કોરોનાના કાળા કહેરે ગુજરાતનાં ચાર શહેરોને બાનમાં લીધા છે. વડોદરામાં 36 દિવસનાં 166 કેસ નોંધાયા છે જ્યારે 16 લોકોના મોત થયા છે. કોરોના બીજા સ્ટેજમાંથી નીકળી ત્રીજા સ્ટેજમાં પ્રવેશી રહ્યો હોવાથી આવનાર સમયમાં કોરોના વાયરસ મોટા પાયે કોમ્યુનિટી સ્પ્રેડીંગમાં પ્રવેશી શકે છે. આ વચ્ચે રાજ્ય સરકારે ચાર મહાનગરોની સ્થિતિ સંભાળવા સચિવ કક્ષાનાં અધિકારીઓને ઓન સ્પેશિયલ ડ્યુટી (OSD)માં મુક્યા છે.
OSD વિનોદ રાવના વડપણમાં વડોદરા તંત્રએ થ્રી લેયર પ્લાન બનાવ્યો
સિનિયર ડૉક્ટરો મેડિકલ સ્ટુડન્ટને ટ્રેનિંગ આપવાની શરૂઆત કરી
જિલ્લાની તમામ મેડિકલ અને પેરામેડિકલ કોલેજના સ્ટુડન્ટને સ્ટેન્ડ ટુ કરાયા
વડોદરાની જવાબદારી વિનોદ રાવે ફાળે આવી છે. OSD વિનોદ રાવે વડોદરાની કોરોના અંગેની પરિસ્થિતિનો તાગ લઈ ‘થ્રી લેયર’ એક્શન પ્લાન બનાવ્યો છે. વડોદરા કોર્પોરેશન, આરોગ્ય વિભાગ અને જિલ્લા કલેક્ટર કચેરી વિનોદ રાવના વડપણમાં આ પ્લાનને એક્ઝિક્યુટ કરશે. ખાસ કરી તંત્રએ 2 હજારથી વધુ મેડિકલ અને પેરામેડિકલ કોલેજના સ્ટુડન્ટને કોવિડ આર્મી તરીકે તૈયાર કરી રહી છે.
વડોદરા સરકારી તંત્ર MS મેડિકલ કોલેજ સહિત જિલ્લાની અન્ય તમામ મેડિકલ, ડેન્ટલ અને ફાર્મસી કોલેજના વિદ્યાર્થીઓને કોવિડ આર્મી તરીકે તૈયાર કરી રહી છે. સરકારી હોસ્પિટલના સિનિયર ડૉક્ટરો દ્વારા તેમને ટ્રેનિંગ અપાઈ રહી છે.
આવનાર કોઈ પણ કપરી પરિસ્થિતિમાં પહોંચી વળવા આ કોવિડ આર્મી તૈયાર કરાય છે. આ ઉપરાંત હાલમાં ફરજ બજાવતાં રેસિડેન્ટલ ડૉક્ટરો ભુલ ના કરે અને ખુબ સારી રીતે ડ્યુટી કરે એટલે સિનિયર ડૉક્ટરો અને પ્રોફેસરો તાલીમ આપી રહ્યા છે.