ભારતમાં સતત વધી રહેલા કોરોના વાયરસના કેસ વચ્ચે હવે મિશિગન યુનિવર્સિટીની એક રિપોર્ટે ચિંતા વધારી છે.
ભારતમાં કોરોના વાયરસ હજુ વિકરાળ બનશે : રિપોર્ટ
યુપી, બિહાર અને બંગાળ ટાઈમ બોમ્બ પર બેઠા છે : રિપોર્ટ
ફેબ્રુઆરીમાં જ સમયસૂચકતા દાખવવાની જરૂર હતી : રિપોર્ટ
ભારતમાં કોરોના વાયરસના કારણે પરિસ્થિતિ દિવસેને દિવસે ખરાબ થઈ રહી છે અને મહારાષ્ટ્ર, પંજાબ., છત્તીસગઢ અને ગુજરાત જેવા રાજ્યોમાં લૉકડાઉન જેવા પ્રતિબંધો લગાવી દેવામાં આવ્યા છે ત્યારે એક ચિંતાજનક રિપોર્ટ સામે આવી છે.
સરકારે ફેબ્રુઆરી મહિનામાં મોટા ભાગનો સમય ગુમાવી દીધો
મોટા ભાગના નિષ્ણાતોનું માનવું છે કે મે મહિનામાં કોરોના વાયરસનો પિક આવશે ત્યારે એક નવા રિપોર્ટમાં દાવો કરવામાં આવ્યો છે કે મે મહિનામાં ભારતમાં દૈનિક મોતનો આંક સાડા ચાર હજારની આસપાસ જઈ શકે છે અને દરરોજ 8થી 10 લાખ કેસ સામે આવી શકે છે. મિશિગન યુનિવર્સિટીના નિષ્ણાત ભ્રમર મુખર્જીનું કહેવું છે કે ફેબ્રુઆરી મહિનામાં જ કોરોનાએ પોતાનો રંગ બતાવવાનો શરૂ કરી દીધો હતો છતાં તેને ગંભીરતાથી લેવામાં આવ્યા નહીં.
ભ્રમર મુખર્જીનું માનીએ તો જૉ આ વર્ષે જ વેક્સિનેશન કરવાની પ્રક્રિયામાં તેજી લાવી દેવામાં આવી હોત તો કદાચ મહામારીનું આ રૂપ જોવા મળ્યું ન હોત. તેમણે કહ્યું કે આપણે ખૂબ બધો સમય ગુમાવી દીધો અને કોરોના વાયરસને રોકવાના બે જ ઉપાય છે.
મહામારીથી બચવાના માત્ર બે જ ઉપાય છે
ભ્રમર મુખર્જીએ કહ્યું કે મહામારીને રોકવાના બે જ ઉપાય છે, વેક્સિન અથવા લૉકડાઉન. લૉકડાઉન સ્થાયી સોલ્યુશન નથી અને આખી દુનિયાએ લૉકડાઉનના પરિણામ જોઈ લીધા છે અને ભારત જેવા વિશાળ દેશમાં કોરોના વાયરસે અત્યારે વિકરાળ રૂપ ધારણ કરી લીધો છે. મિશિગન યુનિવર્સિટીની રિપોર્ટમાં કહેવામાં આવ્યું છે કે સવા અબજની વસ્તી વાળા દેશમાં વેક્સિન આપવી એ ખૂબ જ અઘરું કામ છે અને એવામાં લોકોએ જાતે જ પોતાનો બચાવ કરવો પડશે.
મોટા રાજ્યો બેઠા છે ટાઈમ બોમ્બ પર
ભ્રમર મુખર્જીએ ટ્વિટર પર કહ્યું કે યુપી, બિહાર, બંગાળ જેવા મોટા રાજ્યો તો ટાઈમ બોમ્બ પર બેઠા છે અને અહિયાં કોરોના વાયરસના વિસ્ફોટને કોઈ નહીં રોકી શકે. તેમણે કહ્યું કે ફેબ્રુઆરીમાં જ્યારે દરરોજ 11 હજાર કેસ અને 91 મોત થઈ રહી હતી ત્યારે 9 સપ્તાહ તો સરકારે માત્ર અનુમાન કરવામાંઆ જ કાઢી દીધા. કોરોના વાયરસ બધાને ઘેરી ચૂક્યો અને હવે આ મહામારીથી બચવા માટે એક જ ઉપાય છે અને તે છે વેક્સિનેશન.
ભારતમાં કોરોના વાયરસની સુનામી
માર્ચ મહિનાથી ભારતમાં કોરોના વાયરસના કેસમાં અચાનક જ ઉછાળો જોવાં મળ્યો હતો અને તે બાદ સતત કેસ વધી રહ્યા છે. દેશની હોસ્પિટલો ઉભરાઇ ગઈ છે અને લોકો સારવાર વિના જ દમ તોડી રહ્યા છે. ઈન્જેક્શનો અને ઑક્સીજન ખૂટી પડ્યું છે અને હાલત એ છે કે હવેથી સ્મશાનોમાં જગ્યા નથી અને લાકડાઓ ખૂટી રહ્યા છે.
ભારતમાં કોરોના વાયરસના કેસમાં સતત વધારો જોવા મળી રહ્યો છે ત્યારે આજે 3,79,257 નવા કેસ સામે આવ્યા છે. છેલ્લા 24 કલાકમાં દેશમાં 3645 લોકોએ કોરોના વાયરસના કારણે જીવ ગુમાવતાં હાહાકાર જેવી સ્થિતિ છે. જોકે રાહતની વાત કહી શકાય કે 2,69,507 દર્દીઓ કોરોનાને હરાવીને સાજા પણ થયા છે.