મદદ / રાજ્ય સરકારની મદદે મોદી સરકાર: કેન્દ્રની આરોગ્ય ટીમના સુરતમાં ધામા, જાણો કોણ કોણ આવ્યા વહારે

• સુરતમાં કોરોના કહેર વધતા કેન્દ્ર સરકાર હરકતમાં
• કેન્દ્રની આરોગ્ય ટીમના સુરતમાં ધામા
• AIIMS ડાયરેક્ટર સહિત આરોગ્ય ટીમ સુરતમા

સુરતમાં કોરોના કહેર વધતા કેન્દ્ર સરકાર હરકતમાં આવી છે. કેન્દ્રની આરોગ્ય વિભાગની ટીમે સુરતમાં ધામા નાંખ્યા છે. AIIMS ડાયરેક્ટર સહિત આરોગ્ય ટીમનો કાફલો સુરતમા આજે સિવિલ હોસ્પિટલની મુલાકાત લેશે. સિવિલ બાદ સંક્રમિત વિસ્તારોની મુલાકાત લેશે. વરાછા અને લીંબાયત વિસ્તારની પણ મુલાકાત લેશે.

કોણ કોણ છે આરોગ્ય ટીમમાં 

નીતિ આયોગના સભ્ય વિનોદ પાલ, ICMRના ડાયરેક્ટર જનરલ બલરામ ભાર્ગવ, AIIMSના ડાયરેક્ટર રણદીપ ગુલેરિયા ને એડિશનલ સેક્રેટરી આર.પી.આહુજા ગુજરાત આવશે. કોરોના સંક્રમણની સ્થિતિને કાબુમાં લેવા કરાઈ રહેલા પ્રયાસ અને ધનવંતરી રથની સમિક્ષા કરશે.

સુરતમાં કોરોના સંક્રમણ અટકાવવા હવે અમદાવાદની પેટર્ન અપનાવાશે. આરોગ્ય ધન્વંતરી રથમાં રેપીડ ટેસ્ટ કરી પોઝિટિવ દર્દીને તાત્કાલિક આઈસોલેટ કરાશે. પૂર્વ SMC કમિશ્નર થેંનારાસનને સુપર સ્પ્રેડર્સના ટેસ્ટિંગની કામગીરી સોંપાઈ છે.

સુરતમાં એક્ટિવ કેસનો આંકડો ચોંકાવનારો

સુરતમાં કોરોનાનું સંક્રમણ વધી રહ્યું છે. અમદાવાદ બાદ સૌથી વધુ સુરતમાં કેસ નોંધાઇ રહ્યા છે. આજે સુરતમાં 265 નવા કોરોનાના કેસ નોંધાયા છે. જેમાં સુરત કોર્પોરેશનમાં 217 અને સુરત જિલ્લામાં 48 કેસ નોંધાયા છે. આ સાથે સુરતમાં કોરોનાનો કુલ આંકડો 8907 પર પહોંચ્યો છે. સુરતમાં આજે 191 દર્દીઓ સ્વસ્થ થયા છે. જેથી કુલ સ્વસ્થ થયેલા દર્દીનો આંકડો 5729 પર પહોંચ્યો છે. તો આજે સુરતમાં 5 દર્દીઓના મોત થયા છે. આ સાથે સુરતમાં અત્યાર સુધીમાં 237 દર્દીના મૃત્યુ થયા છે. સુરતમાં હાલ 2941 એક્ટિવ કેસ છે.

હાલ શું છે અમદાવાદમાં કોરોનાની સ્થિતિ?

છેલ્લા 24 કલાકમાં અમદાવાદમાં 181 કેસ નોંધાયા છે. જેમાં અમદાવાદ કોર્પોરેશનમાં 168 અને અમદાવાદ જિલ્લામાં 13 કેસ નોંધાયા છે. આ સાથે અમદાવાદમાં કોરોનાનો કુલ આંકડો 23,780 પર પહોંચ્યો છે. અમદાવાદમાં આજે 188 દર્દીઓ સ્વસ્થ થયા છે. જેને લઇને કુલ સ્વસ્થ થયેલા દર્દીઓનો આંકડો 18,523 પર પહોંચ્યો છે. અમદાવાદમાં આજે 5 દર્દીઓના મોત થયા છે, જેની સાથે અમદાવાદનો કોરોનાથી મૃત્યુઆંક 1534 પર પહોંચ્યો છે. હાલ અમદાવાદમાં 3723 એક્ટિવ કેસ છે. 

અમદાવાદ અને સુરતના એક્ટિવ કેસમાં વધુ તફાવત નહીં

મહત્વનું છે કે, અમદાવાદ બાદ હવે સુરતમાં કોરોનાએ ભરડો લીધો છે. જો બંન્ને મહાનગરો વચ્ચે એક્ટિવ કેસની વાત કરવામાં આવે તો બહું વધુ અંતર નથી. અમદાવાદમાં 3723 અને સુરતમાં હાલ 2941 કેસ એક્ટિવ છે. 

રાજ્યના વિવિધ જિલ્લામાં નોંધાયેલા કોરોના વાયરસના કેસની વિગત

રાજ્યમાં અત્યાર સુધી નોંધાયેલા કેસની વિગત (આ માહિતી રાતે 8 વાગ્યા સુધીની છે)