એમ્સ્ટર્ડમઃ નેધરલેન્ડમાં ગાય માટે ટોઇલેટ બનાવવામાં આવી રહ્યાં છે, જેથી દેશમાં એમોનિયાથી થતાં પ્રદૂષણને ઘટાડી શકાય. હજુ તે યોજના પ્રાયોગિક સ્તર પર છે. આ માટે ડચ વિજ્ઞાની હેન્ક હેન્સકેમ્પે ગાય માટે ઘણાં યુરિનલ ડિવાઇસ બનાવ્યાં છે. હેન્સનાં ફાર્મમાં આ ડિવાઇસની મદદથી ૧પ થી ર૦ લિટર ગૌમૂત્ર એકત્ર કરાય છે. તેમણે એક પરીક્ષણમાં જાણ્યું કે ગૌમૂત્રમાંથી નીકળતું એમોનિયા પર્યાવરણને પ્રદૂષિત કરે છે.
નેધરલેન્ડ અમેરિકા પછી ખેતીમાં બીજા નંબરે છે. આવાં સંજોગોમાં અહીં માલધારીઓની તેમજ ગાયની સંખ્યા ખૂબ જ વધારે છે, તેનાથી મોટી માત્રામાં એમોનિયા ઉત્પન્ન થાય છે. આ સમસ્યાથી સમગ્ર દેશ તકલીફમાં છે. હેન્કના બનાવેલા ડિવાઇસથી ખુલ્લા મેદાનમાં યુિરન કર્યા બાદ ઉત્પન્ન થતા એમોનિયાની માત્રા અડધાથી વધુ ઘટી જાય છે. હેન્કે કહ્યું કે જો પર્યાપ્ત સાધન હોય તો આ સમસ્યાને સરળતાથી દૂર કરી શકાય છે. જો તમે શીખવો તો ગાય પણ ટોઇલેટ જવાનું શીખી જાય છે. ગાયને ટોઇલેટની આદત પાડવી એ ગાયને દોહવાનાં ડિવાઇસ જેવી હોય છે.
હાલમાં આ ટોઇલેટનું પરીક્ષણ પૂર્વ ડચ શહેર ડોટીનચેમ પાસે એક ફાર્મમાં કરવામાં આવી રહ્યું છે. અહીં પ૮માંથી ૭ ગાય પહેલાંથી જ ટોઇલેટનો ઉપયોગ કરવાનું શીખી ગઇ છે. ટોઇલેટ બોક્સ ગાયની પાછળ પૂંછડી પાસે રાખવામાં આવે છે. ગાયને આ આદત પાડવાની હોય છે કે તે યુરિન ટોઇલેટ બોક્સમાં જ કરે. કંપનીનું લક્ષ્ય છે કે આ ટોઇલેટ બોક્સ ર૦ર૦ સુધી બજારમાં આવી જાય અને દેશભરમાં તેનો ઉપયોગ શરૂ થાય. હેન્સની કંપની ખેતી સાથે જોડાયેલાં અન્ય ઉપકરણ પણ બનાવે છે, જેની બજારમાં માંગ છે.