કોરોના સંકટ / કોરોના પોઝિટિવ 'પાટીલ' રોજના 3 હજાર જેટલા કાર્યકરો સાથે પડાવતા હતા સેલ્ફી

• ભાજપ પ્રદેશ પ્રમુખ સી.આર.પાટીલનો કોરોના પોઝિટિવ
• રોજના 3 હજાર જેટલા કાર્યકરો સાથે ફોટો પડાવતા હતા
• ગુજરાતના અનેક વિસ્તારોમાં કર્યો પ્રવાસ, રેલીઓ અને સભાઓ

એપોલો હોસ્પિટલમાં ગઇકાલે ભાજપ પ્રદેશ પ્રમુખ સી.આર. પાટીલનો કોરોના રિપોર્ટ કરવામાં આવ્યો હતો. જેમાં તેમનો એન્ટિજન રિપોર્ટ નેગેટિવ આવ્યો હતો. જ્યારે આજે તેમનો RT PCR ટેસ્ટ પોઝિટિવ આવ્યો છે. જેને લઇને ભાજપ અને પાટીલના આગામી દિવસોના તમામ કાર્યક્રમો રદ્દ કરવામાં આવ્યા છે. તો બીજી તરફ તેના સંપર્કમાં આવેલા નેતાઓ ચિંતામાં મુકાયા છે.

આપણા દેશમાં સૌથી ઉપર તો સંવિધાન અને કાયદાને માનવામાં આવે છે. પરંતુ હાલના સમયમાં કાયદાથી પણ ઉપર ભાજપના નેતાઓ પહોંચી ગયા છે. ગુજરાત પ્રદેશ ભાજપના નવા પ્રદેશ પ્રમુખ સી.આર.પાટીલના ગુજરાત પ્રવાસ દરમિયાન કોરોનાના નિયમોનો ખુલ્લેઆમ ભંગ કરવામાં આવ્યો હતો. સરકારના નિયમોને જૂતા નિચે કચડી નાખ્યા હતા. તેમની રેલીમાં નેતાઓનો જમાવડો તો ભેગો કર્યો જ પરંતુ માસ્ક વગર હજારો લોકો સાથે સેલ્ફીઓ પણ પડાવી હતી. ત્યારે હવે હાજરો લોકોની વચ્ચે ગયેલા ભાજપના પ્રદેશ પ્રમુખને જ કોરોના થયો છે.

કોવિડના તમામ નિયમોની કરી હતી ઐસીતૈસી

ગુજરાતમાં આવનાર દિવસોમાં વિધાનસભાની 8 બેઠકો પર પેટાચૂંટણી થવાની છે. ત્યાર હવે કોરોના સંકટ વચ્ચે પેટાચૂંટણી પહેલા તેઓ છેલ્લા કેટલાક દિવસથી ગુજરાતનો પ્રવાસ કરી રહ્યા છે. આ અગાઉ મુખ્યમંત્રી, નાયબ મુખ્યમંત્રી અને મંત્રીઓ સાથે બેઠ કરી હતી. સ્વાગત કાર્યક્રમમાં ખોડલધામ અને મંદિરોના દર્શને ગયા, ગામડાઓના કાર્યકરો સાથે મુલાકાત કરી, મોટી સંખ્યામાં રેલીઓ યોજી, નેતાઓ ગરબે રમ્યા, સેલ્ફી અને ગૃપ ફોટો પણ પડાવ્યા. આ દરમિયાન સતત તેઓ અને નેતાઓ દ્વારા સરકારી ગાઇડલાઇનના લીરેલીરા ઉડતા જોવા મળ્યા હતા. સોશિયલ ડિસ્ટન્સિંગ તો ઠીક પરંતુ કેટલાય નેતાઓએ તો માસ્ક પણ નહોતા પહેર્યા. સભાઓ કરી તેમાં પણ 50 કે 100 નહીં પરંતુ હજારોની સંખ્યામાં લોકો જોવા મળ્યા હતા.

પાટીલના કાર્યક્રમમાં પણ બેઠક વ્યવસ્થા દરમિયાન અને પાટીલની સાથે કાર્યકર્તાઓના ફોટો સેશન વખતે સામાજિક અંતરના ધજાગરા જોવા મળ્યા હતા. પરંતુ ભાજપ પ્રદેશ પ્રમુખ સી.આર.પાટીલે સરકારી ગાઈડલાઈન પ્રમાણે જ કાર્યક્રમનું આયોજન કરવામાં આવ્યું હોવાનું ગાણું ગાયું હતું. 

રોજના 3 હજાર જેટલા કાર્યકરો સાથે ફોટો પડાવતા હતા પાટિલ

ભાજપ પ્રદેશ પ્રમુખ સી.આર.પાટીલ ગુજરાત પ્રવાસે હતા. રાજ્યના અનેક વિસ્તારોમાં તેઓ ફરી રહ્યા હતા. તેવામાં તેમની સાથે ટેકનોલોજીની ટીમ પણ સામેલ હતી. રાજ્યમાં પાટીલ મુલાકાત કરતા તમામ કાર્યકરો સાથે ફોટો પડાવતા હતા. કાર્યકરોને સી.આર. પાટીલ સાથેના ફોટાની ફ્રેમ આપવામાં આવે છે. રોજ અંદાજિત 3 હજાર જેટલા કાર્યકરો સાથે ફોટો પડાવતા હતા. તો QR કોડથી મોબાઈલ ફોટો મેળવી શકાય તેવી ટેકનોલોજી ટીમની વ્યવસ્થા કરવામાં આવી હતી. પરંતુ હવે પ્રશ્ન એ છે કે પાટીલને કોરોના પોઝિટિવ આવતા શું તેમના સંપર્કમાં આવેલા નેતાઓ અને કાર્યકરોના ટેસ્ટ કરવામાં આવશે?

કમલમમાં 7 કોરોના પોઝિટિવ

ભાજપના પ્રદેશ પ્રવક્તા ભરત પંડ્યા ઉપરાંત પ્રદેશ કાર્યાલય કમલમના પ્રદેશ કાર્યલાયના મંત્રી પરેશ પટેલ, મહિલા મોરચાના કાર્યાલય મંત્રી મોના રાવલ, ટેલિફોન ઓપરેટર રાકેશ પંડ્યા, સફાઈકર્મીઓને લાવનાર ડ્રાઈવર, 2 સફાઈકર્મી કોરોના પોઝિટિવ આવ્યા છે. કમલમમાં કોરોનાના પોઝિટિવ કેસ આવતા કાર્યાલયની ઓફીસ બહાર રીબીનવાળા બેરિકેડ લગાવવામાં આવ્યા છે.

કોણ છે સી.આર. પાટીલ?

ભાજપે ગુજરાતમાં સી.આર. પાટીલને નવા પ્રદેશ પ્રમુખ બનાવ્યા છે. સીઆર પાટીલ નવસારીના લોકસભા સાંસદ છે. પાટીલને પ્રધાનમંત્રી નરેન્દ્ર મોદી અને ગૃહ મંત્રી અમિત શાહના નજીકના માનવામાં આવે છે. સીઆર પાટીલ પહેલા ગુજરાત ભાજપના અધ્યક્ષ પદે જીતુ વાઘાણી હતા.