લૉકડાઉનમાં થયેલા નુકસાનને પહોંચી વળવા માટે હવે ક્રૂડ કંપનીઓ જૂનમાં પેટ્રોલ- ડીઝલના ભાવમાં 5 રૂપિયા સુધીનો વધારો કરી શકે છે. આ સિવાય કંપનીઓ આવનારા મહિનાથી કિંમતમાં રોજ બદલાવની વ્યવસ્થાને ફરી યોગ્ય રીતે લાવવાની તૈયારી કરી રહી છે. તેમનું કહેવું છે કે લૉકડાઉનમાં ઓછા વેચાણની સાથે સરકારે પણ ટેક્સ વધાર્યો છે અને વેચાણમાં ઘણું અંતર આવ્યું છે.
ક્રૂડ કંપનીઓ નુકસાન ભરપાઈ કરવા લેશે પગલાં
50 પૈસા રોજ વધારવામાં આવશે પેટ્રોલ- ડીઝલના ભાવ
સતત 2 અઠવાડિયા સુધી વધી શકે છે ભાવ
મળતી માહિતી અનુસાર ગયા અઠવાડિયે તમામ રિટેલ ઓઇલ ડીલરોએ મળ્યા હતા અને વર્તમાન પરિસ્થિતિનું મૂલ્યાંકન કર્યું હતું. લૉકડાઉન પછી કિંમતોમાં દૈનિક ફેરફારો રજૂ કરવા માટે એક રોડમેપ તૈયાર કર્યો હતો. જો લૉકડાઉન 5મી વખત લંબાવાશે તો પણ સરકારની મંજૂરીથી આ સિસ્ટમ લાગુ કરવામાં આવશે. છેલ્લાં બે મહિનામાં ઓઇલના ખૂબ ઓછા વેચાણને કારણે કંપનીઓને મોટું નુકસાન થયું છે.
સતત 2 અઠવાડિયા સુધી દરરોજ 40થી 50 પૈસા સુધી વધશે ભાવ
ઓઇલ કંપનીના સરકારી અધિકારીએ જણાવ્યું હતું કે બ્રેન્ટ ક્રૂડ પાછલા મહિનામાં 50 ટકા વધીને 30 ડોલર પ્રતિ બેરલ પર પહોંચી ગયો છે. જો આ જ સ્થિતિ રહેશે તો જૂનથી પેટ્રોલ અને ડીઝલના હાલના ભાવ વધવાનું શરૂ થશે. આવી સ્થિતિમાં દિવસ દીઠ 40-50 પૈસા વધારવાના રહેશે. સરકારના સૂત્રો કહે છે કે, જો દૈનિક ભાવમાં ફેરફારની સિસ્ટમ પુનઃસ્થાપિત કરવામાં આવે તો પણ પેટ્રોલ અને ડીઝલની કિંમતો મર્યાદાથી વધારવાની મંજૂરી આપી શકાતી નથી. આ કારણે કંપનીઓ 20-40 પૈસા કે તેનાથી વધારે ભાવ વધારો કરી શકતી નથી. આ વધારો ત્યાં સુધી ચાલુ રાખવામાં આવશે જ્યાં સુધી કંપનીઓ તેમના નુકસાનને ભરવામાં સક્ષમ બનતી નથી.
સરકારે અંધાધૂંધ રીતે વધાર્યો ટેક્સ
ઓઇલ માર્કેટિંગ કંપનીઓનું કહેવું છે કે લૉકડાઉન દરમિયાન વેચાણમાં 90 ટકાનો ઘટાડો થયો છે. જો કે, વૈશ્વિક ભાવોમાં મોટા ઘટાડાથી આ સરભર થયું હતું. પરંતુ કેન્દ્ર સરકારે પેટ્રોલ પર લિટર દીઠ 10 રૂપિયા અને ડીઝલ પર 13 રૂપિયા એક્સાઈઝ ડ્યુટી વધારીને લીટર દીઠ કંપનીઓનો નફો 12-18 રૂપિયાથી ઘટીને 4-5 રૂપિયા થયો છે. હવે વૈશ્વિક બજારમાં પણ ક્રૂડ મોંઘું થયું છે જેના કારણે કિંમતોમાં ફેરફાર કરવામાં આવ્યો છે. દિલ્હીમા 5મેના રોજ વેટ વધાર્યા બાદ પેટ્રોલની કિમતમાં 71.26 રૂપિયા લિટર અને ડીઝલના ભાવ 69.39 રૂપિયા લીટર થયા છે. જે 16 મે પહેલાં ક્રમશઃ 69.59 અને 62.28 રૂપિયા હતા.