કોરોના વાયરસના કારણે દુનિયાભરમાં અત્યારસુધી 8 લાખથી વધારે લોકોના મોત થયા છે જ્યારે 2 કરોડ 39 લાખ લોકો કોરોના વાયરસથી સંક્રમિત થયા છે. ચીનના વુહાનથી આવેલો આ વાયરસ ડિસેમ્બરથી શરૂ થઈને આખી દુનિયામાં ફેલાયો છે પરંતુ હજુ સુધી તેની કોઈ વેક્સીન બની નથી. એક રિપોર્ટ અનુસાર કુલ 23 વેક્સીન માનવ પરીક્ષણ માટે તૈયાર થઈ છે જેમાંથી કેટલીક પહેલા અને કેટલીક બીજા તો કેટલીક ત્રીજા સ્ટેજમાં છે. જાણો કઈ વેક્સીનથી લોકોને છે વધારે આશા, તે ક્યારે આવશે અને શું હશે તેની કિંમત.
કોરોના મહામારીથી પ્રભાવિત છે દુનિયા
23 વેક્સીન માનવ પરીક્ષણ માટે છે તૈયાર
આટલા સમય સુધીમાં આવી શકે છે વેક્સીન
ઓક્સફર્ડની વેક્સીન છે સૌથી આગળ
વેક્સીન બનાવવાની રેસમાં બ્રિટનની ઓક્સફર્ડ યુનિવર્સિટીની વેક્સીન ChAdOx1 nCoV-19 સૌથી આગળ છે. તેના ઉત્પાદન માટે એસ્ટ્રાજેનેકા કંપની સાથે ભાગીદારી કરાઈ છે. ભારતમાં તેના ઉત્પાદન માટે એસ્ટ્રાજેનેકા સાથે સીરમ ઈન્સ્ટીટ્યૂટની ભાગીદારી છે. તેના અંતિમ ચરણનું ટ્રાયલ ચાલી રહ્યું છે. માનવામાં આવી રહ્યું છે કે આ વેક્સીન ડિસેમ્બર સુધી માર્કેટમાં આવશે. તેની કિંમત લગભગ 4 ડોલર એટલે કે 297 રૂપિયાની આસપાસ રહેશે.
ક્યાં સુધીમાં આવશે મોર્ડનાની વેક્સીન
અમેરિકાની ડ્રગ કંપની મોર્ડનાની વેક્સીન mRNA-1273 નું ત્રીજા ચરણનું ટ્રાયલ ચાલી રહ્યું છે. તેમાં 30 હજાર લોકોને સામેલ કરાયા છે. તેમાં સપ્ટેમ્બરમાં પૂરું કરવાનું લક્ષ્ય છે. કંપનીએ આ વર્ષે ડિસેમ્બર સુધી વેક્સીનને બજારમાં લાવવાની યોજના બનાવી છે. માનવામાં આવી રહ્યું છે કે તેની કિંમત 1800થી 2300 રૂપિયાની વચ્ચે હોઈ શકે છે.
ચીનની વેક્સીનની શું છે સ્થિતિ
ચીનની ફાર્મા કંપની સિનોફાર્મે હાલમાં જાહેરાત કરી છે કે વર્ષના અંત સુધીમાં તે કોરોના વેક્સીન બનાવી લેશે. તેના ત્રીજા ચરણનું ટ્રાયલ સંયુક્ત અરબ અમીરાતમાં ચાલી રહ્યું છે. આ વેક્સીન ડિસેમ્બર સુધી બજારમાં આવે તેવી આશા છે. ઉલ્લેખનીય છે કે આ વેક્સીનના 2 ડોઝની કિંમત 1000 યુઆન એટલે કે 10700 રૂપિયાની રહેશે.
ચીનની એક અન્ય વેક્સીન પણ તૈયાર થવા આવી છે. ચીની કંપની કૈન્સિનો બાયોલોજિક્સ ઈંકની વેક્સીન Ad5-nCoV ને પેટેંટ મળી ગયું છે. સાથે બીજિંગ ઈન્સ્ટીટ્યૂટ ઓફ બાયોટેક્નોલોજીના સહયોગથી બનાવેલી આ વેક્સીનને ચીનમાં સૈન્ય ઉપયોગની પરમિશન પણ મળી છે. વૈજ્ઞાનિકોને આશા છે કે આ વર્ષના અંત સુધીમાં આ વેક્સીન બજારમાં આવી શકે છે. જો કે તેની કિંમતને લઈને કોઈ અનુમાન કરાયું નથી.