બોલિવૂડના કિંગ શાહરુખ ખાનની ટીમ ત્રિનબાગો નાઇટ રાઇડર્સે કેરેબિયન પ્રીમિયર લીગ (સીપીએલ)નો ખિતાબ પોતાના નામે કરી લીધો છે.
નાઇટ રાઇડર્સની વર્તમાન ટૂર્નામેન્ટમાં આ ૧૨મી મેચ હતી અને ટીમ ચેમ્પિયન બનતા સુધી અજેય રહી છે. ગઈ કાલે મોડી રાતે રમાયેલ ખિતાબી મુકાબલામાં નાઇટ રાઇડર્સે બોલિવૂડ અભિનેત્રી પ્રીતિ ઝિન્ટાની ટીમ સેન્ટ લૂસિયાને આઠ વિકેટે પરાજય આપ્યો. પ્રથમ બેટિંગ કરતાં સેન્ટ લૂસિયાની ટીમ ૧૫૪ રનમાં ઓલઆઉટ થઈ ગઈ હતી. જવાબમાં નાઇટ રાઇડર્સે ૧૮.૧ ઓવરમાં લક્ષ્ય હાંસલ કરી લીધું. ડેરેન બ્રાવોએ વિજયી ચોગ્ગો ફટકાર્યો હતો. નાઇટ રાઇડર્સનો આ ચોથો ખિતાબ છે. શાહરુખ ખાનની આ ટીમ ૨૦૧૫, ૨૦૧૭ અને ૨૦૧૮માં પણ ચેમ્પિયન બની હતી.
૧૫૫ રનના લક્ષ્યનો પીછો કરવા ઊતરેલી નાઇટ રાઇડર્સ ટીમની શરૂઆત ખરાબ રહી હતી અને ટીમે ટિયોન વેબસ્ટેર અને ટિમ સેફર્ટના રૂપમાં બે વિકેટ માત્ર ૧૯ રનના સ્કોર પર જ ગુમાવી દીધી હતી, જોકે ઓપનિંગ બેટ્સમેન સિમન્સે એક છેડો સંભાળી રાખ્યો હતો. ટીમને બે ઝટકા લાગ્યા બાદ સિમન્સે પોતાના હાથ ખોલ્યા હતા અને આક્રમક અર્ધસદી ફટકારી દીધી. તેને ડેરેન બ્રાવોનો મજબૂત સાથ મળ્યો. આ બંને બેટ્સમેન અણનમ રહ્યા હતા. સિમન્સે આઠ ચોગ્ગા અને ચાર છગ્ગા સાથે ૪૯ બોલમાં ૮૪ રન ઝૂડી કાઢ્યા, જ્યારે બ્રાવોઓ ૪૭ બોલમાં ૫૮ રનની ઇનિંગ્સ રમી હતી. સિમન્સને મેન ઓફ ધ મેચ જાહેર કરવામાં આવ્યો હતો.
આ પહેલાં નાઇટ રાઇડર્સના કેપ્ટન પોલાર્ડે મેદાન પર બોલિંગમાં કોહરામ મચાવ્યો હતો. પોલાર્ડ સામે સેન્ટ લૂસિયાના બેટ્સમેનો ઘૂંટણિયે પડ્યા હતા. પોલાર્ડે ૩૦ રન આપીને ચાર વિકેટ ઝડપી હતી. સેન્ટ લૂસિયાની શરૂઆત પણ ઘણી જ ખરાબ રહી હતી અને માત્ર ૧.૨ ઓવરમાં જ કોર્નવાલના રૂપમાં પ્રથમ વિકેટ ગુમાવી હતી. ત્યાર બાદ સતત અંતરે વિકેટો પડતી રહેતા સેન્ટ લૂસિયાના રનની ગતિ ઘણી ધીમી રહી હતી.
પોલાર્ડે આન્દ્રે ફ્લેચર, રોસ્ટન ચેઝ, નજીબુલ્લાહ જદરાન અને ગ્લેનની મહત્ત્વપૂર્ણ વિકેટ ઝડપી હતી. સેન્ટ લૂસિયા તરફથી ફ્લેચરે સૌથી વધુ ૩૯ રન બનાવ્યા હતા. ફ્લેચર નાઇટ રાઇડર્સ સામે ખતરનાક સાબિત થતો નજરે પડી રહ્યો, પરંતુ પોલાર્ડે તેને પેવેલિયનમાં મોકલી આપ્યો હતો. પોલાર્ડ ઉપરાંત અલી ખાન અને ફવાદ અહમદે બે-બે વિકેટે ઝડપી હતી, જ્યારે હુસેનને એક વિકેટ મળી હતી.