સાવચેતી / ગુજરાતના આ ગામમાં એકસાથે એટલા કેસ આવ્યાં કે જાહેર કર્યુ સ્વયંભૂ લોકડાઉન, 7 દિવસ સજ્જડ બંધ

• સવારે 7થી 1 વાગ્યા સુધી રેહશે બજારો ખુલ્લા 
• ગામમાં વેક્સિનેશન પ્રક્રિયા પણ પૂરજોશમાં 
• 1000 જેટલા લોકોએ લીધી કોરોનાની રસી

આણંદના બોરસદ તાલુકાના વિરસદ ગામે સ્વયંભૂ લોકડાઉન જાહેર કરવામાં આવ્યુ છે. 15 દિવસથી વધતા કોરોનાના કેસને લઇને આ નિર્ણય લેવામાં આવ્યો છે. 

ક્યાં સુધી લોકડાઉન?

25થી 31 માર્ચ સુધી 7 દિવસનું લોકડાઉન જાહેર કર્યુ છે. ગામમાં 40 જેટલા પોઝિટિવ કેસો નોંધાતા લોકડાઉન જાહેર કરાયું છે. મેડિકલ ઓફિસર, ગ્રામજનો, વેપારીઓએ સર્વસંમતીથી સ્વંયભૂ લોકડાઉનનો નિર્ણય લીધો છે.

 સવારે 7થી 1 વાગ્યા સુધી બજારો ખુલ્લા રાખવામાં આવશે. એ બાદ આખો દિવસ અને રાત લોકડાઉન રહેશે. ગામમાં વેક્સિનેશન પ્રક્રિયા પણ પૂરજોશમાં ચાલી રહી છે. અત્યાર સુધીમાં 1000 જેટલા લોકોએ કોરોનાની રસી લઈ લીધી છે. 

ગુજરાતમાં કોરોના બેકાબૂ

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 2190 કેસ નોંધાયા છે અને 1422 દર્દીઓ સાજા થયાં છે. આ સાથે જ અત્યાર સુધીમાં 2,81,707 કોરોના મુક્ત થયાં છે. તો 6 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 4479 લોકોના મોત કોરોનાને કારણે થયાં છે.  

છેલ્લા 5 દિવસથી કેસમાં ચિંતાજનક રીતે થઇ રહ્યો છે વધારો 

ઉલ્લેખનીય છે કે, રાજ્યમાં છેલ્લા 4 દિવસથી ચિંતાજનક વધારો નોંધાયો છે. સોમવારે રાજ્યમાં 1640 કેસ, મંગળવારે 1730 કેસ, બુધવારે 1790 કેસ અને ગુરૂવારે 1961 કેસ અને આજે 2190 કેસ નોંધાયા છે. આમ ગુજરાતમાં કોરોના સંક્રમણ દિવસેને દિવસે ચિંતાજનક રીતે વધી રહ્યું છે તે સ્પષ્ટ છે.  

સુરત અને અમદાવાદમાં કોરોનાના કેસની ગતિ વધી

સ્થાનિક સ્વરાજ્યની ચૂંટણી બાદ ફરી કોરોનાએ માથું ઉચક્યું છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 604 કેસ અને ગ્રામ્યમાં 9 નવા કેસ નોંધાયા છે. જ્યારે સુરત શહેરમાં 609 નવા કેસ, જ્યારે સુરત ગ્રામ્યમાં 136 કેસ નોંધાયા છે. વડોદરા શહેરમાં 165 કેસ, જ્યારે ગ્રામ્યમાં 22 કેસ નોંધાયા. રાજકોટ શહેરમાં 139 કેસ અને ગ્રામ્યમાં 25 કેસ નોંધાયા છે. 

જાણો 24 કલાક દરમિયાન રાજ્યના તમામ જિલ્લામાં નોંધાયેલ કેસની વિગત...

જાણો આજે કેટલા લોકોનું થયું રસીકરણ

રાજ્યમાં અત્યાર સુધીમાં કુલ 40,89,217 લોકોને પ્રથમ ડોઝ અને 6,25,153 લોકોને બીજા ડોઝની રસી અપાઇ ચૂકી છે. આમ કુલ 47,14,370 રસીકરણના ડોઝ અપાયા છે. ગુજરાતમાં તેજ ગતિથી વેક્સિનેશન હાથ ધરવામાં આવ્યું છે.

નિરાધારો અને વંચિતોને આધાર કાર્ડ વિના પણ અપાશે કોરોના વેક્સિન

થોડા દિવસ અગાઉ પણ કોરોના મુદ્દે સરકારે મહત્વનો નિર્ણય લીધો હતો. વૃદ્ધાશ્રમો અને દિવ્યાંગ કલ્યાણ સંસ્થામાં રહેતા લોકોને વેક્સિન આપવામાં આવશે. 45 વર્ષથી ઓછી વયના વ્યક્તિઓને આ વેક્સિન આપવામાં આવશે. જેમાં આધાર કાર્ડ વિના પણ વેક્સિનનો લાભ લઈ શકશે. આ ઉફરાંત વંચિત અને નિરાધાર લોકોને પણ વેક્સિન મળી રહે તે માટે નિર્ણય લેવામાં આવ્યો છે.