ક્રિકેટ / પીચ પર એ દિવસે બોલર નહીં તોફાન આવ્યું હતું, 13 વિકેટ ઉખાડી ફેંકી દીધી, સૌ કોઈ હેરાન

• પહેલી ઈનિંગમાં 37 રન આપી 7 વિકેટ ખેરવી
• બીજી ઈનિંગમાં 18 રન આપી 6 વિકેટ ખેરવી.
• વેસ્ટ ઈન્ડિઝે પહેલી ઈનિંગમાં બનાવ્યા 660 રન

322 રનનાં અંતરથી જીતી મેચ

10 ફેબ્રુઆરીથી 13 ફેબ્રુઆરી સુધી ચાલેલી તે મેચમાં વેસ્ટ ઈન્ડિઝ અને ન્યુઝીલેન્ડની ટીમ આમને સામને હતી. આજે આપણે તે ઐતિહાસિક મેચની વાત કરીશું. તે મેચ વેસ્ટ ઈન્ડિઝે ઈનિંગ અને 322 રનના અંતરથી જીતી હતી. તે સમયે આ સૌથી મોટી જીતમાંથી એક માનવામાં આવતી હતી. પણ આ જીતને શક્ય બનાવવામાં જે બોલરનો મહત્ત્વનો ફાળો હતો તેમને વિશ્વભરમાં લોકો કર્ટની વોલ્શથી જાણે છે.

ત્રણ બેટ્સમનોએ ફટકારી સદી

તે મેચમાં વેસ્ટ ઈન્ડિઝે પહેલા બેટીંગ કરી અને 5 વિકેટ ગુમાવીને 660 રન બનાવીને દાવ ડિક્લેર કર્યો હતો. વિન્ડિઝનાં ત્રણ બેટ્સમેનોએ શતક લગાવ્યા હતા. સૌથી વધારે રન જીમી એડમ્સે માર્યા જેણે 24 ચોકા મારીને 151 રન બનાવ્યા હતા. જ્યારે દિગ્ગજ બ્રાયન લારાએ 24 ચોકાની મદદથી 147 રનનું યોગદાન આપ્યું. ત્યારબાદ જુનિયર મનેએ 88 બોલમાં નોટઆઉટ 101 રન ઝડી દીધા હતા. આ ત્રણેય શતકો ઉપરાંત ત્રણ અર્ધ શતક પણ વાગ્યા હતા. શેરવિન કેંપબેલે 88, કીથ અર્થટને 70 અને શિવનારાયણ ચંદ્રપોલે નોટઆઉટ 61 રન બનાવ્યા હતા.

216 રનમાં ન્યૂઝીલેન્ડની ટીમ સમેટાઈ

બેટ્સમેનોએ તો પોતાનું કામ કરી દીધુ હતું. હવે આશરે 7 ફૂટનાં ફાસ્ટ બોલર કર્ટની વોલ્શની બોલિંગ પર્ફોર્મન્સ જોવાની બાકી હતી. તેમણે મેચમાં આવતાની સાથે પોતાનો જાદુ ચલાવવાની શરુઆત કરી દીધી. સૌપ્રથમ તેમણે બ્રાયન યંગને પેવિલિયનનો રસ્તો બતાવ્યો. ત્યારબાદ તો વિકેટોની લાઈન લાગી ગઈ. જોત જોતામાં વોલ્શે એન્ડ્ર્યુ જોન્સ, સ્ટીફન ફ્લેમિંગ, શેન થોમસન, એડન પરોરે, મર્ફી અને સાઇમન ડોલને પણ પોતાનો શિકાર બનાવી દીધો. વોલ્શે 20.4 ઓવરમાં ફક્ત 37 રન આપીને 7 વિકેટો ખેરવી નાંખી. ન્યૂઝીલેન્ડની ટીમ 216 રનમાં સમેટાઈ ગઈ.

ન્યૂઝીલેન્ડ પર ફોલોઓનનો ખતરો 

હવે ન્યૂઝીલેન્ડ સામે ફોલોઓનનો ખતરો હતો. આ વખતે આશા હતી કે બેટ્સમેન તેમની ભુલો સુધારશે. પણ આ વખતે તેમનાંથી વધારે ભુલો થઈ ગઈ. જેના લીધે ટીમ ફક્ત 122 રનમાં ધરાશાયી થઈ ગઈ. આ વખતે ફરી એકવાર કર્ટની વોલ્શે ન્યૂઝીલેન્ડનાં બેટ્સમેનોને ટકવા ના દીધા. વોલ્શે ફક્ત 15.2 ઓવરોમાં 18 રન આપીને 6 વિકેટો ખેરવી નાંખી. કુલ મળીને તેમણે 55 રન આપીને 13 બેટ્સમેનોને પેવિલિયન ભેગા કર્યાં.