દુનિયાની પાંચ મોટી ટેક્નોલોજી કંપનીઓની માર્કેટ કેપ ૩૦ જાન્યુઆરીથી ૧૩ માર્ચ, ૨૦૨૦ દરમિયાન ૬૨૩.૨૩ અબજ ડોલર ઘટી ગઇ છે. આ કંપનીઓમાં ગૂગલ, ફેસબુક, એપલ, માઇક્રોસોફ્ટ અને એમેઝોનનો સમાવેશ થાય છે. પાંચેય ટેક કંપનીઓની એવરેજ માર્કેટ કેપ ૫.૨૫ લાખ કરોડ ડોલરથી ઘટીને ૪.૬૩ લાખ કરોડ ડોલર થઇ ગઇ છે.
વિશ્વની પાંચ ટોચની ટેક કંપનીઓની માર્કેટ કેપ ઘટીને ૪.૬૩ લાખ કરોડ ડોલર થઈ ગઈ
સૌથી મોટી ટેક્નોલોજી કંપની એપલને સૌથી વધુ નુકસાન થયું છે. એપની માર્કેટ કેપ ૩૦ જાન્યુઆરીના રોજ ૧,૪૧૭ લાખ કરોડ ડોલર હતી, જે ૧૩ માર્ચ સુધી ૨૦૧ અબજ ડોલર ઘટીને ૧,૨૧૬ લાખ કરોડ ડોલર પર આવી ગઇ છે.
એપલ બાદ સૌથી વધુ નુકસાન ગૂગલ ની પેરેન્ટ કંપની આલ્ફાબેટ ઇન્કને થયું છે. તેની માર્કેટ કેપ ૧,૦૦૧ લાખ કરોડ ડોલરથી ઘટીને ૮૩૮ અબજ ડોલર પર આવી ગઇ છે. ફેસબુક ની માર્કેટ કેપ ૫૯૭.૨૫ અબજ ડોલરથી ઘટીને ૪૮૫.૩૭ અબજ ડોલર પર આવી ગઇ છે. માઇક્રોસોફ્ટ ની માર્કેટ કેપ ૧૦૬ અબજ ડોલર ઘટીને ૧૩ માર્ચના રોજ ૧,૨૦૮ લાખ કરોડ ડોલર અને એમેઝોન ની માર્કેટ કેપ ૪૨.૬૫ અબજ ડોલર ઘટીને ૮૮૮.૫૯ અબજ ડોલર થઇ ગઇ છે.
ભારતની ટોપ ટેન કંપનીઓની પણ માર્કેટ કેપ ઘટી
એ જ રીતે ભારતમાં સેન્સેક્સની ટોપ ટેન કંપનીની માર્કેટ કેપમાં ૪,૨૨,૩૯૩.૪૪ કરોડ રૂપિયાનો જંગી ઘટાડો થયો છે. સૌથી વધુ નુકસાન ટીસીએસ અને રિલાયન્સ ઇન્ડસ્ટ્રીઝને થયું છે.
ટીસીએસ ની માર્કેટ કેપ રૂ.૧,૧૬,૫૪૯.૦૭ કરોડ ઘટીને રૂ.૬,૭૮,૧૬૮.૦૪૯ કરોડ પર આવી ગઇ છે. રિલાયન્સ ની માર્કેટ કેપ રૂ.૧,૦૩,૪૨૫.૧૫ કરોડ ઘટીને ૭,૦૧,૬૯૩.૫૨ કરોડ પર આવી ગઇ છે. કોરોના વાઇરસથી ગભરાયેલા વિદેશી સંસ્થાગત રોકાણકારો (એફપીઆઇઆઇ)એ માર્ચમાં અત્યાર સુધીમાં ભારતીય બજારમાંથી રૂ.૩૭,૯૭૬ કરોડ પાછા ખેંચી લીધા છે.