Coronavirus / કોરોનાને કારણે અમેરિકાના બિઝનેસ જગતના ઈતિહાસની બની સૌપ્રથમ ઘટના, ભારત પણ પરેશાન

• કોરોનાવાયરસના ડરથી શેરબજારમાં હાહાકાર મચ્યો 
• અમેરિકી શેરબજાર ડાઉ જોન્સ ઇતિહાસમાં સૌથી વધુ અંક ગબડ્યો 
• સેન્સેક્સ બપોરે 12 વાગે 1214 અંકની પછડાટ પછી 38531ના સ્તરે 

સ્થાનિક શેરબજારમાં મોટાપાયે ઘટાડાથી મિનિટોમાં જ રોકાણકારોના પાંચ લાખ કરોડ રૂપિયા ડૂબી ગયા. યુએસ શેરબજાર 2008 પછી સૌથી નીચલા સ્તરે પહોંચ્યું છે. ડાઉ જોન્સમાં 1,191 પોઇન્ટની સૌથી મોટો એક દિવસનો ઘટાડો નોંધાયો છે જેમાં ચાર ટકાનો ઘટાડો થયો છે. 

દક્ષિણ કોરિયા, ઇટાલી અને ઈરાનમાં પણ વાયરસની અસરો જોવા મળી છે. FTSI 3.49 ટકા, જાપાનના નિક્કી 4.02 ટકા, નાસ્ડેક 4.61 ટકા, શાંઘાઈ કમ્પોઝિટ 3.37 ટકા અને હેંગશેંગ 2.50 ટકા ઘટ્યા છે.

સતત છ દિવસથી બજારમાં મંદીનો માહોલ 

ચીનની બહાર કોરોનાવાયરસના ફેલાવાને કારણે વૈશ્વિક બજારમાં સતત ઘટાડો જોવા મળી રહ્યો છે જેને કારણે રોકાણકારો માર્કેટમાંથી પૈસા ઉપાડી રહ્યા છે. માર્કેટમાં સતત છ દિવસનો ઘટાડો નોંધાઈ રહ્યો છે અને રોકાણકારોને આ છ દિવસમાં લગભગ 10 લાખ કરોડ રૂપિયાનું નુકસાન થયું છે.

વિકાસ દરના અનુમાનથી પણ બજારમાં કડાકો 

વર્તમાન નાણાકીય વર્ષના ત્રીજા ક્વાર્ટર (ઓક્ટોબર-ડિસેમ્બર) માં પણ વિકાસ દર 4.5 ટકા પર હોઈ શકે છે. SBIના અર્થશાસ્ત્રીઓએ સરકારના આંકડા જાહેર થયા પહેલા આ અંદાજ લગાવ્યો છે. શુક્રવારે GDP વૃદ્ધિ દર ડેટા જાહેર કરવામાં આવશે. આને કારણે સ્થાનિક શેરબજારમાં ઘટાડો જોવા મળી રહ્યો છે.

ડોલરની સામે 71.65 સ્તરે ખુલ્યો રૂપિયો 

આજે ડોલર સામે રૂપિયામાં પણ મોટો ઘટાડો જોવા મળ્યો હતો. આજે 38 પૈસાના ઘટાડા પછી રૂપિયો 71.93 ના સ્તર પર ખુલ્યો છે. પાછલા કારોબારી દિવસે રૂપિયો ડોલર સામે 71.55 ની સપાટીએ બંધ રહ્યો હતો.