બોરસદ પાલિકામાં વિકાસ કામો ન થતા હોવાનો આરોપ સાથે કાઉન્સિલર પરાગ પટેલે સાંસદને લીધા આડેહાથ, સોશિયલ મીડિયામાં વ્યક્ત કર્યો ગુસ્સો
આણંદના સાંસદ સામે સોશિયલ મીડિયામાં અભદ્ર પોસ્ટ મુકાઈ
બોરસદ ભાજપના કાઉન્સિલરે જ કરી અભદ્ર પોસ્ટ
સાંસદ મિતેષ પટેલ સામે એલફેલ શબ્દો વાપર્યા
ગુજરાત વિધાનસભાની ચૂંટણી ટાણે પક્ષના જ કાર્યકર્તાઓ એકબીજાના ટાંટિયા ખેંચવાનો મોકો છોડી નથી રહ્યા. પક્ષમાં જ અંદરોઅંદર નારાજગી અને રોષ જોવા મળી રહ્યો છે. ત્યારે આણંદના સાંસદ વિરુદ્ધ સોશિયલ મીડિયામાં અભદ્ર પોસ્ટ મુકાતા ભાજપનો આંતરિક મુદ્દો બહાર આવ્યો. બોરસદના ભાજપના કાઉન્સિલરે જ અભદ્ર પોસ્ટ મુકતા રાજકારણમાં ગરમાવો આવ્યો છે.
કાઉન્સિલર પરાગ પટેલે કર્યો બેફામ વાણી વિલાસ
આણંદના સાંસદ મિતેષ પટેલ સામે વિકાસના કામોને લઇને આરોપ લગાવવામાં આવ્યા છે. બોરસદ ભાજપના કાઉન્સિલરે જ અભદ્ર પોસ્ટ મુકતા ચર્ચાનો દોર શરુ થયો. વિકાસના કામોમાં અવરોધ થતા હોવાનો ઉલ્લેખ કરીને જાકારો આપો તેમ પણ પોસ્ટમાં લખવામાં આવ્યું છે. સાંસદ મિતેષ પટેલને એલફેલ શબ્દોનો પ્રયોગ કરવામાં આવ્યો છે. આ અંગે બોરસદ પોલીસ સ્ટેશનમાં 4 લોકો સામે પોલીસ ફરિયાદ નોંધાઇ છે.
ભાજપની પૂર્ણ બહુમત છતાં કામ ન થતો હોવાનો આરોપ
બોરસદ નગરપાલિકામાં ભાજપની પૂર્ણ બહુમત અને કરોડોની ગ્રાન્ટ હોવા છતાં વિકાસના કામો ન થતો હોવાનો આક્ષેપ કરવામાં આવ્યો હતો. જે કામો લખીને મોકલવામાં આવે છે તેને પ્રાદેશિક કમિશનર દ્વારા જુદા જુદા નિયમો બનાવીને રદ કરી દેવામાં આવતા સ્થાનિક કાઉન્સિલરોમાં ગુસ્સો ફાટી નીકળ્યો હતો. ત્યારે વોર્ડ નં 7માં ભાજપના મેન્ડેટ પર ચૂંટાયેલા કાઉન્સિલર પરાગભાઈ પટેલએ સોશિયલ મીડિયામાં રોષ ઠાલવ્યો હતો. પ્રાદેશિક કમિશનર દ્વારા જે કામો રદ કરવામાં આવે છે તેમાં સત્તાધારીપક્ષના કેટલાક કાઉન્સિલરોના હાથ છે અને તેઓને સાંસદ મિતેષભાઈ પટેલ મદદગારી કરી રહ્યા હોવાનું જણાવીને બેફામ વાણીવિલાસ કરવામાં આવ્યો હતો.