જોઈ લઈશું કોરોનાને... હા, કોરોના સામે લડવા માટે તંત્રને તૈયાર કરવા માટે મોદી સરકારે કમર કસી લીધી છે.
કોરોના વાયરસને લઈને સરકાર ઍલર્ટ
કોઈ પણ પરિસ્થિતિને પહોંચી વળવા માટે તૈયારી
27 ડિસેમ્બરે કરવામાં આવશે મોક ડ્રિલ
કોરોના વાયરસ... છેલ્લા બે વર્ષથી આપણાં મગજમાં હવે ઘર કરી ગયો છે. જ્યારે શરૂઆતમાં એન્ટ્રી થઈ ત્યારે આખા દેશના લોકો ભયમાં હતા, બે મોટી લહેરમાં હજારો પરિવારોએ પોતાના સ્વજન ગુમાવ્યા. પછી વેક્સિન આવી અને ધીમે ધીમે જીવન સામાન્ય થવા લાગ્યું, પણ પડોશી દેશ ચીનમાં કોરોનાના કારણે ફરી હાલ બેહાલ છે. એવામાં ભારતમાં પણ કોઈ ચૂક ન રહી જાય તે માટે સરકાર પહેલેથી ઍલર્ટ મોડમાં કામ કરી રહી છે.
મોદી સરકારનો મોટો નિર્ણય
ભારતમાં કોઈ પણ પરિસ્થિતિને પહોંચી વળવા માટે તંત્ર કેટલું તૈયાર છે તેનો ટેસ્ટ કરવા માટે કેન્દ્રના સ્વાસ્થ્ય મંત્રાલય દ્વારા 27 ડિસેમ્બરના રોજ મોક ડ્રિલ કરવાનો આદેશ આપ્યો છે.
શું કરાશે આ મોકડ્રિલમાં?
મોક ડ્રિલમાં દેશના તમામ રાજ્યોમાં આઇસોલેશન, ઑક્સીજન, ICU બેડ વગેરેની ક્ષમતા નોંધવામાં આવશે. જિલ્લા સ્તર પર તમામ આંકડાઓ ભેગા કરવામાં આવશે. આ સિવાય ડોક્ટર્સ, નર્સ સહિતના સ્ટાફ વિશેની જાણકારી પર ફોકસ કરવામાં આવશે.
આટલું જ નહીં ઈમરજન્સીની સ્થિતિમાં ઍમ્બ્યુલન્સ, RTPCR કીટ વગેરે પર પણ ધ્યાન આપવામાં આવશે અને જો કોઈ પરિસ્થિતિ ખરાબ સર્જાય તો માસ્ક, વેન્ટિલેટર સહિતના સાધનો કેટલી સંખ્યામાં ઉપલબ્ધ હશે તે પણ જોવામાં આવશે.
સતત એક્શનમાં છે સરકાર
નોંધનીય છે કે ભારતમાં ચીન, જપાન, સાઉથ કોરિયા, હૉંગકોંગ અને થાઈલેન્ડથી આવી રહેલ તમામ મુસાફરો માટે કોરોના ટેસ્ટ ફરજિયાત કરી દેવામાં આવ્યો છે. આ સિવાય પીએમ મોદીએ પણ એક હાઇલેવલ મીટિંગ કરીને કામોને લઈને સૂચનાઓ આપી હતી.