દેશભરમાં કોરોના વાયરસની મહામારીનો પ્રકોપ જોવા મળી રહ્યો છે. કોરોનાને લઇને દેશમાં લોકડાઉન3 જાહેર કરવામાં આવ્યું છે. ત્યારે લોકડાઉનના ત્રીજા તબક્કામાં કેન્દ્ર દ્વારા કેટલીક રાહત પણ આપવામાં આવી છે. પરપ્રાંતિયોને પોતાના વતન મોકલવાને લઇને કેન્દ્ર સરકારે એડવાઇઝરી જાહેર કરી છે. રાજકોટમાં સતત બે દિવસથી પરપ્રાંતિઓનો વતન જવાને લઇને હોબાળા જોવા મળી રહ્યો છે. આજે શહેરના ગોંડલ ચોકડી ખાતે શ્રમિકો પોતાના વતન જવાની માગ સાથે એકઠા થયા હતા. જો કે એક સવાલ એ પણ થાય છે કે આટલા બધા શ્રમિકો એકસાથે આવ્યાં ક્યારે હશે? આમ, રાજ્યના મુખ્યમંત્રી વિજય રૂપાણીના વતનમાં સતત બે દિવસથી પરપ્રાંતિયો દ્વારા વતનમાં જવાને લઇને હોબાળો કરી રહ્યાં છે.
રાજકોટમાં આજે પણ બિન ગુજરાતી શ્રમિકો ભેગા થયા
ગોંડલ ચોકડી ખાતે શ્રમિકો થયા હતા એકઠા
બિન ગુજરાતીઓને મુશ્કેલી પડી રહી હોવાનો શ્રમિકોનો આરોપ
રાજકોટ શહેરમાં સતત છેલ્લા બે દિવસથી પરપ્રાંતિયો પોતાના વતન જવાની માગ સાથે એકઠા થઇ રહ્યાં છે. આજે શહેરની ગોંડલ ચોકડી ખાતે શ્રમિકો પોતાના વતન જવાની માગ સાથે એકઠા થયેલા જોવા મળ્યા. જો કે પોલીસને જાણ થતાં ઘટનાસ્થળે પહોંચી શ્રમિકોને અપીલ કરતાં શ્રમિકોનો રોષ શાંત થયો હતો.
રાજકોટમાં ગોંડલ ચોકડી પાસે એકઠા થયેલા શ્રમિકોએ બિન ગુજરાતીઓને મુશ્કેલી પડીરહી હોવાનો આરોપ લગાવ્યો. યુપી, બિહારના બિન ગુજરાતીઓને ભોજન નથી મળી રહ્યું એવું પણ જણાવ્યું. જ્યારે બિન ગુજરાતીઓ પાસે હવે દવાના રૂપિયા પણ રહ્યાં નથી.
જો કે આ અંગેની જાણ થતાં પોલીસ ઘટનાસ્થળે પહોંચી ગઇ હતી. પોલીસ દ્વારા 2 કે 3 દિવસ રાહ જોવાની શ્રમિકોને અપિલ કરતાં મામલો થાળે પડેલો જોવા મળ્યો. આમ પોલીસના આશ્વાસન બાદ શ્રમિકોનો રોષ શાંત થયો. પોલીસે શ્રમિકોને જણાવ્યું કે ધીમે-ધીમે કરીને શ્રમિકોને વતન મોકલાશે. વહીવટી તંત્ર પણ તમને વતન મોકલવાના પ્રયત્નો કરી રહ્યું છે.
પોલીસકર્મીએ પ્રતિક્રિયા આપી છે કે, શ્રમિકોના મેડિકલ અને મંજૂરીની વ્યવસ્થા ઝડપી કરાશે. આ તમામ શ્રમિકોની યાદી તૈયાર કરીને રાજકોટથી ચાલુ થયેલી ટ્રેનમાં તમામને મોકલવામાં આવશે.
સળગતા સવાલ
બિનગુજરાતી લોકો માટે કોઈ વ્યવસ્થા કેમ કરાતી નથી?
બિનગુજરાતી માટે તંત્રએ અત્યાર સુધી કેમ કામગીરી ન કરી?
લોકોને સમય આપીને કેમ બોલાવવામાં આવતા નથી?
શ્રમિકોને ભોજન અને દવાની પણ વ્યવસ્થા કેમ નથી કરાતી?
કંપનીના માલિકોએ પણ હાથ અધ્ધર કર્યા છે ત્યારે સરકાર શું કરે છે?
સરકારની જાહેરાત બાદ તંત્ર કેમ કામગીરી કરતા તૈયાર નથી?