કેરળ સ્થિત એક કંપનીએ સોમવારે કહ્યું કે તેણે કોરોના વાયરસ (Coronavirus)ની વિરુદ્ધ દુનિયાભરમાં જારી લડાઇમાં સહકાર આપવા માટે સર્જિકલ મોજાની 35 લાખ જોડી સર્બિયા મોકલી છે. કોચ્ચી આંતરરાષ્ટ્રીય એરપોર્ટના પ્રવક્તાએ કહ્યું કે 90,385 કિલોગ્રામ વજન ધરાવતા આ સર્જિકલ મોજાની જોડીઓને 7,091 ડબાઓમાં ભરીને બોઇંગ 747 માલવાહક વિમાનથી સર્બિયાની રાજધાની બેલગ્રેડ મોકલવામાં આવી છે.
દુનિયાભરમાં કોરોના વાયરસથી 40,000થી વધારે લોકોના મોત થયા છે
પ્રવક્તાએ કહ્યું કે નિકાસકાર કંપનીનું નામ સેન્ટ મેરીઝ રબર્સ લિમિટેડ છે. નોંધનીય છે કે સર્બિયામાં અત્યાર સુધીમાં લગભગ 500 લોકો કોવિડ 19થી સંક્રમિત જોવા મળ્યા છે. જ્યારે 7 લોકોના મોત થયા છે. સર્બિયામાં કોરોના વાયરસ (Coronavirus)નો પહેલો કેસ માર્ચના પહેલા સપ્તાહમાં સામે આવ્યો હતો.
કેરળ ખુદ આ વાયરસની ગંભીર ઝપેટમાં છે. ત્યાં અત્યાર સુધીમાં કોરોના વાયરસના 241 કેસ નોંધાયા છે. પરંતુ સંકટના આ સમયમાં પણ કેરળ બીજા દેશોને મદદ કરી રહ્યું છે. દુનિયાભરમાં કોરોના વાયરસથી 40,000થી વધારે લોકોના મોત થયા છે. જ્યારે તેનાથી સંક્રમણના કેસની સંખ્યા 8 લાખની આસપાસ પહોંચી ગઇ છે. આ બીમારીથી જેટલા લોકોના મોત થયા છે તેમાંથી બે તૃતિયાંશ યૂરોપમાં છે.
ચીનમાં ડિસેમ્બરમાં કોરોના વાયરસ મહામારી સામે આવ્યા બાદ 183 દેશો અને ક્ષેત્રોમાં આ વાયરસથી સંક્રમણના લાખો કેસ સામે આવ્યા છે. જેમાંથી લગભગ 1 લાખ 40 હજાર લોકો સ્વસ્થ થઇ ચૂક્યા છે.