દેશમાં કોરોના વાયરસે હાહાકાર મચાવ્યો છે. તો કોરોનાના વધતા સંક્રમણને અટકાવવા માટે થઇને સરકાર દ્વારા લૉકડાઉનની જાહેરાત કરવામાં આવી છે. આ સાથે જ વહિવટી તેમજ પોલીસ તંત્ર દ્વારા તેનો કડક અમલ કરાવવામાં આવી રહ્યો છે તેમજ 144ની કલમનું પણ પાલન કરાવવામાં આવી રહ્યું છે જો કે, રાજ્યના પોલીસ વડા દ્વારા એક પરિપત્ર બહાર પાડીને ફરજ બજાવતા મીડિયાકર્મીઓને તથા મેડિકલ કર્મચારીઓને આઇકાર્ડ ચેક કરીને જવા દેવા માટે રાજ્યની પોલીસને જાણ કરવામાં આવી છે જો કે,કેટલાક સ્થળે પોલીસ વડાનો આ પરિપત્ર ઘોળીને પી જવાયો હોય તેવી ઘટના બની રહી છે.
કોરોનાના કહેર વચ્ચે સુરેન્દ્રનગર તથા સુરતમાં મીડિયાકર્મી સાથે પોલીસનું ગેરવર્તન
વાહનના તમામ કાગળ હોવા છતાં ફટકાર્યો દંડ
સુરેન્દ્રનગરના એક મીડીયા કર્મી યુવકની પાસે મીડીયાનું કાર્ડ તેમજ બાઈકના જરૂરી તમામ કાગળો જેવા કે, લાયસન્સ, આર.સી.બુક, વિમાના કાગળો હોવા છતાં સુરેન્દ્રનગર ખાતે આવેલ જુની હાઉસીંગ નજીક પેટ્રોલીંગ કરતા એલ.સી.બી.ના કર્મચારીઓએ યુવકને તેમની જ ઓફિસ પાસે રોકી કોઈપણ જાતની રજુઆત સાંભળ્યા વગર ડોકયુમેન્ટ હોવા છતાં બાઈકને ડિટેઈન કરી 2800 રૂપિયા જેટલી મોટી રકમનો મેમો ફટકારીને શહેરના બી-ડીવીઝન પોલીસ મથકે લઈ ગયા હતા, આ સાથે ઇરાદાપૂર્વક ગેરવર્તન કર્યું હતું.
સુરેન્દ્રનગરના મીડિયાકર્મીને 2800નો મેમો ફટકાર્યો
નોંધનીય છે કે, સુરેન્દ્રનગર એલ.સી.બી પોલીસની મીડિયાકર્મી સાથે ગેરવર્તણૂક કરવાની ઘટનાને પગલે જિલ્લાના પત્રકારોમાં રોષ જોવા મળ્યો હતો આ ઘટનાને લઇને પ્રિન્ટ તથા ઇલેક્ટ્રોનિક મીડિયાકર્મીઓએ જિલ્લા કલેક્ટર તથા પોલીસ વડા સહિત રાજ્યના ગૃહમંત્રી સહિતના પદાધિકારીઓને લેખિતમાં રજૂઆત કરી હતી.
સુરતમાં પણ મીડિયાકર્મીનું વાહન ડિટેઇન કરાઇ ફટકારાયો દંડ
આ તરફ સુરતમાં પણ આવી જ એક ઘટના બનવા પામી હતી. સુરતના એક મીડિયાકર્મી રિપોર્ટિંગ કરવા બહાર નીકળતા તેમનું વાહન અટકાવીને સ્થાનિક પોલીસ અધિકારીઓ તેમની સાથે પણ ગેરવર્તન કર્યું હતું. જો કે, યુવકે પોતે મીડિયાકર્મી હોવાનું કાર્ડ બતાવ્યું તેમ છતાં પણ તેમના અન્ય ડોક્યુમેન્ટ માંગ્યા હતા. આ દસ્તાવેજો ન ચાલે તેનો રોફ બતાવીને મીડિયાકર્મીનું વાહન જમા કરીને મેમો ફટકાર્યો હતો. નોંધનીય છે કે, રાજ્યના પોલીસ વડાએ જ્યારે એક પરિપત્ર બહાર પાડીને મીડિયાકર્મીઓને પોતાની ફરજ બજાવવા દેવા માટે પોલીસને સૂચન કર્યું છે તેમ છતાં આ પ્રકારની ઘટનાઓ પોલીસવડાના આદેશને લાંછન લગાડનારી છે.