ચેતવણી / PM મોદી જે બોલ્યા હતા તે આ CoWin એપ નથી; સરકારની મોટી સ્પષ્ટતા

પરંતુ આ પહેલા આરોગ્ય મંત્રાલયે Co-win નામની એપ વિશે એક મોટી ચેતવણી આપી છે. આરોગ્ય મંત્રાલયના જણાવ્યા અનુસાર રસી નોંધણી માટે હજુ સુધી કોઈ એપ્લિકેશન શરૂ કરવામાં આવી નથી.

CoWin નામથી ફરી રહેલી કોઈ પણ એપ્લિકેશન ડાઉનલોડ કરવામાં ન આવે તેવી સુચના

આથી CoWin નામથી ફરી રહેલી કોઈ પણ એપ્લિકેશન ડાઉનલોડ કરવામાં ન આવે અને કોઈપણ અંગત માહિતી આવી એપ્લિકેશન પર શેર કરવામાં ન આવે. આરોગ્ય મંત્રાલય દ્વારા આવી એપ્લિકેશન શરૂ કરવા વિશે અગાઉથી પૂરતી માહિતી સાથે માહિતગાર કરવામાં આવશે.

એવા અહેવાલો આવ્યા હતા કે સરકાર તરફથી વેક્સીનની જાહેરાત પછી રસીની નોંધણી માટે ગૂગલ પ્લે સ્ટોર પરથી CoWin નામની એપ્લિકેશન  ડાઉનલોડ કરવી પડશે. નોંધણી થયા બાદ રસી માટે કેમ્પ ક્યાં લાગશે તે વિશે માહિતી આપવામાં આવશે તેવા સમાચાર હતા. 

સોશિયલ મીડિયા પર એપ્લિકેશન વિશે વિવિધ પ્રકારની ચર્ચાઓ થઈ રહી છે

પરંતુ હવે આરોગ્ય મંત્રાલયે ચેતવણી આપી છે કે આ સમાચાર તદ્દન ખોટા છે. આ બાજુ સોશિયલ મીડિયા પર એપ્લિકેશન વિશે વિવિધ પ્રકારની ચર્ચાઓ થઈ રહી છે. એપ્લિકેશનને લગતા ઘણા પ્રકારના મિમ પણ જોવા મળી રહ્યા છે.

તમને જણાવી દઈએ કે આરોગ્ય મંત્રાલય દ્વારા એવું કહેવામાં આવ્યું છે કે દેશમાં રસીકરણ કાર્યક્રમ આવતા અઠવાડિયાથી શરૂ થઈ શકે છે. આરોગ્ય મંત્રાલયના આરોગ્ય સચિવ રાજેશ ભૂષણએ મંગળવારે કહ્યું હતું કે કોરોના રસીની મંજૂરીના 10 દિવસ પછી રસીકરણનો કાર્યક્રમ શરૂ થઈ શકે છે.

સ્વાસ્થ્ય મંત્રી કાલે કરશે બેઠક

કોવિશિલ્ડ અને કોવેક્સિનને ઇમર્જન્સી યુસેજની મંજૂરી આપવામાં આવ્યા પછી દેશ રસીકરણના કાર્યક્રમની આતુરતાથી રાહ જોઈ રહ્યો છે. રસીકરણ અંગે કેન્દ્રીય આરોગ્ય પ્રધાન ડો હર્ષ વર્ધન ગુરુવારે રાજ્યોના આરોગ્ય પ્રધાનો સાથે બેઠક કરશે.

ડો. હર્ષ વર્ધન રસી વિતરણ અંગે રાજ્ય સરકારની તૈયારીઓ વિશે માહિતી લેશે. આવતીકાલે, આ મીટિંગ 12.30 વાગ્યે વીડિયો કોન્ફરન્સિંગ દ્વારા થશે. આ બેઠકમાં રસીકરણ માટેની મૂળ તૈયારીઓની સમીક્ષા કરવામાં આવશે.