મહામારી / કોરોનાએ ભગવાનના દ્વાર પણ બંધ કરાવ્યા, 29મી માર્ચ પછી થશે મહા આરતી

• આજથી ચોટીલાનું ચામુંડા માતાજીનું મંદિર બંધ
• કોરોના વાયરસની સાવચેતી રૂપે કરવામાં આવ્યો નિર્ણય
• 29 માર્ચ સુધી શ્રદ્ધાળુઓ માટે ચોટીલાનું મંદિર બંધ
• માત્ર પૂજારી જ રાબેતા મુજબ મંદિરમાં કરશે આરતી

આજથી ચોટીલાનું ચામુંડા માતાજીના મંદિરને બંધ રાખવાનો નિર્ણય કરાયો છે. કોરોના વાયરસની સાવચેતીના ભાગરૂપે મંદિરને બંધ રાખવાનો નિર્ણય કરાયો. 29 માર્ચ સુધી શ્રદ્ધાળુઓ માટે ચોટીલાનું મંદિર બંધ રહેશે. જ્યારે માત્ર પૂજારી જ રાબેતા મુજબ મંદિરમાં આરતી કરશે. સંતો-મહંતો અને તંત્રના અધિકારીઓની બેઠક બાદ નિર્ણય કરાયો છે.

સ્વામિનારાયણ સંપ્રદાયના મંદિરોમાં કાર્યક્રમો રદ્દ

સાવચેતીના ભાગરૂપે મંદિરો તેમજ તીર્થસ્થાનોમાં પણ વિવિધ કાર્યક્રમો બંધ રાખવાની જાહેરાત કરાઇ છે. સ્વામિનારાયણ સંપ્રદાય દ્વારા રાજ્ય તેમજ વિદેશના મંદિરોમાં કાર્યક્રમો બંધ રાખવાની જાહેરાત કરાઇ છે.વડતાલ તાબા હેઠળના 15 મંદિરો, મણિનગર ગાદી સંસ્થાનના 30 મંદિરો, કાળુપુર તાબા હેઠળના 75 મંદિરો, બીએપીએસના 250 મંદિરો, કુમકુમ સ્વામિનારાયણ મંદિર તેમજ વિવિધ દેશોમાં આવેલા સ્વામિનારાયણ મંદિરોમાં રોજીંદા કાર્યક્રમો બંધ રહેશે.

ઈસ્કોને પણ પોતાના મંદિરોમાં કાર્યક્રમો રાખ્યા મોકૂફ

આ ઉપરાંત ઇસ્કોનના પણ અંદાજે 150 જેટલા મંદિરોના કાર્યક્રમો બંધ રાખવાની જાહેરાત કરવામાં આવી છે. સાથે જ મંદિરોમાં આયોજીત થનારા સભા સહિતના વિવિધ કાર્યક્રમો હાલ પૂરતા મોકૂફ રાખવામાં આવ્યા છે.

કોરોનાની ગુજરાતમાં શું છે સ્થિતિ

કોરોનાએ ભારત સહિત દુનિયાભરના દેશોમાં પ્રવેશ કરી હાહાકાર મચાવ્યો છે. ગુજરાતમાં ય સરકારે કોરોના ફેલાય તેની તકેદારીરૂપે જાહેરમાં થૂંકવા પર પ્રતિબંધ મૂક્યો છે.એટલું જ નહીં, જાહેરમાં થૂંકનારને રૂા.500 દંડ કરવા નક્કી કરાયુ છે. છેલ્લા એક દિવસમાં રાજ્યભરમાં જાહેરમાં થૂંકનારા પાસેથી રૂા.સાડા સાત લાખ દંડ ફટકારાયો છે. રાજ્ય સરકારે કોરોનાને લઇને સતર્કતા દાખવી છે ત્યારે અત્યાર સુધી કોરોનાનો એકેય પોઝીટીવ કેસ નોંધાયો નથી. પણ આજે વધુ છ શંકાસ્પદ કેસો નોધાયા છે. ગુજરાતમાં અમદાવાદ અને સુરત એરપોર્ટ પર અત્યાર સુધીમાં 363 ફલાઇટમાં કુલ 33,584 મુસાફરોનુ સ્ક્રિનીંગ કરાયું છે.કોરોનાગ્રસ્ત દેશોમાં કુલ 3820 મુસાફરો આવ્યા હતાં તે પૈકી 1282 લોકોએ ઓબર્ઝેવેશન પિરીયડ પૂર્ણ કરી લીધો છે.