ઓર્ગેનિક ખેતી / બસ આ એક કારણ અને લાખો ડૉલરની નોકરી છોડીને માદરે વતન આવી ચડ્યું આ દંપતિ

આજે પોતાની કરિયર બનાવવા માટે લાખો યુવાનો દેશમાંથી વિદેશમાં જાય છે પણ લાખો ડોલરની નોકરી છોડી પાછા પોતાના દેશ આવવાની હિંમત કોઈ વિરલા જ કરી શકે છે. અહીં એવા જ એક દંપતીની વાત છે કે જે વિદેશમાં લાખો ડોલરની નોકરી છોડી પોતાના દેશમાં આવી ગયા છે અને શરૂ કરી છે ઓર્ગેનિક ફૂડની ખેતી (organic farming). ત્યારે જોઈએ અંતરાત્માના અવાજને અનુસરી પ્રકૃતિના સંરક્ષણ માટે માદરે વતન આવી ચડેલા એક દંપતીનો આ અહેવાલ.

ગુજરાત (gujarat) ના નડિયાદ નજીક ચકલાસી (Chaklasi) પાસે 10 એકરમાં પથરાયેલું આ લીલુંછમ ખેતર વતનપ્રેમ સાથે સાથે પ્રકૃતિ સંરક્ષણની વાર્તા સંભળાવી રહ્યું છે. વિવિધ પાકથી લહેરાતું આ ખેતર એક યુવાદંપતીના અંતરાત્માના અવાજનો પડઘો પાડી રહ્યું છે. પોતાના ખેતરમાં પૈપયાના છોડની હેતથી માવજત કરી રહેલા આ દંપતીનું નામ છે વિવેકશાહ અને વૃંદા શાહ. મૂળ ગુજરાતના અમદાવાદ શહેરના વતની એવા વૃંદા શાહ અને વિવેક શાહ આજથી ત્રણ વર્ષ પહેલા સેનફ્રાંસિસ્કોના સિલિકોન વેલીમાં રહેતા હતાં.

વૈશ્વિક તાપમાન અને ખેતીમાં રાસાયણિક ખાતરના વપરાશથી પ્રેરાયાં:

વિવેક શાહ સોફ્ટવેર એન્જિનિયર છે. જ્યારે વૃંદા શાહ પ્રિન્ટ મેકિંગમાં માસ્ટર છે. બદલાતા વૈશ્વિક તાપમાન અને ખેતીમાં રાસાયણિક ખાતરના વધી રહેલા વપરાશે આ દંપતીને આરોગ્ય વિશે વિચારવા મજબૂર કરી દીધાં. તેમણે પરંપરાગત અને ઓર્ગેનિક ખાતરથી ખેતી કરવાનો વિચાર કર્યો અને ક્ષણના પણ વિલંબ વિના નોકરી છોડીને આ દંપતીએ ફાર્મા કલ્ચરનો દોઢ માસનો કોર્સ પણ જોઈન્ટ કરી લીધો.

ફાર્મા કલ્ચરના કોર્સ બાદ બંનેએ વિચાર્યું કે જો ખેતી જ કરવી હોય તો કેમ પોતાના દેશ અને વતનમાં જ ના કરાય અને બન્નેએ કેલીફોર્નિયામાં લાખો ડોલરની નોકરી છોડી પોતાના દેશમાં આવવાની તૈયારી શરૂ કરી. નોકરી છોડી ત્યારે આ દંપતી પાસે વૈકલ્પિક આવકનો કોઈ સોર્સ ન હતો. પરંતુ પર્યાવરણના રક્ષણનો જે ઉત્સાહ હતો તેને બધું જ સારું થવાની આશા જગાવી હતી. કેમ કે, તેઓ એક મહત્વનું કામ કરવા તરફ પગલું ભરી રહ્યાં હતાં.

ઓર્ગેનિક ખેતીનું ઉમદા પરિણામઃ

ઓર્ગેનિક પાકની ખેતી માટે જમીનની શોધ તેમને નડિયાદ નજીકના ચકલાસી પાસે દોરી લાવી. અહીં હાઈવે કાંઠે તેમણે 10 એકર જમીન ખરીદી. આજથી ત્રણ વર્ષ પહેલા જે જમીન ખરીદી હતી તેના પર આ દંપતની મહેનતથી આજે અનેક ફળ ઝાડ, ફૂલછોડ અને અનાજનો પાક લહેરાઈ રહ્યો છે. 10 એકરના આ ખેતરને સાત અલગ-અલગ ભાગોમાં વહેંચવામાં આવ્યું છે. જેમાં દંપતી દ્વારા બાજરી, ઘઉં જેવા ધાન્ય પાકો લેવામાં આવે છે તો કેળાં, પપૈયા, કેરી અને જાંબુ અને જામફળ જેવા ફળો પણ ઉત્પન્ન કરાઈ રહ્યાં છે.

ધાણા, રીંગણ, બટાકા, મેથી જેવા શાકભાજી પણ પકવવામાં આવે છે. આ બધા પાક માટે છાણિયા ખાતરનો ઉપયોગ કરવામાં આવે છે તેમજ પાકને જીવજંતુથી રક્ષણ આપવા તુલસી, લેમનગ્રાસ જેવા સુગંધિત છોડોને પાકની આસપાસ વાવવામાં આવ્યાં છે. આ દંપતીએ પોતાના ખેતરમાં કાયમી ધોરણે કેટલાંક ખેતમજૂર રાખ્યા છે તેમ છતાં પોતે પણ ખૂબ ખંત અને કાળજીથી ખેતીકામ કરી રહ્યાં છે.

આ દંપતી ઓર્ગેનિક ખેતી માટેનો વિચાર પોતાના પૂરતો મર્યાદિત બનાવી રાખવા નથી માગતું. આ દંપતી ઓર્ગેનિક ખેતીનો વ્યાપ વધે તે માટે સેમીનારોનું આયોજન પણ કરે છે. આજે ગ્લોબલ વોર્મિંગ અને જળવાયુ પરિવર્તન કોઈની રાહ જોતાં નથી ત્યારે બીજો કોઈ વિચાર કર્યા સિવાય પ્રાકૃતિક ખેતીના એક વિચારને આગળ વધારી આ યુવા દંપતીએ નવી પેઢી સમક્ષ એક વિચાર તરતો મૂક્યો છે. આ દંપતી ઓર્ગેનિક ખેતીનો વ્યાપ વધે તે માટે સેમીનારોનું આયોજન પણ કરે છે. ગ્લોબલ વોર્મિંગ અને જળવાયુ પરિવર્તન કોઈની રાહ પણ જોતાં નથી.