સુરતમાં ઓગસ્ટ 2016થી ઓક્ટોબર 2018 દરમિયાન ઈર્ષાદ પઠાણ સહિત કુલ 19 આરોપીએ બોગસ વાહન લોન કૌભાંડ આચર્યું હતું.
નકલી વાહનોનું લોન કૌભાંડ ઝડપાયું
યસ બેંકના 2 મેનેજરની ધરપકડ
સેલ્સ મેનેજર કેયુર ડોક્ટર,ધવલ લીંબડની ધરપકડ
સુરતમાં નકલી વાહનોનું મસમોટું લોન કૌભાંડ ઝડપાયું છે. આ કૌભાંડ યસ બેન્કની સહારા દરવાજા બ્રાન્ચમાંથી આચરવામાં આવ્યું હતું. સમ્રગ કૌભાંડની જો વાત કરીએ તો, પાંચેક વર્ષ પહેલાં ઓગસ્ટ 2016થી ઓક્ટોબર 2018 દરમિયાન ઈર્ષાદ પઠાણ સહિત કુલ 19 આરોપીએ બોગસ વાહન લોન કૌભાંડ આચર્યું હતું. જેમાં કુલ રૂ. 8 કરોડ 64 લાખ 71 હજાર 948ની જુદા-જુદા 53 વાહનો ઉપર લોન લીધી હતી.
જે પૈકી 5 કરોડ 25 લાખ 26 હજાર 830 જેટલી રકમની લોન ભરવામાં આવી ન હતી. યસ બેન્કમાંથી વપરાયેલા વાહન પર લોન લેવામાં આવતી હતી. પરંતુ લોન લેવા માટેના તમામ દસ્તાવેજો, કાગળો અને વીમા પોલિસી બોગસ તૈયાર કરવામાં આવ્યા હતા. જે મામલે ગત જાન્યુઆરી માસમાં ક્રાઇમ બ્રાન્ચમાં ફરિયાદ નોંધાઇ હતી અને ક્રાઇમ બ્રાન્ચે આ મામલે તપાસ કરતા ઘણા ચોંકાવનારા તથ્યો બહાર આવ્યા હતા.
જેમા ખાસ કરીને ટાટા મોટર્સ અને અશોક લેલેન્ડ નામની કંપનીઓના વાહનોના બોગસ ડોક્યુમેન્ટ તૈયાર કરી તેને યુઝડ વાહન બતાવી તેની ઉપર લોન લઈ લેવામાં આવી હતી. ક્રાઈમ બ્રાન્ચે આ કૌભાંડના મામલે 6 શખ્સોની ધરપકડ કરી લીધી છે. તથા યસ બેન્કના બે સેલ્સ મેનેજર કેયુર ડોકટર અને ધવલ લીંબડની પણ ધરપકડ કરવામાં આવી છે.