કાર્યવાહી / ગુજરાતમાં કોરોના બેફામ : નીતિન પટેલે કહ્યું, છેલ્લાં 10 દિવસમાં કેસ બહુ વધ્યાં છે, આવતીકાલથી નવા નિર્ણયનો અમલ

• વડોદરા સર્કિટ હાઉસમાં નીતિન પટેલની બેઠક પૂર્ણ
• 4 કલાક ચાલી મેરેથોન સમીક્ષા બેઠક 
• બેઠક બાદ નીતિન પટેલ આવ્યા મીડિયા સામે

વડોદરા સર્કિટ હાઉસમાં નીતિન પટેલ રાજ્યમાં ચાલી રહેલી કોરોનાની મહામારી અને વધી રહેલા કેસ તેમજ સ્ટ્રેનને લઈને મહત્વની બેઠક કરી રહ્યા હતા. 4 કલાકની મેરેથોન સમીક્ષા બેઠક બાદ નાયબ મુખ્યમંત્રીએ પત્રકાર પરિષદ યોજીને મહત્વની વાતો જણાવી હતી.

4 કલાક ચાલી મેરેથોન સમીક્ષા બેઠક બાદ પત્રકારોને નીતિન પટેલે જણાવ્યું હતુ કે, કોરોનાના દર્દીઓ એક સમયે ઓછા થઇ ગયા હતા. હાલમાં સમગ્ર દેશમાં એક સાથે કોરોના પીકની શરૂઆત થઇ ગઈ છે. ગુજરાતમાં પણ કેસમાં ખૂબ વધારો થયો છે. ખાસ કરીને મહાનગરોમાં વધારે કેસ આવે છે. કેમકે આ શહેરમાં ગીચ વસ્તી હોવાથી સંક્રમણ વધુ થાય છે. 10 દિવસથી કોરોના દર્દીમાં વધારો થયો છે

દરેક જિલ્લામાંથી રાજ્ય સરકાર માહિતી મેળવે છે
  
નીતિન પટેલે જણાવ્યું હતુ કે, દરેક જિલ્લામાંથી રાજ્ય સરકાર માહિતી મેળવે છે. ચાલુ વિધાનસભામાં પણ કોર ગ્રુપની બેઠક મળતી હતી.  700 થી ઓછા કેસો થી 2200- 2300 સુધી કેસો પહોંચ્યા છે. વડોદરામાં પણ કેસમાં સતત વધારો થયો છે.  દર્દીઓની સારવાર ઝડપથી થાય તેવું આયોજન ચાલુ છે. આજે બેઠકમાં વડોદરાની સ્થિતિ અંગે ચર્ચા કરી હતી. તમામ ઝોન અને વોર્ડની સ્થિતિ અંગે ચર્ચા કરાઇ છે. હોસ્પિટલમાં વ્યવસ્થા અંગે પણ ચર્ચા કરાઇ છે. ચર્ચા બાદ કેટલાક મહત્વના નિર્ણય લીધા છે. 

અતિથિ ગૃહમાં પણ દર્દીઓ આઇસોલેટ કરી શકાશે

વધુમાં નીતિન પટેલે જણાવ્યું હતુ કે, આવતીકાલથી નવા નિર્ણયનો અમલ કરાશે. ધન્વંતરી રથ દ્વારા ટેસ્ટિંગ કરાશે. 200 ટીમ દ્વારા વિવિધ ઝોનમાં ટેસ્ટિંગ કરાશે. રેપિડ ટેસ્ટ અને RT-PCR ટેસ્ટ કરાશે. દરેક વિધાનસભા દીઠ 2 કેમ્પ ગોઠવાશે, અતિથિ ગૃહમાં પણ દર્દીઓ આઇસોલેટ કરી શકાશે.