ભારતના FDIના નિયમોને વધારે કડક બનાવવાના નિર્ણય પર ચીન ભારત પર ભડક્યુ છે. ભારતે આ પગલા એટલા માટે ભર્યા છે કેમ કે કોરોનાને કારણે આર્થિક રીતે નબળી પડેલી ભારતીય કંપનીઓમાં રોકાણ કરી ચીન ફાયદો ન ઉઠાવી જાય. ભારતના FDIના નિયમોમાં પરિવર્તનને લઈને ચીને વાંધો ઉઠાવ્યો છે. ચીને કહ્યું કે નિર્ણય વિશ્વ વ્યાપાર સંગઠનના સિદ્ધાંતોની વિરુદ્ધ છે.
FDIના નવા નિયમોથી ચીન હચમચી ગયુ
FDIના નિયમોને લઈને ભારતને આપી દીધી આ ધમકી
ચીને કહ્યું કે જો ભારત આમ નહીં કરે તો અમે બીજે રોકાણ કરીશુ
FDIના નવા નિયમો હેઠળ હવે ભારતની સીમા સાથે જોડાયેલા કોઈ પણ દેશના નાગરિક કે કંપનીએ રોકાણ કરતા પહલા સરકારની મંજૂરી લેવી પડશે. અત્યાર સુધી પાકિસ્તાન અને બાંગ્લાદેશની કંપનીઓને મંજૂરી લેવાની જરુર પડતી હતી. ભારતની પહેલા કેટલાય દેશો ચીની કંપનીઓને રોકવા માટે FDIના નિયમોને કડક બનાવી ચુક્યા છે.
FDIના નિયમમાં ફેરફાર બાદ નવી દિલ્હીમાં ચીની દુતાવાસના પ્રવક્તાએ કહ્યું કે અમને આશા છે કે ભારત પોતાની ભેદભાવ વાળી નીતિમાં સંશોધન કરશે અને અલગ અલગ દેશોના રોકાણ માટે એક જ પ્રકારની નિયમો બનાવશે. સાથે સાથે ભારત પોતાને ત્યાં ખુલ્લુ, પારદર્શક અને પ્રતિસ્પર્ધાત્ક ધંધાનો માહોલ બનાવશે.
આ દરમિયાન ચીની સરકારના મુખપત્ર ગણાતા સરકારી અખબાર ગ્લોબલ ટાઈમ્સના એક લેખમાં ભારતને ધમકી આપવાનો પ્રયાસ કરાયો છે. જેમાં લખ્યુ છે કે ચીન દુનિયામાં મેડિકલ સપ્લાય માટે સક્ષમ છે, પણ ભારતે તેને નજર અંદાજ કરી FDIના નિયમો કડક બનાવ્યા છે. ભારત મેડિકલ સપ્લાય માટે વધારે ચીન પર નિર્ભર છે અને ભારતીય કંપનીઓના કથિત અસરવાદી ભાગીદારીને રોકવાનો પ્રયાસ સંકટ સમયમાં સપ્લાય મેળવવામાં મુશ્કેલી ઉભી કરશે. ઉલ્લેખનીય છે કે ફાર્મેક્સિલ ડેટા પ્રમાણે ભારત પોતાની દવાઓનો કાચો માલ ચીનથી ખરીદે છે.
તજજ્ઞોનું કહેવું છે કે ચીની રોકાણ પર પ્રતિબંધ ભારતના મેન્યુફેક્ચરિંગ સેક્ટરમાં ઘાતક સાબિત થઈ શકે છે. જલ્દી જ આ નવી નીતિની અસર ભારત પર થશે. ચીનમાં ભારતીય રોકાણ પર પણ અસર પડશે.
ગ્લોબલ ટાઈમ્સમાં દાવો કરવામાં આવ્યો છે કે આ નિર્ણયથી ભલે ભારત માટે અન્ય દરવાજા ખુલ્યા હોય જાપાન અને દક્ષિણ કોરિયાની કંપનીઓને તક મળે પણ મેન્યૂફેક્ચરિંગમાં ચીનની જગ્યા કોઈ ન લઈ શકે. તેમજ લખ્યુ છે કે ભારત મેન્યૂફેક્ચરિંગ હબ બની જાય પણ હાલની સંકટની સ્થિતિને જોતા તેને લાંબો સમય લાગશે. ત્યારે ભારતે ચીન સાથે સંબંધ વધારવા જોઈએ. જો ભારત ચીની કંપનીઓ માટે અસુરક્ષિત સાબિત થાય છે તો પછી એ દક્ષિણ-પૂર્વ એશિયાના દેશોમાં પોતાનો વ્યસાય વધારશે કે જે ચીનની મદદ લેવા માટે ઈચ્છા ધરાવે છે.