ભારત દેશ અત્યારે કોરોનાની મહામારી સામે લડી રહ્યો છે. દેશના પ્રધાનમંત્રીએ પણ સમયસૂચકતા દાખવીને દેશમાં 22 માર્ચથી લોકડાઉન લાગુ કરી દીધું છે જેથી કોરોનાનો ચેપ આગળ ફેલાતો અટકી શકે. પ્રધાનમંત્રીના નિર્ણયનું પાલન કરાવવા માટે સરકારી તંત્ર પણ ખૂબ જહેમત ઉઠાવી રહ્યું છે અને ખાસ કરીને શહેરમાં લોકડાઉનનું કડક અમલીકરણ થઈ રહ્યું છે. પરંતુ ગુજરાતમાં એક ગામ એવુ પણ છે જ્યા જનતા કર્ફ્યૂના દિવસથી જ લોકડાઉનનું કડક પાલન થઈ રહ્યું છે અને તે આદર્શ રીતે કોરોના સામે લડી રહ્યું છે. જાણો ક્યું છે આ ગામ અને કેવી છે તૈયારી...
કોરોનાને માત આપતું ગામ
સ્વયં શિસ્ત, સ્વયંભૂ નિયમોનું પાલન
કોઈ તંત્ર નહીં, સ્વૈચ્છાએ સહકાર
જૂનાગઢ જિલ્લાના વિસાવદર તાલુકામાં આવેલું પ્રેમપરા ગામ. ગીરનું તોરણ મનાતા આ ગામની વસતી અંદાજિત 6 હજારને આસપાસ છે પરંતુ આ ગામમાં પ્રધાનમંત્રીના સંદેશાનું ખાસ અમલીકરણ કરવામાં આવી રહ્યું છે. પ્રધાનમંત્રીએ દીપક કે ફ્લેશલાઇટની રોશની કરીને એકતાનો સંદેશ આપવાની વાત કરી હતી ત્યારે આ ગામે પણ દીપ પ્રાગટ્ય કર્યું હતું. માત્ર દિવા પ્રગટાવવા પુરતું જ નહીં પરંતુ પ્રધાનમંત્રીએ કરેલી એક એક જાહેરાતનું આદર્શ રીતે પાલન થઈ રહ્યું છે. દેશમાં લોકડાઉનની શરૂઆત થઈ તેના પહેલા જ અહી લોકડાઉન લગાવી દેવામાં આવ્યું હતું. ગામના સરપંચે નોટિસ જાહેર કરીને ગામને લોકડાઉન કરી દીધુ અને બહારથી આવનારા તમામ લોકોને ફરજીયાત હોમ ક્વોરેન્ટાઇન કરવાની સુચના આપી દીધી.
ઘરે ઘરે જઈને જરૂરિયાત મંદોને ફૂડ પેકેટનું વિતરણ
લોકડાઉનની સ્થિતિમાં ગામમાં કોઈ ભૂખ્યું ન રહે તે માટે ખાસ વ્યવસ્થા કરવામાં આવી અને પ્રથમ દિવસથી જ ગ્રામ પંચાયત તથા સેવાભાવી લોકોના સહકારથી ફૂડ પેકેટ બનાવવાની શરૂઆત કરી દેવામાં આવી. ગામના યુવાનોએ ઘરે ઘરે જઈને જરૂરિયાત મંદોને ફૂડ પેકેટનું વિતરણ કરવાનું શરૂ કરી દીધુ.
આ સાથે જ પંચાયત અને આરોગ્ય વિભાગે ગામમાં દરેક ઘરમાં મુલાકાત કરીને તેમના સ્વાસ્થ્ય અંગેની જાણકારી પણ એકત્રિત કરી. આરોગ્યકર્મીઓએ વારંવાર એકએક ઘરમાં જઈને હેલ્થની કાળજી લીધી અને જાગૃત્તિ માટેના કાર્યક્રમો શરૂ કરી દીધા છે. જેવી રીતે કેબિનેટમાં તમામ પાસાઓની ચર્ચા થાય છે તેવી રીતે આ ગ્રામ પંચાયતમાં પણ રોજની કામગીરીનો રિવ્યુ કરવામાં આવે છે. એટલે કે પંચાયત ઓફિસમાં ગ્રામના અગ્રણીઓ એકઠા થઈને કોરોનાથી બચવાની રણનીતિ બનાવે છે.
જરૂરીયાતમંદ લોકોને વ્યાજબી ભાવના અનાજ વિતરણ
ગામમાં જરૂરીયાતમંદ લોકોને અનાજનો પુરવઠો મળી રહે તે માટે વ્યાજબી ભાવના અનાજ વિતરણ સમયે પણ ખાસ વ્યવસ્થા કરવામાં આવી છે. અનાજ વિતરણ દરમિયાન પણ કોઈને એકબીજાથી ચેપ ન લાગે તે માટે મોટા ગ્રાઉન્ડમાં તેનું વિતરણ કરવામાં આવે છે અને ગ્રાહકો વચ્ચે અંતર રાખવામાં આવે છે. આ ઉપરાંત ગામને ડિસઇન્ફેક્ટેડ કરવા માટે ગામના ઉત્સાહિત યુવાનોની મદદથી દવાનો છંટકાવ કરવામાં આવે છે. આ માટે ખાસ જુગાડું મશીનરીની પણ વ્યવસ્થા કરવામાં આવી છે. જેની મદદથી સમગ્ર ગામમાં દવાનો છંટકાવ થાય છે.
ડ્રોન વડે સર્વેલન્સ, 400 લોકોને હોમ ક્વોરેન્ટાઇન કરવામાં આવ્યા
આપને જાણીને નવાઇ લાગશે કે શહેરોમાં પોલીસે છેલ્લા એક અઠવાડીયાથી ડ્રોન વડે સર્વેલન્સ શરૂ કર્યું છે. પરંતુ ગીરના જંગલો પાસે આવેલા આ પ્રેમપરા ગામમાં છેલ્લા ઘણા સમયથી ડ્રોનની મદદથી દેખરેખ રાખવામાં આવે છે. ગામમાં લોકડાઉનનું ચુસ્ત પાલન કરવામાં આવે છે. આ માટે પોલીસ વિભાગની પણ મદદ લઈને ગામમાં સતત પહેરેદારી કરવામાં આવી રહી છે જેથી કોઈ પણ ગ્રામજન બિનજરૂરી રીતે બહાર ન નિકળે. ગામમાં અન્ય રાજ્ય, દેશ કે શહેરમાંથી આવેલા 400 લોકોને હોમ ક્વોરેન્ટાઇન કરવામાં આવ્યા છે અને તેમના પર સતત નજર રાખવામાં આવી રહી છે. આરોગ્યકર્મીઓ દિવસમાં 3 વખત તેમની મુલાકાત લઈને રિપોર્ટ બનાવી રહ્યા છે.
ઘરેથી જ તહેવારોની પણ ઉજવણી
પ્રેમપરા ગામના ગ્રામજનો દ્વારા કોરોના સામે લડવા માટેની તમામ આર્દશ પદ્ધતિઓ અપનાવવામાં આવી રહી છે. તેમ છતા ગામમાં વિતરણ વ્યવસ્થા પણ યથાવત છે અને તેની સાથે કોઈ છેડા કરવામાં નથી આવ્યા. અહીં લોકડાઉન વચ્ચે ઘરેથી જ તહેવારોની પણ ઉજવણી થઈ છે. રામનવમીની પણ ઉજવણી કરીને બાળકોને બટુક ભોજનની કીટ પણ ઘરે પહોંચાડી છે. સરવાળે પ્રેમપરામાં લોકડાઉનનું ચૂસ્ત અમલીકરણ થઈ રહ્યું છે અને તેઓ કોરોના સામેની લડાઈમાં આદર્શ ગામનું ઉદાહરણ આપી રહ્યા છે.