બેદરકારી / સરકારી હોસ્પિટલો કેમ આટલી બેદરકાર? ભાવનગરમાં કોરોનાનો દર્દી ફરાર

• ભાવનગર સિવિલ હોસ્પિટલમાંથી વધુ એક દર્દી ફરાર
• વલ્લભીપુરનો દર્દી સારવાર દરમિયાન ફરાર
• કોરોના રિપોર્ટ પોઝિટિવ આવ્યો હતો

ભાવનગર સિવિલ હોસ્પિટલમાંથી કોરોનાનો પોઝિટિવ દર્દી ફરાર થઇ જતાં હડકંપ મચી ગઇ. વલ્લભીપુરનો દર્દીનો  કોરોના રિપોર્ટ પોઝિટિવ આવ્યા બાદ  તેને આઈસોલેશન વોર્ડમાં એડમિટ કરવાની કાર્યવાહી થઇ રહી હતી આ સમય દરમિયાન  દર્દી ફરાર થઇ ગયો હતો. તંત્રએ દર્દીની શોધખોળ હાથ ધરી છે.

સરકારી હોસ્પિટલો કેમ બેદરકાર

ભાવનગર જ નહીં પરંતુ, રાજકોટ, વડોદરા, સુરત, અમદાવાદ, જૂનાગઢ સહિતની કોવિડ 19ની સરકારી હોસ્પિટલોમાં વારંવાર લાપરવાહી અને બેદરકારી સામે આવતી હોવાના આક્ષેપો લાગતા રહે છે. ત્યારે પ્રશ્ન ઉઠી રહ્યો છે કે કોરોનાની આવી મહામારીમાં આ સરકારી હોસ્પિટલો કેમ આટલી બેદરકાર છે. ?

શું છે કોરોનાની સ્થિતિ

રાજ્યમાં આજે કોરોનાના 1159 કેસ નોંધાતા કુલ આંકડો 60,285 પર પહોંચ્યો છે. આજે 879 દર્દીઓ સાજા થતાં અત્યાર સુધીમાં કુલ 44,074 દર્દીઓએ કોરોનાને મ્હાત આપી છે. આ તમામને હોસ્પિટલમાંથી ડિસ્ચાર્જ કરવામાં આવ્યા છે. તો આમ ગુજરાતમાં સાજા થવાનો દર 70 ટકાથી વધુ છે. મહત્વનું છે કે, ગઇકાલે (29 જુલાઈ) 1144 નવા કેસ નોંધાયા હતા. જ્યારે આજે સતત બીજા દિવસે 1100ને પાર 1159 કેસ નોંધાયા છે. જ્યારે રાજ્યમાં કોરોનાનો આંકડો 60 હજારને પાર થઇ ચૂક્યો છે જે ચિંતાજનક આંકડો છે. મહત્વનું છે કે, ભારતમાં કોરોના વાયરસના કેસ 16 લાખને પાર થઇ ચૂક્યા છે. જ્યારે અત્યાર સુધીમાં દેશમાં 35,134 દર્દીઓના મોત થયા છે.

કોરોનાથી કેટલા દર્દીના મોત ?

રાજ્યમાં કોરોનાએ છેલ્લા 24 કલાકમાં 22 દર્દીઓનો ભોગ લીધો છે. જેને લઇને અત્યાર સુધીમાં રાજ્યમાં 2,418 દર્દીઓના સારવાર દરમિયાન મોત નિપજ્યા છે. જેમાં સૌથી વધુ અમદાવાદમાં 1595 દર્દીઓના મોત થયા છે.

હાલ શું છે સુરતમાં કોરોનાની સ્થિતિ?

સુરતમાં કોરોનાનું સંક્રમણ વધી રહ્યું છે. અમદાવાદ બાદ સૌથી વધુ સુરતમાં કેસ નોંધાઇ રહ્યા છે. આજે સુરતમાં 271 નવા કોરોનાના કેસ નોંધાયા છે. જેમાં સુરત કોર્પોરેશનમાં 217 અને સુરત જિલ્લામાં 54 કેસ નોંધાયા છે. આ સાથે સુરતમાં કોરોનાનો કુલ આંકડો 12,785 પર પહોંચ્યો છે. સુરતમાં આજે 220 દર્દીઓ સ્વસ્થ થયા છે. જેથી કુલ સ્વસ્થ થયેલા દર્દીનો આંકડો 8,839 પર પહોંચ્યો છે. તો આજે સુરતમાં 10 દર્દીઓના મોત થયા છે. આ સાથે સુરતમાં અત્યાર સુધીમાં કુલ 403 દર્દીના મૃત્યુ થયા છે. સુરતમાં હાલ 3543 એક્ટિવ કેસ છે.

હાલ શું છે અમદાવાદમાં કોરોનાની સ્થિતિ?

છેલ્લા 24 કલાકમાં અમદાવાદમાં 157 કેસ નોંધાયા છે. જેમાં અમદાવાદ કોર્પોરેશનમાં 143 અને અમદાવાદ જિલ્લામાં 14 કેસ નોંધાયા છે. આ સાથે અમદાવાદમાં કોરોનાનો કુલ આંકડો 26,341 પર પહોંચ્યો છે. અમદાવાદમાં આજે 119 દર્દીઓ સ્વસ્થ થયા છે. જેને લઇને કુલ સ્વસ્થ થયેલા દર્દીઓનો આંકડો 21,252 પર પહોંચ્યો છે. અમદાવાદમાં આજે 5 દર્દીઓના મોત થયા છે, જેની સાથે અમદાવાદનો કોરોનાથી મૃત્યુઆંક 1595 પર પહોંચ્યો છે. હાલ અમદાવાદમાં 3494 એક્ટિવ કેસ છે. 

રાજ્યના વિવિધ જિલ્લામાં નોંધાયેલા આજના કોરોના વાયરસના કેસની વિગત 

ગુજરાતના તમામ જિલ્લાઓમાં અત્યાર સુધીમાં નોંધાયેલા કોરોનાના કેસની વિગત (આ માહિતી રાતે 8 વાગ્યા સુધીની છે)