ફફડાટ / કોરોના વાયરસનો ગુજરાતમાં પગપેસારો, વડોદરાની SSG હોસ્પિટલમાં બે શંકાસ્પદ કેસ નોંધાયા

• કોરોના વાયરસના બે શકાંસ્પદ કેસ ગુજરાતમાં મળ્યા 
• વડોદરાની SSG હોસ્પિટલ કોરોના વાયરસના શંકાસ્પદ કેસ નોંધાયા
• કોરોનાએ દસ્તક દેતા રાજ્યનું વહીવટી તંત્ર થયું દોડતું

ગુજરાતમાં કોરોનો વાયરસે દસ્તક આપી દીધી છે. કોરોના વાયરસના બે શંકાસ્પદ કેસ ગુજરાતમાં મળ્યા છે. વડોદરાની SSG હોસ્પિટલ કોરોના વાયરસના શંકાસ્પદ કેસ નોંધાયા છે. જેને લઇ રાજ્યનું વહીલટી તંત્ર દોડતું થઇ ગયું છે. ચીન થઇ શરૂ થયેલો કોરોના વાયરસે વિશ્વભરમાં હાહાકાર મચાવી દીધો છે.

ચીનમાં કોરોના વાયરસનો હાહાકાર

ચીનની કેન્દ્ર સરકાર દ્વારા જારી કરવામાં આવેલા સત્તાવાર આંકડાઓ અનુસાર, અત્યાર સુધીમાં કોરોના વાઈરસના 5300 કેસની પુષ્ટિ થઈ છે. ઉલ્લેખનીય છે કે, જાપાને તેના 200 નાગરિકોને શહેરમાંથી એરલિફ્ટ કર્યા છે અને અમેરિકાએ લગભગ 240 નાગરિકોને હવાઈમાર્ગે ચીનની બહાર કાઢ્યા છે. બીજી તરફ, ભારત સરકારે પણ ચીનમાંથી પોતાના નાગરિકોને તુરંત બહાર કાઢવાની યોજના બનાવી છે. કોરોના વાઈરસનું મુખ્ય કેન્દ્ર ચીનનું વુહાન શહેર છે, જ્યાં હજુ પણ ઘણા ભારતીયો ફસાયા છે.

કોલકાતામાં થાઈલેન્ડની યુવતીનું મોત

ભારતમાં આરોગ્ય વિભાગે તકેદારીનાં પૂરતાં પગલાં લીધાં હોવા છતાં કોરોના વાઈરસના શંકાસ્પદ દર્દીઓની સંખ્યા વધી રહી છે. કોલકાતામાં દાખલ કરાયેલી થાઈલેન્ડની યુવતીનું મોત નીપજ્યું છે. એવી આશંકા છે કે આ થાઈ યુવતીને કોરોના વાઈરસનો ચેપ લાગ્યો હતો. થાઈલેન્ડની રહેવાસી આ મહિલાને ત્રણ દિવસ પહેલા કોલકાતાની એક ખાનગી હોસ્પિટલમાં દાખલ કરવામાં આવી હતી, જ્યાં તેનું સોમવારે મૃત્યુ થયું હતું. જોકે, તે કોરોના વાઈરસથી મૃત્યુ પામી છે કે નહીં તેની તપાસ હાલ કરવામાં આવી રહી છે.

દેશના અનેક રાજ્યમાં હાઈએલર્ટ જારી

દેશના સૌથી મોટા રાજ્ય ઉત્તરપ્રદેશની તમામ જિલ્લા હોસ્પિટલોમાં 10 બેડના આઈસોલેશન વોર્ડ બનાવવામાં આવ્યા છે. લખનઉ વારાણસી સહિતનાં તમામ એરપોર્ટ પર તપાસ ટીમની સાથે સાથે હેલ્પડેસ્ક પણ તહેનાત કરવામાં આવ્યા છે. મહારાજગંજમાં ચીનથી પરત આવેલા એક મેડિકલ સ્ટુડન્ટની તપાસ કરીને તેનો રિપોર્ટ સરકારને મોકલી દેવામાં આવ્યો છે. યુપી, પંજાબ, હરિયાણા સહિત દેશના અનેક રાજ્યમાં હાઈએલર્ટ જારી કરી દેવામાં આવ્યું છે.