અપીલ / તમે બહાર નીકળશો તો તમારો પરિવાર સુરક્ષિત નહીં રહે, માણસ બનો અને માણસ બચાવો

• કોરોના નિર્ણાયક તબક્કામાં
• લોકો સૂચનાનું પાલન કરે
• મ્યુનિસિપલ કમિશનરની ચેતવણી

મ્યુનિસિપલ કમિશનર વિજય નહેરાએ વધુમાં જણાવ્યું હતું કે, ''સદ્નસીબે અમદાવાદમાં હજુ કોરોનાનો એક પણ કોમ્યુનિટી ટ્રાન્સમિશનનો કેસ નોંધાયો નથી, જોકે સ્થિતિ ગંભીર બનતી જાય છે. મ્યુનિ. તંત્ર અને પોલીસ તંત્ર સંયુક્ત રીતે કામ કરી રહ્યાં છે. આજે વહેલી સવારથી તમામ ઝોન અને તમામ વોર્ડમાં એક પણ દુકાન ખુલ્લી ન રહે તેના પર ધ્યાન અપાઈ રહ્યું છે. મ્યુનિ. તંત્ર દ્વારા જાહેર સ્થળોની સ્વચ્છતા હાથ ધરાઈ છે.  કોરોનાને લડત આપવા તંત્ર પૂર્ણ રીતે તૈયાર છે.

બાળકોને ક્રિકેટ રમવા ઘરની બહાર ન જવા દો

જોકે અમુક લોકોના કારણે શહેર તકલીફમાં મુકાશે. હવે આ લડાઈ નિર્ણાયક તબક્કામાં પહોંચી હોઈ બે અઠવાડિયાં સુધી ઘરની બહાર ન નીકળો. બાળકોને ક્રિકેટ રમવા ઘરની બહાર ન જવા દો. જો લાખોની સંખ્યામાં વાઇરસ ફેલાશે તો તંત્ર તેને પહોંચી નહીં વળે અને પડી ભાંગશે. હવે બે અઠવાડિયાં સુધી તંત્રની સૂચનાનું ૯૯ ટકા સુધી પાલન કરીને નહીં ચાલે, પરંતુ ૧૦૦ ટકા પાલન કરવું પડશે. ઇમર્જન્સી ન હોય તો પણ ઘરની બહાર નીકળવાના કિસ્સા જોવા મળ્યા હોઈ આવશ્યક કામ સિવાય ઘરની બહાર ન નીકળો તેવી તાકીદ પણ તેમણે કરી હતી.

પોલીસ સવારથી સ્ટેન્ડબાય કરવામાં આવી

દરમિયાન, કોરોના વાઈરસની દહેશતના કારણે લોકડાઉન કરવામાં આવ્યું છે તેમ છતાંય કેટલાક લોકો તેની ગંભીરતા સમજતા નથી. લોકડાઉનની સ્થિતિમાં કોઇ વગર કારણે રોડ પર આવે નહીં તે માટે પોલીસ વિભાગ એલર્ટ થયો છે. લોકોની અવરજવર પર પ્રતિંબધ નથી પરંતુ કારણ વગર બહાર નીકળતા લોકોને સમજાવવા માટે પોલીસને રોડ પર ઊતરવુ પડ્યું છે. વહેલી સવારથી રોડ પર નીકળતા લોકોને પોલીસ સમજાવી રહી છે અને ઘરમાં રહેવા માટેની વિનંતી કરી રહી છે. આ મામલે પોલીસ કમિશનર આશિષ ભાટિયાએ જણાવ્યું છે કે લોકો વગર કારણે બહાર નીકળે નહીં તે માટે પોલીસ સવારથી સ્ટેન્ડબાય કરવામાં આવી છે.

ગુજરાતના નાગરિકોને VTVGujarati.comની અપીલ

કોરોના લોકલ કોમ્યુનિટીમાં ન પ્રસરે તે માટે VTVGujarati.comની અપીલ

• કોરોનાની લડાઈમાં સરકારને સામૂહિક સહકાર આપો
• પ્રજા કોરોના સામેની લડાઈમાં સ્વયંશિસ્તનું પાલન કરે
• ઈમરજન્સી વગર ઘરની બહાર ન નીકળો
• 2 અઠવાડિયા સુધી ઘરની અંદર જ રહો
• ગુજરાતમાં કોરોના નિર્ણાયક તબક્કામાં પ્રવેશી ચૂક્યો છે
• લોકલ કોમ્યુનિટીમાં પ્રસરે નહીં તે માટે ઘરમાં જ રહેવા અપીલ
• મોર્નિંગ વૉક કે ઈવનિંગ વૉકમાં પણ નીકળવા અપીલ
• રજાના સમયમાં ક્રિકેટ રમવા કે બહાર ન જવા અપીલ
• જીવનજરૂરી વસ્તુ માટે જ સિમિત વ્યક્તિ ઘર બહાર નીકળે
• સરકાર મોટા પગલા લઈ રહી છે તેમાં સહકાર આપવા વિનંતી
• કોઈ એક વ્યક્તિની ભૂલ સમાજને નુકસાન કરી શકે છે
• તમે જે શહેર-ગામમાં છો ત્યાં જ રહો
• શહેર બદલશો તો બીજાને પણ નુકસાન પહોંચશે