 

પાટીલ- પટેલ વચ્ચે ચાય પે ચર્ચા
પ્રદેશ ભાજપ અધ્યક્ષ સી.આર.પાટીલ રાજકોટ મુલાકાતે છે ત્યારે પાટીદાર આગેવાન અને ખોડલધામના ટ્રસ્ટી નરેશ પટેલના ઘરે રૂબરૂ જઈ તેમની મુલાકાત કરી હતી. બંને વચ્ચે બંધ બારણે બેઠક થઈ હતી. જેમાં  પાટીદાર સંસ્થાઓની માંગણી અનુસાર પાટીદાર અનામત આંદોલન સમયે થયેલા કેસ પરત ખેંચવા અંગે વાત થઈ હતી. રાજકીય રીતે સૂચક ગણાતી આ બેઠકમાં પાટીલે નરેશ પટેલને કેસો પરત ખેંચવા ભાજપ સરકાર કટિબદ્ધ હોવાની વાત કહી છે તેવી માહિતી મળી રહી છે. સાથે જ 78 જેટલા કેસો પરત ખેંચવાની તૈયારી સરકાર કરી રહી છે તેવી વાત રૂબરૂ જઇ નરેશ પટેલને કહી રોષ ભભૂકે તે પહેલા ઠાળવાનો પ્રયાસ કરાયો હોય તેવુ આ બેઠક પરથી સ્પષ્ટ તારણ નીકળે છે.