હવે ખમૈયા થાય તો સારૂ / અમદાવાદને હવે ભગવાન 'રામ' બચાવે, એક દિવસમાં કેસ અને મોતનો આંકડો અધધ

• અમદાવાદમાં વધતું જતું કોરોનાનું સંક્રમણ
• વધી રહી છે માઈક્રો કન્ટેઈન્મેન્ટ ઝોનની સંખ્યા
• શહેરમાં 417 વિસ્તાર માઈક્રો કન્ટેઈન્મેન્ટ ઝોન હેઠળ

અમદાવાદમાં કોરોનાને કારણે સતત માઈક્રો કન્ટેઈન્મેન્ટ ઝોનમાં વધારો થઈ રહ્યો છે. અમદાવાદ શહેરમાં 417 વિસ્તાર માઈક્રો કન્ટેઈન્મેન્ટ ઝોન હેઠળ છે જેમાં પૂર્વ વિસ્તારમાં રેકોર્ડબ્રેક માઈક્રો કન્ટેઈન્મેન્ટ ઝોનનો સમાવેશ થયો છે એટલું નહીં વટવા, વસ્ત્રાલ, રામોલ, મણિનગર, દાણીલીમડામાં કોરોનાના અનેક કેસ સામે આવ્યા છે. 

ઘોડાસરની નવરચના સોસાયટીમાં 45 ઘર માઈક્રો કન્ટેઈન્મેન્ટ ઝોનમાં મૂકી દેવામાં આવ્યા છે. બોડકદેવના એક અપાર્ટમેન્ટના 23 ઘર માઈક્રો કન્ટેઈન્મેન્ટ ઝોનમાં મૂકાયા છે જ્યારે દાણીલીમડાના 85 ઘરમાં રહેતા 416 લોકો માઈક્રો કન્ટેઈન્મેન્ટ ઝોનમાં સામેલ છે. 

રાજ્ય સરકાર દ્વારા જાહેર કરવામાં આવેલ આંકડા પ્રમાણે રાજ્યમાં ગત 24 કલાકમાં કોરોનાના 12,206 નવા કેસ નોંધાયા છે તો સંક્રમણના કારણે 121 લોકોના મોત નિપજ્યા છે. આ સાથે જ 4,339 દર્દીઓ સાજા થયાં છે. આ સાથે જ અત્યાર સુધીમાં 3,46,063 દર્દીઓ કોરોના મુક્ત થયાં છે. 

છેલ્લા 24 કલાકમાં 121 દર્દીઓના મોતથી ખળભળાટ

ઉલ્લેખનીય છે કે, છેલ્લા 24 કલાકમાં રાજ્યમાં 121 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 5615 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 353 લોકો વેન્ટિલેટર પર છે. એક્ટિવ કેસનો આંકડો 76,500 પર પહોંચ્યો છે.

આ 2 જિલ્લાઓમાં ચિંતા વધી

કોરોનાનો પ્રકોપ દરરોજ વધી રહ્યો છે. ત્યારે ગત 24 કલાકમાં નોંધાયેલા કોરોનાના કેસમાં અમદાવાદ સુરત બાદ રાજકોટ જિલ્લામાં ચિંતાજનક આંકડો નોંધાયો છે. રાજકોટમાં ગત 24 કલાક દરમિયાન 764 કેસ અને ગ્રામ્યમાં 86 કેસ તો આ તરફ ઉત્તર ગુજરાતના મહેસાણામાં પણ કોરોના કહેર જોવા મળી રહ્યો હોય તેમ લાગી રહ્યું છે. ગત 24 કલાકમાં અહીં 485 નવા કેસ નોંધાયા હતા. 

સુરત અને અમદાવાદમાં કોરોના બેકાબૂ 

ગુજરાતમાં રસીકરણની કામગીરી ચાલુ હોવા છતાં બીજી તરફ પરિસ્થિતિ બેફામ છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 4631 કેસ તો અમદાવાદ ગ્રામ્યમાં 60 કેસ નોંધાયા છે. જ્યારે સુરત શહેરમાં 1553 નવા કેસ, જ્યારે સુરત ગ્રામ્યમાં 375 કેસ નોંધાયા છે. વડોદરા શહેરમાં 460 કેસ, જ્યારે ગ્રામ્યમાં 165 કેસ નોંધાયા. રાજકોટ શહેરમાં 764 કેસ અને ગ્રામ્યમાં 86 કેસ નોંધાયા છે. ત્યારે જાણો 24 કલાક દરમિયાન રાજ્યના તમામ જિલ્લામાં નોંધાયેલ કેસની વિગત...