કાર્યવાહી / લોકડાઉનનો ભંગ: વલસાડમાં રામનવમીની ધામધૂમથી ઉજવણી, પોલીસે 9ની કરી ધરપકડ

• વલસાડ કોસંબામાં રામનવમીની ઉજવણી
• સોશિયલ ડિસ્ટન્સ ન જળવાયું
• પોલીસે 9 લોકોની કરી ધરપકડ

દિલ્હીના નિઝામુદ્દીન મકસ ની ઘટના બાદ સમગ્ર દેશમાં તમામ ધાર્મિક સ્થળો ઉપર ભીડ ભેગી ન થાય તે માટે કેન્દ્ર સરકાર દ્વારા ગાઈડલાઇન જાહેર કરવામાં આવી છે. જોકે રાજ્યના છેવાડે આવેલા વલસાડ જિલ્લામાં ધારા 144 નો ખુલ્લેઆમ ભંગ કરતા વલસાડ જિલ્લા પોલીસ હરકતમાં આવ્યું છે.  વલસાડના પ્રખ્યાત કોસંબાના રામજી મંદિરમાં રામનવમી નિમિત્તે મોટી સંખ્યામાં લોકો એકત્ર થયા હતા અને ધારા 144 નો ભંગ  કરવામાં આવ્યો હતો। .અને સોસીયલ ડિસ્ટન્સ પણ ન જળવાતા  કોરોનો વાઇરસ  ફેલાવવાનો  ભય પણ ઉભો થયો હતો. 

મળતી માહિતી મુજબ કોસંબાના રામજી મંદિરમાં રામનવમીની ઉજવણી કરવામાં આવી. આ દરમિયાન સોશિયલ ડિસટન્સ રાખવામાં આવ્યો ન હતો. મંદિરમાં કરવામાં આવેલી ઉજવણીનો વીડિયો સોશિયલ મીડિયામાં વાયરલ થયો હતો. વીડિયોના આધારે પોલીસે પાંચ લોકો સામે ફરિયાદ નોંધી હતી. ત્યાર બાદ અન્ય 4 લોકોની પણ ઓળખ કરવામાં આવી.પોલીસે 9 લોકોની ધરપકડ કરીને વધુ કાર્યવાહી હાથધરી છે.

મંદિરના પૂજારી સહિત 9 લોકોની ધરપકડ

મીડિયામાં આ મામલો આવતા રાજ્યના ડીજીપી એ આ મામલે તપાસના આદેશ પણ આપ્યા હતા. જેને લઈને શરૂઆતમાં  ઊંઘતું  ઝડપાયેલ વલસાડ જિલ્લા પોલીસ હરકતમાં આવ્યું હતું અને મંદિરના પૂજારી સહિત 9 લોકોની ધરપકડ કરવામાં આવી છે. આવતા સમયમાં મંદિર પરિસરમાં હાજર રહેલા તમામ લોકો વિરુદ્ધ કડક કાયદેસરની કાર્યવાહી કરવાની વલસાડ જિલ્લા પોલીસ વડાએ આદેશ આપ્યા છે.