મહામારી / બંગાળને ચૂંટણી ભારે પડી? રાજ્યમાં કોરોના વાયરસથી મહારાષ્ટ્ર જેટલો જ મૃત્યુદર

• ભારતમાં કોરોના વાયરસના વધતાં કેસ 
• કેટલાય રાજ્યોમાં ફરીથી લાગ્યા પ્રતિબંધ 
• બંગાળમાં મૃત્યુદર અને પોઝિટિવિટી દર વધ્યો 

ભારતમાં એક તરફ કોરોના વાયરસના કેસ સતત વધી રહ્યા છે અને ઘણા બધા રાજ્યોમાં પરિસ્થિતિ ખરાબ છે. ઘણા બધા રાજઈમાં નાઈટ કર્ફ્યૂ અને લોકડાઉન લગાવવામાં આવી રહ્યા છે ત્યાં પશ્ચિમ બંગાળમાં રાજકીય પાર્ટીઓ ભારે ભીડ ભેગી કરીને ચૂંટણી પ્રચાર કરી રહી છે એવામાં પશ્ચિમ બંગાળમાં કોરોનાના ચોંકાવનારા આંકડા સામે આવ્યા છે. 

મૃત્યુદર વધ્યો 

પશ્ચિમ બંગાળમાં આઠ ચરણોમાં ચૂંટણી થવાની છે અને ધૂમ પ્રચાર થઈ રહ્યો છે ત્યારે પશ્ચિમ બંગાળમાં કોરોના વાયરસથી મૃત્યુદર મહારાષ્ટ્ર જેટલો છે, પશ્ચિમ બંગાળમાં 1.7 ટકા મૃત્યુદર છે જે દેશમાં ત્રીજા નંબર પર છે. મૃત્યુદરના મામલે પંજાબ અને સિક્કિમ બાદ પશ્ચિમ બંગાળનો નંબર આવે છે. 

પૉઝિટીવીટિ રેટ પણ વધ્યો 

આટલું  જ નહીં પૉઝિટીવીટિ રેટ મામલે પશ્ચિમ બંગાળ દેશમાં સાતમા નંબર પર પહોંચી ગયું છે, રાજ્યમાં 6.5 ટકા પૉઝિટીવીટિ રેટ છે. જ્યારે આખા દેશમાં સરેરાશ 5.2 ટકા આ આંકડો છે. 

આસપાસના રાજ્યો કરતાં વધારે કહેર 

છેલ્લા સાત દિવસથી પશ્ચિમ બંગાળમાં દરરોજ 3 હજારની આસપાસ નવા કેસ સામે આવી રહ્યા છે. આસપાસના રાજ્યની સાથે તુલના કરીએ તો બિહારમાં રોજના 2,122, ઝારખંડમાં 1,734 જ્યારએ ઓડિશામાં 981 કેસ સામે આવે છે. 

હજુ કેસ વધવાની સંભાવના 

નોંધનીય છે કે હજુ પશ્ચિમ બંગાળમાં ચાર ચરણનું મતદાન બાકી છે અને પાર્ટીઓ સતત ધૂમ પ્રચાર કરી રહી છે ત્યારે આગામી સમયમાં હજુ પણ કોરોના વાયરસના કેસ વધે તેવી સંભાવના છે.