ચિંતાજનક / ખાનગી કોવિડ કેર હોસ્પિટલમાં જતા પહેલા ચેતી જજો, મૃત્યુદર મામલે છે અવ્વલ

• આગ લાગે ત્યારે કૂવો ખોદવાની નિંભર તંત્રની જૂની રીતરસમ
• તંત્ર અને હોસ્પિટલના સંચાલકોની ગુનાઇત બેદરકારી તેમને ભરખી ગઇ
• એસવીપી જેવી સરકારી હોસ્પિટલમાં દર્દીના મૃત્યુદરનું પ્રમાણ ઓછું

મ્યુનિસિપલ તંત્ર દ્વારા શહેરમાં કોરોનાની સ્થિતિ વકરતાં ગત તા.૧૬ મે, ર૦ર૦એ ૪૦ ખાનગી હોસ્પિટલ સાથે પહેલા તબક્કામાં કોવિડ કેર હોસ્પિટલ તરીકેના એમઓયુ કરાયા હતા. આ હોસ્પિટલના પ૦ ટકા બેડ તંત્રની ભલામણથી દર્દીની મફત સારવાર માટે રિઝર્વ રાખવાની એમઓયુ હેઠળ શરત કરાઇ હતી. ત્યારબાદ વધુ તબક્કા હેઠળ તંત્ર દ્વારા હાલમાં કુલ ૭ર ખાનગી હોસ્પિટલને કોવિડ કેર હોસ્પિટલ તરીકે જાહેર કરાઇ છે.

એસવીપી જેવી સરકારી હોસ્પિટલમાં દર્દીના મૃત્યુદરનું પ્રમાણ ઓછું

જોકે શ્રેય હોસ્પિટલના અગ્નિકાંડ બાદ એમઓયુની શરતમાં ફાયર સેફ્ટી એનઓસીનો ઉલ્લેખ જ ન હોવાની બાબત પ્રકાશમાં આવતાં લોકો મ્યુનિસિપલ સત્તાવાળાઓ પર ધિક્કાર વરસાવી રહ્યા છે. આની સાથે મ્યુનિસિપલ તિજોરીમાંથી દર્દીની મફત સારવાર પાછળ કોઇ પણ પ્રકારના ઓડિટ હિસાબ વગર લાખો રૂપિયા ખાનગી કોવિડ કેર હોસ્પિટલને ચૂકવાઇ રહ્યા હોવા છતાં ખાનગી હોસ્પિટલ બેડ માટે દર્દીને રઝળપાટ કરાવે છે. આ તો ઠીક, પરંતુ દર્દીના જીવન માટે પણ સારવારની દૃષ્ટિએ પૂરેપૂરી સલામત નથી. આના કરતાં એસવીપી જેવી સરકારી હોસ્પિટલમાં દર્દીના મૃત્યુદરનું પ્રમાણ ઓછું છે.

આગ લાગે ત્યારે કૂવો ખોદવાની નિંભર તંત્રની જૂની રીતરસમ

શ્રેય હોસ્પિટલના અગ્નિકાંડમાં પહેલી નજરમાં મ્યુનિસિપલ કોર્પોરેશનની ઘોર બેદરકારી સામે આવી છે. એક પણ ખાનગી કોવિડ કેર હોસ્પિટલમાં દર્દીના જાનમાલની સલામતીની પરવા કર્યા વગર તંત્રે આંખ મિંચીને એમઓયુ કર્યા હોઇ લોકોમાં ભારે રોષ ફેલાયો છે. આગ લાગે ત્યારે કૂવો ખોદવાની નિંભર તંત્રની જૂની રીતરસમ હેઠળ ખાનગી કોવિડ કેર હોસ્પિટલની ફાયર સેફ્ટીની એનઓસી હવે રહી-રહીને તપાસાઇ રહી છે, જોકે હજુ સુધી એનઓસી વગરની ખાનગી હોસ્પિટલ સાથેના એમઓયુ યથાવત્ જ છે. ખાનગી હોસ્પિટલ પર ઓળઘોળ થતા સત્તાધીશોએ એક પણ એમઓયુ રદ કર્યા નથી, જેમાં શ્રેય હોસ્પિટલનો પણ સમાવેશ થાય છે.

ખાનગી હોસ્પિટલનો જે તે બેડની સ્થિતિ મુજબ ચાર્જ નક્કી કરાયો

બીજી તરફ ખાનગી કોવિડ કેર હોસ્પિટલમાં દર્દીની સારવારની ગુણવત્તા સામે ગંભીર પ્રશ્ન ઊભો થયો છે. ગત તા.૧૧ ઓગસ્ટની સ્થિતિએ આ હોસ્પિટલમાં દર્દીનો કુલ મૃત્યુઆંક ૪૦૦ થઇ ગયો છે. આમાં તંત્રની ભલામણ ધરાવતા મફત સારવારના દર્દી ઉપરાંત હોસ્પિટલના અંગત બેડ માટે પાણીની જેમ લાખો રૂપિયા ખર્ચીને પણ કોરોના સામેે જંગ હારનારા દર્દીનો સમાવેશ થાય છે. ખાનગી હોસ્પિટલનો જે તે બેડની સ્થિતિ મુજબ ચાર્જ નક્કી કરાયો છે.

તંત્ર અને હોસ્પિટલના સંચાલકોની ગુનાઇત બેદરકારી તેમને ભરખી ગઇ

આ ચાર્જ મુજબ દર્દી પાસેથી નાણાં લેવાય છે કે કેમ તે માટે ગાંધીનગરથી એક આઇએએસ ઓફિસરને મ્યુનિ. તંત્રમાં ડેપ્યુટી કમિશનર તરીકે મુકાયા છે. તેમ છતાં કેટલીક ખાનગી હોસ્પિટલ દર્દીઓને રીતસરના લૂંટી રહી છે, જેમાં શ્રેય હોસ્પિટલના અગ્નિકાંડથી મોતને ભેટેલા અંગત બેડ પરના પાંચ હતભાગી દર્દી પણ આવી જાય છે. આ દર્દીનાં પરિવારજનોએ કોરોનામાં જલદી સારું થઇ જવાની આશાએ શ્રેય હોસ્પિટલના સંચાલકોને અધધ નાણાં ચૂકવ્યાં હતાં. તેમ છતાં તંત્ર અને હોસ્પિટલના સંચાલકોની ગુનાઇત બેદરકારી તેમને ભરખી ગઇ.

કોરોના દર્દીની સારવાર માટે મ્યુનિ. તંત્ર અને દર્દીનાં પરિવારજનો ભલે આંખ મિંચીને ખર્ચ કરતાં હોય, પરંતુ છેલ્લા ર૪ દિવસમાં ૪૯ દર્દી ખાનગી હોસ્પિટલમાં મોતને ભેટ્યા છે. ગત તા.૧૯ જુલાઇએ મૃત્યુઆંક ૩પ૧ હતો, જેે  હવે ગત તા.૧૧ ઓગસ્ટે ૪૦૦ થયો છે. શહેરભરમાં ભલે મૃત્યુઆંક ૩ થી પ જેટલા નહીંવત્ નોંધાઇ રહ્યાે છે તેવા સમયે પણ ખાનગી કોવિડ કેર હોસ્પિટલમાં મૃત્યુ ઘટયાં નથી તે બાબત ચોંકાવનારી છે.

દર્દીનાં પરિવારજનોને લાખો રૂપિયા ખર્ચવાની તૈયારી હોવા છતાં.. 

ખાનગી કોવિડ કેર હોસ્પિટલ તરીકે મ્યુનિસિપલ સત્તાવાળાઓએ તબક્કાવાર જે તે હોસ્પિટલને હસ્તગત કર્યા બાદના મૃત્યુના આંકડા પણ બેહદ ચોંકાવનારા છે એટલે કે ગત તા.૧૬ મે, ર૦ર૦થી ગત તા.૧૧ ઓગસ્ટ, ર૦ર૦ સુધીના ૮૭ દિવસમાં કુલ ૪૦૦ મૃત્યુના પ્રમાણને જોતાં દર બે-ત્રણ દિવસે નવથી વધુ દર્દી મોતના મોંમાં ધકેલાયા છે. આ આંકડા ચિંતાજનક તો છે જ, પરંતુ ખાનગી હોસ્પિટલમાં અપાતી સારવારની ગુણવત્તા સામે પણ મોટો પ્રશ્ન ઊભો કરે છે, જોકે સત્તાધીશો હવે અગાઉની જેમ તમામ ખાનગી હોસ્પિટલમાં થયેલાં મૃત્યુની વિગત જાહેર કરતા નથી. છેલ્લા એક મહિના કરતાં વધુ સમયથી આ માહિતી પર મ્યુનિસિપલ હેલ્થ વિભાગ ઢાંકપિછોડો કરી રહ્યો છે, જેના કારણે કઇ ખાનગી હોસ્પિટલ ખરા અર્થમાં દર્દી માટે વધુ જોખમી બની છે તેની જાણ દર્દીનાં પરિવારજનોને લાખો રૂપિયા ખર્ચવાની તૈયારી હોવા છતાં થતી નથી. 

વેબસાઇટ પણ મૃત્યુના મામલે ભેદી મૌન સેવે છે

અમદાવાદ હોસ્પિટલ એન્ડ નર્સિંગહોમ એસો‌િસયેશન સાથે સંકળાયેલી નિકોલ અને નવરંગપુરાની શેલ્બી, એચસીજી, રાજસ્થાન, ગ્લોબલ, સંજીવની, મેે‌િડલિંક સહિત કુલ ૬૩ હોસ્પિટલમાં કેટલા બેડ ખાલી કે ભરેલા છે તેની વિગત તો એસો‌િસયેશનની વેબસાઇટ પરથી મળે છે, પરંતુ વેબસાઇટ પણ મૃત્યુના મામલે ભેદી મૌન સેવે છે.

તંત્ર પારદર્શક બનશે ખરું?

મ્યુનિ. સંચાલિત એસવીપી હોસ્પિટલમાં થયેલાં કુલ ર૩૩ મૃત્યુ કરતાં ખાનગી હોસ્પિટલમાં વધુ ૧૬૭ દર્દીનાં મોત નોંધાઇ ચૂક્યાં છે. એવા સમયે મ્યુનિસિપલ હેલ્થ વિભાગે સરકારી હોસ્પિટલની જેમ ખાનગી હોસ્પિટલોમાં નોંધાતાં મૃત્યુની વિગતો પણ રોજેરોજ પ્રસિદ્ધ કરવી જોઇએ. આનાથી દર્દીઓ સારી સારવાર આપતી હોસ્પિટલ તરફ ખેંચાશે અને કહેવાતી પ્રતિષ્ઠિત હોસ્પિટલ પ્રત્યેનો તેમનો મોહ ઓછો થશે, પરંતુ તંત્ર પારદર્શક બનશે ખરું?