ભારતની મોટી સોફ્ટવેર કંપની TCS ટાટા કન્સલ્ટન્સીએ ગુરુવારે જણાવ્યું હતું કે તેઓ કોરોના સંકટના આ સમયગાળામાં તેમના તોતિંગ 4.5 લાખ કર્મચારીઓના સ્ટાફને છુટા નહીં કરે. આ ઉપરાંત તેમણે એમ પણ જણાવ્યું હતું કે તેમણે જે 40000 નવા કર્મચારીઓને નોકરીનું કમિટમેન્ટ આપી દીધું છે તેમને પણ તેઓ નોકરીએ રાખી જ લેશે. જો કે તેમણે જણાવ્યું કે આ વર્ષે તેઓ કર્મચારીઓના પગારમાં વધારો નહીં કરે.
જેટલા નવા કર્મચારીઓને રાખ્યા હતા એ સૌને જોબ મળશે
નોંધનીય છે કે કંપનીએ માર્ચ ક્વાર્ટરમાં સારો નફો રળ્યો હતો પરંતુ આ નાણાંકીય વર્ષના શરૂઆતના બંને ક્વાર્ટરમાં કોરોના સંકટને લીધે ચાલી રહેલા વૈશ્વિક લોકડાઉન અને મંદીના પગલે કંપનીની આવકમાં ઘટાડો થયો છે. TCSના MD અને CEO રાજેશ ગોપીનાથને મોડિયા સાથેની વાતચીતમાં કહ્યું હતું કે અમે જેટલા કર્મચારીઓને નવી જોબ ઓફર કરી હતી તે વચનને અમે પાળીશું અને તેમને જોબ માટે ઇન્કાર નહીં કરીએ.
કંપનીના માનવ સંસાધન વિભાગના મિલિંદ લક્કડે કહ્યું હતું કે કંપનીએ 40000 ફ્રેશર્સને આ વર્ષે નોકરી ઉપર રાખ્યા છે. આ તમામ લોકોની નોકરી ટકાવવામાં આવશે. મોટાભાગે કોલેજ અને યુનિવર્સીટી જૂન મહિના સુધી ચાલુ હોય છે અને ત્યાર બાદ આ સ્નાતકોને જોઇનિંગ આપવામાં આવશે.
આ વર્ષે કર્મચારીઓના પગાર વધારાને હાલ પૂરતો સ્થગિત કરવામાં આવ્યો છે
જો કે આ સાથે કર્મચારીઓ માટે ખરાબ સમાચાર આપતા લક્કડે એમ પણ ઉમેર્યું હતું કે આ વર્ષે કર્મચારીઓના પગાર વધારાને હાલ પૂરતો સ્થગિત કરવામાં આવ્યો છે. તેમણે કહ્યું કે કંપનીએ આ વખતે પગાર વધારો કરવાનું માંડી વાળ્યું છે. ગોપીનાથને કહ્યું કે કંપનીનો એટ્રીબ્યુશન રેટ 12.1% છે જે આ ઇન્ડસ્ટ્રીમાં ખૂબ સારો છે અને કંપની અને કર્મચારીઓ બંને આ સંકટના સમયમાં એકબીજાને સાચવવા માટે પ્રતિબદ્ધ છે.
વર્ક ફ્રોમ હોમથી પ્રોડક્ટિવિટીમાં વધારો થયો છે
કંપનીના ચીફ ઓપરેટિંગ ઓફિસર N ગણપતિ સુબ્રમણ્યમે જણાવ્યું હતું કે અત્યારે કંપનીના 3.55 લાખ કર્મચારીઓ ભારતમાં કામ કરી રહ્યા છે અને તેમાંથી 90% કર્મચારીઓ અત્યારે સુરક્ષિત વર્કપ્લેસમાં કામ કરે છે જ્યાંથી તેઓ તેમના કલાયન્ટની જરૂરિયાતોને સંતોષી શકે.
તેમણે એમ પણ ઉમેર્યું કે કંપનીએ નોંધ્યું છે કે કર્મચારીઓ વર્ક ફ્રોમ હોમ કરી રહ્યા છે તેમાં તેમની પ્રોડક્ટિવિટીમાં વધારો થયો છે. તેમણે એમ પણ જણાવ્યું હતું કે વર્ક ફ્રોમ હોમ અને ઓફિસના એક જ આંગણામાં સાથે બેસીને કામ કરવાથી શું શું તફાવત આવી રહ્યા છે તેના વિષે કંપની નોંધ કરી રહી છે. આ રિસર્ચ ભવિષ્યમાં ઉપયોગી થશે તેવી આશા છે.