દેશમાં કોરોના વાયરસના કેસ સતત વધી રહ્યા છે. ત્યારે દેશમાં સૌથી વધારે કેસ ધરાવતા મુંબઈમાં તંત્ર દ્વારા મોટો દાવો કરવામાં આવ્યો છે. તેમણે દાવો કર્યો છે કે એક તરફ જ્યાં દિલ્હીમાં હવે કોરોના કેસ વધી રહ્યા છે ત્યારે મુંબઈમાં 15 જુલાઈ સુધી કોરોના કાબૂમાં આવી જશે.
વાયરસના સંક્રમણના દરને 9.5% થી ઘટાડીને 2.6 % કરવામાં આવ્યો : BMC
કોરોના કેસનો ડબલિંગ રેટ 30 દિવસનો થઈ જાય એનો અર્થ કે કોરોના કાબૂમાં છે
મુંબઈમાં અમુક જ વોર્ડમાંથી કોરોના કેસ સામે આવી રહ્યા છે : કમિશનર
BMCના કમિશનર ઈકબાલ સિંહ ચાહલે મીડિયા સાથે વાતચીતમાં દાવો કરતા કહ્યું છે કે જુલાઈ 15 સુધીમાં મુંબઈ ફરીથી ખુલીને શ્વાસ લઇ શકશે ત્યારે શહેરમાં પ્રતિ દિવસ કેસ ઘટીને 100થી 200 જ રહી જશે. જોકે તેમણે કહ્યું કે જ્યાં સુધી કોરોનાની વેક્સિન શોધાતી નથી ત્યાં સુધી લોકોએ સાવચેતી તો રાખવી જ પડશે.
મુંબઈમાં કોરોના વાયરસની પરિસ્થિતિ પર વાત કરતા કમિશનરે જણાવ્યું કે વાયરસને રોકવા માટે અમારી તેના પર પકડ છે વાયરસના સંક્રમણના દરને 9.5% થી ઘટાડીને 2.6 % કરવામાં આવ્યો છે. નિષ્ણાતો અનુસાર જ્યારે એક વાર કોરોના કેસનો ડબલિંગ રેટ 30 દિવસનો થઈ જાય ત્યારે કહી શકાય કે વાયરસ કાબૂમાં આવી ગયો છે. દાદર જેવા વિસ્તાર જ્યાં પહેલા કોરોના કેસમાં ઉછાળો જોવા મળ્યો હતો ત્યાં આ રેટ 50 દિવસનો થઇ ગયો છે અને પૂર્વ વિસ્તારમાં પણ આ જ પરિસ્થિતિ છે.
ભારતનાં કોઈ શહેરમાં આલતી સારી પરિસ્થતિ નથી કારણ કે દેશમાં કોરોના કેસનો ડબલિંગ રેટ 17 દિવસનો છે. દેશમાં બીજા કોઈ શહેરમાં ડબલિંગ રેટ 30 દિવસથી વધારે નથી. વર્તમાનમાં દિલ્હીમાં અમારા કરતા ઓછા કેસ છે પણ હવે રોજનાં બે હજારથી વધુ કેસ સામે આવી રહ્યા છે. કમિશનરે દાવો કર્યો કે મુંબઈમાં હવે છ કે સાત જ એવા વોર્ડ છે જ્યાં કોરોના વાયરસના વધારે કેસ સામે આવી રહ્યા છે અને સરકાર તે જ વિસ્તારમાં સૌથી વધારે ધ્યાન આપી રહી છે.
ધારાવી મુદ્દે વાત કરતા તેમણે કહ્યું કે ધારાવીમાં લાખો લોકો ગીચ વસ્તીમાં રહે છે તેમાં કેસ પકડવા અને લોકોને આઈસોલેટ કરવામાં તંત્ર સફળ રહ્યું. શહેરમાં આગામી 15 દિવસમાં કોરોના વાયરસના કેસ ધીમે ધીમે ઓછા થઇ જશે અને 15 જુલાઈ સુધી દિવસમાં સોથી બસો કેસ જ સામે આવશે. મુંબઈમાં હવે અમુક જ વોર્ડમાં કોરોના વાયરસના કેસ સામે આવી રહ્યા છે ત્યારે તંત્ર આ વિસ્તારમાં એક પ્લાન સાથે રેપીડ ટેસ્ટિંગ કરશે. ખાનગી સંસ્થાઓ દ્વારા એમ્બ્યુલન્સની મદદ લેવામાં આવશે. ઘરે ઘરે જઈને તપાસ કરવા માટે એમ્બ્યુલન્સ મૂકવામાં આવશે.