સમાધાન / જૂનાગઢમાં હવે ઓક્સિજન સપ્લાય કલેક્ટર કચેરી હસ્તક, શું ઓક્સિજનની તંગી દૂર થશે?

• જૂનાગઢમાં ઓક્સિજન સપ્લાયનો કંટ્રોલ તંત્ર હસ્તક લેવાયો
• જિલ્લામાં જરૂરિયાત મુજબનો ઓક્સિજન સપ્લાય ચાલુ
• સિવિલમાં 20 હજાર લીટરની ઓક્સિજન ટેન્ક તૈયાર કરાઈ

જૂનાગઢ જિલ્લામાં લોકો દ્વારા અને સોશ્યલ મીડિયા દ્વારા ઓક્સિજન ની તંગી હોવાની માહિતી તંત્રને મળતા તંત્ર દ્વારા ઓક્સિજન સપ્લાયનો કંટ્રોલ હવે તંત્રના હસ્તક લઈ લેવાયો છે ત્યારે જૂનાગઢ મામલતદાર ડિઝાસ્ટર ટી.બી ત્રિવેદી દ્વારા જૂનાગઢ જિલ્લામાં હાલ જરૂરિયાત મુજબનું ઓક્સિજન સપ્લાય થઈ રહ્યું છે તેવી માહિતી આપવામાં આવી છે.

જૂનાગઢ જીલ્લામાં 5 જેટલી મુખ્ય કોવિડની પ્રાઇવેટ હોસ્પિટલ છે તેને અને આજુ બાજુના તાલુકાઓમાં ઓક્સિજન જરૂરિયાત મુજબ પ્રોવાઇડ કરવામાં આવે છે ત્યારે સિવિલમાં પણ 20 હજાર લીટરની ઓક્સિજન ટેન્ક તૈયાર કરી દેવામાં આવી છે જેમાં પણ ઓક્સિજન જરુરિયત મુજબ પ્રોવાઈડ કરવામાં આવે છે અને ખાસ તંત્ર દ્વારા લોકો ને પણ અપીલ કરવામાં આવે છે કે ઘરે ઓક્સિજન ની સારવાર લેવાનું ટાળે અને હોસ્પિટલમાં જ પ્રોપર સારવાર લે જેથી કરી લોકો ને જીવ સાથે ચેડા ના થાય.

ગુજરાતમાં કોરોનાની સ્થિતિ

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 14,296 નવા કેસ નોંધાયા છે તો સંક્રમણના કારણે 157 લોકોના મોત નિપજ્યા છે. આ સાથે જ 6,727 દર્દીઓ સાજા થયાં છે. આ સાથે જ અત્યાર સુધીમાં 3,74,699 દર્દીઓ કોરોના મુક્ત થયાં છે. 

છેલ્લા 24 કલાકમાં 157 દર્દીઓના મોતથી ખળભળાટ

ઉલ્લેખનીય છે કે, છેલ્લા 24 કલાકમાં રાજ્યમાં 157 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 6328 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 384 લોકો વેન્ટિલેટર પર છે. એક્ટિવ કેસનો આંકડો 1,15,006 પર પહોંચ્યો છે.

ઉત્તર ગુજરાતના મહેસાણાએ ચિંતા વધારી 

કોરોનાનો પ્રકોપ દરરોજ વધી રહ્યો છે. ત્યારે ગત 24 કલાકમાં નોંધાયેલા કોરોનાના કેસમાં અમદાવાદ સુરત બાદ મહેસાણા જિલ્લામાં ચિંતાજનક આંકડો નોંધાયો છે. ઉત્તર ગુજરાતના મહેસાણામાં પણ કોરોના કહેર જોવા મળી રહ્યો હોય તેમ લાગી રહ્યું છે. ગત 24 કલાકમાં અહીં 598 નવા કેસ નોંધાયા હતા. 

અત્યાર સુધીમાં 1,12,95,536 લોકોને અપાઇ રસી 

સારા સમાચાર એ છે કે, રાજ્યમાં અત્યાર સુધીમાં 1,12,95,536 લોકોનો કોરોનાની રસી આપવામાં આવી છે. આ સાથે જ ગત 24 કલાકમાં 1,24,539 લોકોને કોરોનાની રસી આપવામાં આવી હતી.

સુરત અને અમદાવાદમાં કોરોના બેકાબૂ 

ગુજરાતમાં રસીકરણની કામગીરી ચાલુ હોવા છતાં બીજી તરફ પરિસ્થિતિ બેફામ છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 5790 કેસ તો અમદાવાદ ગ્રામ્યમાં 74 કેસ નોંધાયા છે. જ્યારે સુરત શહેરમાં 1690 નવા કેસ, જ્યારે સુરત ગ્રામ્યમાં 413 કેસ નોંધાયા છે. વડોદરા શહેરમાં 573 કેસ, જ્યારે ગ્રામ્યમાં 189 કેસ નોંધાયા. રાજકોટ શહેરમાં 608 કેસ અને ગ્રામ્યમાં 68 કેસ નોંધાયા છે. ત્યારે જાણો 24 કલાક દરમિયાન રાજ્યના તમામ જિલ્લામાં નોંધાયેલ કેસની વિગત...