કોરોના વાયરસ ઝડપથી દેશમાં પગપેસારો કરી રહ્યો છે. દેશમાં કોરોના સંક્રમિતોની સંખ્યા 6 હજારને પાર કરી ગઈ છે. એવામાં સ્થિતિ પર કાબૂ મેળવવા માટે ભારત સરકાર શક્ય એટલા પ્રયાસો કરી રહી છે. આ દરમિયાન એવા સમાચાર આવી રહ્યાં છે કે, ટેલિવિઝનની સૌથી લોકપ્રિય સીરિયલ તારક મહેતા કા ઉલ્ટા ચશ્માના એક્ટર તન્મય વેકરિયા એટલે કે બાઘાની સોસાયટી સીલ કરી દેવામાં આવી છે, કારણ કે ત્યાં ત્રણ લોકોનો રિપોર્ટ પોઝિટિવ આવ્યો છે.
કોરોનાનો કહેર સતત વધતો જઈ રહ્યો છે
મુંબઈમાં આ એક્ટરના એપાર્ટમેન્ટને કરાયું સીલ
અહીં 3 લોકો કોરોના પોઝિટિવ આવતા ફફડાટ
તમને જણાવી દઈએ કે, મળતી માહિતી પ્રમાણે મુંબઈના કાંદિવલી વેસ્ટના રાજ આર્કેડ બિલ્ડિંગમાં તન્મય વેકરિયા રહે છે અને અહીં 3 લોકો પોઝિટિવ મળતાં મુંબઈ મહાનગરપાલિકાએ આ બિલ્ડિંગ સીલ કરી દીધું છે અને મંગળવારથી ત્યાંના લોકો 14 દિવસ માટે ક્વોરંટાઈન છે. જોકે, આ 3 પોઝિટિવ લોકોની કોઈ જ ટ્રાવેલ હિસ્ટ્રી નથી. આ ત્રણેય દર્દીઓને મુંબઈની સેવન હિલ્સ હોસ્પિટલમાં એડમિટ કરાયા છે.
તમને જણાવી દઈએ કે, તન્મય પરિવાર સાથે આ જ બિલ્ડિંગમાં રહે છે તેને બે દીકરીઓ છે. હવે આ બિલ્ડિંગને 14 દિવસ સુધી ક્વોરંટાઈનમાં રાખવામાં આવશે. જે બાદ સાવચેતીના પગલે બિલ્ડિંગ સીલ કરી દેવામાં આવી છે અને ત્યાં પોલીસ પણ ગોઠવી દેવામાં આવી હતી. જેથી કોઈપણ વ્યક્તિ બિલ્ડિંગમાંથી બહાર નહીં નીકળી શકે અને કોઈપણ અંદર જઈ નહીં શકે. ત્યાંના રહેવાસીઓને તમામ આવશ્યક સામાન ઘરે પહોંચાડવામાં આવશે.
ઉલ્લેખનીય છે કે, થોડાં સમય પહેલાં જ ટેલિવિઝનની જાણીતી અભિનેત્રીની સોસાયટીમાં પણ સ્પેનથી આવેવો એક શખ્સનો રિપોર્ટ કોરોના પોઝિટિવ આવતા આખા એપાર્ટમેન્ટને સીલ કરી દેવામાં આવ્યું હતું. હાલ અંકિતા લોખંડે પણ 14 દિવસ સુધી ક્વોરંટાઈન છે. મહારાષ્ટ્ર અને ત્યારબાદ ભારત સરકારે લોકડાઉન જાહેર કર્યા બાદ મુંબઈમાં ફિલ્મ અને ટીવી સિરિયલોની તમામ પ્રવૃત્તિઓ બંધ છે.