મોટું નિવેદન / ભારતભરમાં કોરોનાના કેસ વધવા પાછળ કોણ છે જવાબદાર? ડૉ. રણદીપ ગુલેરિયાએ જણાવ્યું કારણ

• દેશમાં ફરી વધી રહ્યા છે કોરોના વાયરસના કેસો
• બુધવારે નોંધાયા કોરોનાના 1134 નવા કેસ
• એક્ટિવ દર્દીઓની સંખ્યામાં પણ થયો વધારો

ઓલ ઈન્ડિયા ઈન્સ્ટિટ્યૂટ ઑફ મેડિકલ સાયન્સ (AIIMS) દિલ્હીના પૂર્વ ડાયરેક્ટર ડૉ. રણદીપ ગુલેરિયાએ બુધવારે જણાવ્યું હતું કે કોરોના વાયરસનો નવો વેરિઅન્ટ XBB.1.16 આ સમયે સંક્રમણના કેસમાં વૃદ્ધિ માટે જવાબદાર હોઈ શકે છે, પરંતુ ગભરાવાની જરૂર નથી, કારણ કે આનાથી ગંભીર બીમારી અથવા મૃત્યુનો કોઈ ખતરો નથી. ગુલેરિયાએ એક ઈન્ટરવ્યુમાં કહ્યું, "નવા વેરિઅન્ટ આવતા રહેશે, કારણ કે સમયની સાથે વાયરસના નવા રૂપ આવતા રહે છે અને XBB.1.16 એક રીતે આ જૂથનો નવો સભ્ય છે."

PM મોદીએ પણ બોલાવી હતી ઉચ્ચ સ્તરીય બેઠક
નેશનલ કોવિડ ટાસ્ક ફોર્સનના સભ્ય રહી ચૂકેલા રણદીપ ગુલેરિયાએ જણાવ્યું હતું કે, "જ્યાં સુધી વાયરસના આ વેરિઅન્ટથી ગંભીર બીમારી, હોસ્પિટલમાં દાખલ થવાની સ્થિતિ અને મૃત્યુનો જોખમ નથી, ત્યાં સુધી તે ઠીક છે." રણદીપ ગુલેરિયાએ આ વાત એવા સમયે કહી જ્યારે વડાપ્રધાન નરેન્દ્ર મોદીએ બુધવારે દેશમાં કોવિડની સ્થિતિની સમીક્ષા કરવા માટે ઉચ્ચ સ્તરીય બેઠક બોલાવી હતી. કેન્દ્રીય સ્વાસ્થ્ય મંત્રાલયના બુધવારના આંકડા અનુસાર, ભારતમાં કોરોના વાયરસના 1,134 નવા કેસ નોંધાયા છે, જે છેલ્લા 138 દિવસમાં સૌથી વધુ છે, જ્યારે એક્ટિવ દર્દીઓની સંખ્યા વધીને 7,026 થઈ ગઈ છે.

'વાયરસ સ્થિર થઈ ગયો છે'
ડૉ. ગુલેરિયાના જણાવ્યા અનુસાર, વાયરસ સમય સાથે પરિવર્તિત થાય છે અને આ કોવિડ અને ઈન્ફલ્યુએન્ઝા બંનેની સાથે થાય છે. તેમણે કહ્યું હતું કે, “આપણે યાદ કરીએ કે જ્યારે કોવિડનો પ્રકોપ શરૂ થયો હતો ત્યારે તે આલ્ફા, બીટા, ગામા, ડેલ્ટા અને ઓમિક્રોન સ્વરૂપો સાથે થયો હતો. આ રીતે વાયરસ બદલાતો રહ્યો. જો આપણે છેલ્લા એક વર્ષ પર નજર કરીએ તો આવા વેરિઅન્ટ સામે આવ્યા છે જે ઓમિક્રોનના જ સબ-વેરિઅન્ટ છે. તેથી એવું લાગે છે કે વાયરસ અમુક અંશે સ્થિર થઈ ગયો છે અને ભૂતકાળની જેમ ઝડપથી બદલાઈ રહ્યો નથી.''

નવી લહેર આવવાની શક્યતા ઓછી
ગુલેરિયાએ કહ્યું કે, "તમે કેસોમાં વધારો જોઈ શકો છો, પરંતુ બની શકે છે કે તે સામે જ ન આવે કારણ કે શરૂઆતમાં લોકો ખૂબ જ સાવચેત હતા અને ટેસ્ટ કરાવતા હતા." તેમણે કહ્યું હતું કે, "હવે તાવ-શરદી-ખાંસીના લક્ષણો હોવા છતાં પણ મોટાભાગના લોકો ટેસ્ટ કરાવતા નથી. કેટલાક લોકો રૈપીડ એન્ટિજેન ટેસ્ટ કરાવે છે અને સંક્રમણની પુષ્ટિ થયા પછી પણ તેના વિશે જણાવતા નથી." ડૉ. ગુલેરિયાએ સલાહ આપી કે જે લોકોનો કોરોના ટેસ્ટ રિપોર્ટ પોઝિટિ આવે તેવા લોકોએ જાણકારી આપવી જોઈએ, જેનાથી સરકારને કેસની વાસ્તવિક સંખ્યા જાણવામાં અને તે મુજબ વ્યૂહરચના બનાવામાં મદદ મળે.