દુનિયામાં કોરોના દર્દીઓનો આંકડો ૬.૪૮ કરોડને પાર થઇ ગયો છે. ૪,૫૩,૦૦,૦૦૦થી વધુ લોકો રિકવર થઇ ચૂક્યા છે. અત્યાર સુધી ૧૫,૧૧,૦૦૦થી વધુ લોકો જીવ ગુમાવી ચૂક્યા છે.
ફ્રાંસ જેવા યુરોપીય દેશોમાં સંક્રમણ ઘટ્યું છે તો ઇટાલી આ બાબતમાં પાછળ રહી ગયું છે. અહીં સંક્રમણ વધ્યું છે અને મૃત્યુઆંક પણ. ગુરુવારે એક જ દિવસમાં ૯૯૩ લોકોનાં મોત થયાં છે.
એક જ દિવસમાં ૯૯૩ લોકો મૃત્યુ પામ્યા
ઇટાલીમાં ગુરુવારે સંક્રમણની પરેશાન કરનારી તસવીર સામે આવી છે. અહીં એક જ દિવસમાં ૯૯૩ લોકો મૃત્યુ પામ્યા છે. દેશની હોસ્પિટલોમાં હાલત ખરાબ થઇ રહી છે. મોટા ભાગની હોસ્પિટલોમાં જો એ જ હાલત રહેશે તો મેકશિફ્ટ વોર્ડ બનાવવા પડશે. ઇટાલી સરકારે કડકાઇ બતાવવાની શરૂ કરી દીધી છે.
ક્રિસમસ અને ન્યૂ યર પર અડધી રાતે થતી પાર્ટીઓ નહીં થાય
વડા પ્રધાન ગિસેપ કોન્ટેએ કહ્યું કે ક્રિસમસ અને ન્યૂ યર પર અડધી રાતે થતી પાર્ટીઓ નહીં થાય. એક શહેરથી બીજા શહેર સુધી યાત્રા નહીં કરી શકે. પીએમએ કહ્યું કે મહામારી શરૂ થયા બાદ એક દિવસમાં સૌથી વધુ મૃત્યુ થયાં છે. અમે કોઇ પણ પ્રકારની ઢીલ ન આપી શકીએ. નવા પ્રતિબંધ હેઠળ માત્ર વર્કર્સને ક્યાંક આવવા-જવાની મંજૂરી અપાશે.
જો બિડેન શપથ લીધા બાદ અમેરિકી લોકોને ૧૦૦ દિવસ સુધી માસ્ક લગાવવાની અપીલ કરશે
એવું માનવામાં આવી રહ્યું છે કે અમેરિકાના પ્રેસિડેન્ટ ઇલેક્ટ જો બિડેન શપથ લીધા બાદ અમેરિકી લોકોને ૧૦૦ દિવસ સુધી માસ્ક લગાવવાની અપીલ કરશે. આ અંગે તેમની કેમ્પેન ટીમ રણનીતિ બનાવી રહી છે. અમેરિકામાં કોરોનાના કેસ વધી રહ્યા છે. અહીં મૃત્યુઆંક પણ ઘટ્યો નથી. કમલા હેરિસ પણ કહી ચૂક્યાં છે કે દેશના લોકોએ એકજૂટ થઇ મહામારીનો સામનો કરવો પડશે. બ્રિટનમાં ખૂબ જ જલદી વેક્સિનને મંજૂરી આપવાને લઇ કેટલાક નેતાઓએ સવાલ ઉઠાવ્યા છે. બ્રિટન સરકારે બે દિવસ પહેલાં ફાઇઝર વેક્સિનને મંજૂરી આપી હતી.