અમદાવાદ મ્યુનિસિપલ કોર્પોરેશન સંચાલિત નવી સરદાર વલ્લભભાઇ પટેલ ઇન્સ્ટિટ્યૂટમાં આગામી દિવસોમાં મેડિકલ કાઉન્સલ ઓફ ઇન્ડિયાનું ઇન્સ્પેક્શન થનાર છે. આ ઇન્સ્પેક્શનના કારણે ભાજપના શાસકો કરોડો રૂપિયાના ખર્ચે ફુલ્લી મોટરાઇઝ્ડ બેડને મંજૂરી આપવા માટે ઉતાવળા બન્યા છે. છ મહિના અગાઉ આ પ્રકારના બેડની ખરીદીના મામલે શાસક પક્ષે લાલ આંખ કરી હતી, પરંતુ હવે અચાનક યુ-ટર્ન લેવાથી મ્યુનિસિપલ વર્તુળોમાં આશ્ચર્ય ફેલાયું છે.
હોસ્પિટલ કમિટીએ ગત તા.3 જૂન, 2019એ ઠરાવ મંજૂર કરી આઇસીયુ યુનિટ માટે કુલ ૩૬ર ફુલ્લી મોટરાઇઝ્ડ બેડ ખરીદવાની તંત્રની દરખાસ્તને મંજૂરી આપીને વિવાદ વહોરી લીધો હતો. એક બેડની કિંમત રૂ.1.43 લાખ નક્કી કરાઇ હતી. આ માટે રૂ.5.19 કરોડના ટેન્ડરને મંજૂર કરાયું હતું. જો કે આ વખતે ભારે વિવાદ સર્જાતાં સ્ટેન્ડિંગ કમિટીએ ઠરાવને વહીવટીતંત્ર સમક્ષ પરત મોકલાવ્યો હતો. હવે આ વિવાદાસ્પદ ઠરાવ ફરી હોસ્પિટલ કમિટીમાં પસાર થઇને સ્ટેન્ડિંગ કમિટીમાં મુકાયો છે.
ભાજપના હોદ્દેદારોએ કંઈ નવું કર્યાની ચર્ચા
તંત્ર દ્વારા પુનઃમંજૂરી માટે મુકાયેલા ઠરાવના મુસદ્દામાં લેશમાત્ર ફેરફાર કરાયો નથી, જેના કારણે મ્યુનિ. વર્તુળોમાં ભારે આશ્ચર્ય ફેલાયું છે. જાણકાર સૂત્રો કહે છે, સ્ટેન્ડિંગ કમિટીમાં શાસકોએ 'મેડ ઇન ચાઇના'ના હલકી ગુણવત્તાના બેડ જે તે કંપની દ્વારા ખરીદાય તેવી આશંકા વ્યક્ત કરી હતી, જેના પગલે મ્યુનિ. ભાજપના એક ઉચ્ચ હોદ્દેદાર દ્વારા કંપનીની ફેકટરીની મુલાકાત લેવી તેવો નિર્ણય તે વખતે લેવાયો હતો.