મહામારી / કોરોનાને હરાવવા પાંજરામાં પુરાયું ગુજરાતનું આ ગામ! બહાર નીકળનાર વ્યક્તિને ભોગવવો પડે છે રૂ.500નો દંડ

• કોરોનાને હરાવવા પાંજરામાં પુરાયું ગામ!
• યુવાનોએ સંભાળી ગામની કમાન 
• બહારના લોકો માટે ગામમાં પ્રતિબંધ 

ડભોઈ તાલુકામાં કોઠારા ગામ આવ્યું છે. જે ગામના નામમાં જ તેની સુરક્ષાનો સાર છુપાયેલો છે. કોઠારાનો અર્થ થાય છે પાંજરૂં. અને હાલ આ ગામ પણ પાંજરાંમાં જ પુરાયું છે. કારણ કે, ગામના યુવાનોએ કોરોનાને હરાવવાનું પ્રણ લીધું છે. ગામમાં કોરોનાને નો એન્ટ્રી છે. આજે આ ગામની ચર્ચા એટલા માટે કરવી જરૂરી છે કારણ કે, હાલ મુશ્કેલીના સમયે યુવાનોએ ગામની કમાન સાંભાળી છે અને ગામમાં આવવાના તમામ રસ્તાઓને સીલ કરી નાખ્યા છે. સાથે-સાથે ગામના લોકોને કોરોનાથી બચાવવા માટે પોતાના કડક નિયમ પણ બનાવ્યા છે. જેમાં કોઈપણ વ્યક્તિ કામ વગર ઘરની બહાર નિકળ્યો તો 500 રૂપિયા સુધીનો દંડ ફટકારવામાં આવે છે. તો બહારના વ્યક્તીઓને નો એન્ટ્રી પણ કરવામાં આવી છે.

ગામના યુવાનોએ લોકોને કોરોનાથી બચાવવા આવ્યા મેદાને 

ગામના યુવાનોએ લોકોને કોરોનાથી બચાવવા માટે ઉકાળા સહિતની આયુર્વેદીક દવાઓ તો ઘરે ઘરે પહોંચાડવાનું શરૂ કર્યું છે. પરંતુ તેની સાથે-સાથે કોઈપણ વ્યક્તિને શાકભાજીની જરૂર પડે તો તે પણ તેમના ઘર સુધી પહોંચાડવામાં આવે છે.. આ માટે એક વોટ્સએપ નંબર પણ જાહેર કર્યો છે. જેમાં ઓર્ડર પ્રમાણે, યુવાનો માર્કેટ જાય છે અને લોકો સુધી રોજ જરૂરી શાકભાજી સહિતની જીવન જરૂરી વસ્તુઓ પહોંચાડે છે. જેથી કરીને કોઈને ઘરની બહાર જ ન નિકળવું પડે.

યુવાનોએ ગામના દરેક ઘરને અને શેરીને જાત મહેનતે સેનેટાઇઝ પણ કર્યા

સૌથી મહત્વની બાબત તો એ છે કે, યુવાનોએ ગામના દરેક ઘરને અને શેરીને જાત મહેનતે સેનેટાઇઝ પણ કર્યા છે.. જેમાં ગામના સરપંચનો પણ તેમને ભરપૂર સાથે મળી રહ્યો છે. જોકે હાલ ડભોઈ તાલુકામાં 4 કોરોનાના કેસ પોઝિટિવ નોંધાઈ ચૂક્યા છે. તેવામાં સ્વાભાવિક છે કે, લોકોની ચિંતા વધવાની જ. પરંતુ આ યુવાનોની મહેનત અને કડક નિયમોના કારણે આ ગામના લોકો પોતાને સુરક્ષિત અનુભવી રહ્યા છે. લોકોએ તો પોતાના સગા-સંબંધીઓને પણ હાલ ગામમાં ન આવવા માટે અનુરોધ કર્યો છે. 

રાજ્યના તમામ ગામના યુવાનો માટે પ્રેરણા લેવા જેવી ઘટના 

કોઠારા ગામના યુવાનોની આ પહેલ સરાહનીય છે. ત્યારે વીટીવી આજે યુવાઓને માધ્યમ બનાવતા રાજ્યના તમામ યુવાઓને અપીલ કરવા માગે છે કે, તેઓ પણ પોતાના ગામને કોરોનાથી બચાવવા આવી પહેલ શરૂ કરે. કારણ કે, જો આપણું ગામ સુરક્ષિત હશે. તો જ આપણે અને આપણા પરિવાર પણ સુરક્ષિત રહીશું.