કોરોના વાયરસે સમગ્ર વિશ્વમાં હાહાકાર મચાવ્યો છે, ત્યારે કોરોનાના કારણે ભારતમાં લોકડાઉન કરવામાં આવ્યું છે. પરંતુ લોકો હજુ પણ લોકડાઉનનું પાલન કરતા નથી અને બિનજરૂરી લોકો બહાર નીકળી રહ્યાં છે. ગુજરાતની વાત કરીએ તો આણંદ, મોરબી, છોટાઉદેપુર અને ભાવનગરમાં જાહેરનામાનો ભંગ થઇ રહ્યો છે. જો કે રાજ્યમાં જાહેરનામા ભંગ બદલ પોલીસ દ્વારા કડક કાર્યવાહી કરવામાં આવી રહી છે.
આણંદમાં શાકમાર્કેટમાં જાહેરનામાનો ભંગ
મોરબીના વાંકાનેરમાં ગેસ સિલિન્ડર માટે લાગી લાઇનો
આણંદમાં શાકમાર્કેટમાં જાહેરનામાનો ભંગ થયો છે, ત્યારે જાહેરનામાનો ભંગ કરતા 40 જેટલા વેપારીઓની ધરપકડ કરવામાં આવી છે.
જ્યારે મોરબીના વાંકાનેરમાં દિલીપ ગેસ એજન્સીમાં ગેસ સિલિન્ડર લેવા લોકોની લાંબી લાઇનો લાગી છે. ગેસ સિલિન્ડર લેવા આવેલા લોકોમાં સોશિયલ ડિસ્ટન્સિંગનો અભાવ જોવા મળ્યો હતો.
જ્યારે છોટાઉદેપુરના પાવી જેતપુરમાં પણ લોકડાઉનના નિયમોની ઐસીતૈસી કરવામાં આવી રહી છે. સ્ટેટ બેંકમાં પૈસા ઉપાડવા મહિલાઓ એકઠી થઇ છે. ત્યાં પણ સોશિયલ ડિસ્ટન્સિંગનો અભાવ જોવા મળ્યો છે. છોટા ઉદેપુર ખાતે પેન્શન અને જનધન દ્વારા મળતી સહાય ઉપાડવા લોકો પહોંચ્યા હતા.
આ તરફ ભાવનગર મનપા કમ્પાઉન્ડમાં સફાઇ કામદારો મોટી સંખ્યામાં પહોંચ્યા હતા. શહેરમાં પગાર લેવા આવેલા સફાઇ કામદારો વચ્ચે સોશિયલ ડિસ્ટન્સ જોવા મળ્યું ન હતું.