ગુજરાતમાં કોરોનાની સ્થિતિ દિવસેને દિવસે વધુને વધુ ખરાબ થઈ રહી છે ત્યારે હવે સગર્ભા મહિલાઓ ઉપર કોરોનાનો ખતરો તોળાઈ રહ્યો છે. ગુજરાતમાં 171 સગર્ભા મહિલાઓ કોરોના પોઝિટિવ આવી છે. તેમાં મહેસાણામાં જોડિયા બાળકોને જન્મ આપનારી માતાથી પહેલા પુત્ર અને હવે પુત્રીનો પણ રિપોર્ટ પોઝિટિવ આવતાં ખળભળાટ મચી ગયો છે.
ગુજરાતમાં 171 સગર્ભા મહિલાઓ કોરોનાગ્રસ્ત
કોરોનાગ્રસ્ત માતા દ્વારા જોડિયા બાળકોને જન્મ આપવાના મામલો
મહેસાણાના મોલિપુર ગામે બંને બાળકો કોરોનાગ્રસ્ત
આજે નવજાત બાળકીનો બીજો રિપોર્ટ આવ્યો પોઝિટિવ
મહેસાણાના વડનગરમાંથી તો ચોંકાવનારો કિસ્સો સામે આવ્યો હતો. વડનગરની કોવિડ-19 હોસ્પિટલમાં કોરોનાગ્રસ્ત સગર્ભાએ એક સાથે બે જોડિયા બાળકોને જન્મ આપ્યાના બીજા દિવસે એકનો કોરોનાનો રિપોર્ટ પોઝિટિવ હોવાનું માલૂમ પડ્યું હતું. હાલ માતા અને બાળક બંને હોસ્પિટલના આઈસોલેશન વોર્ડમાં સારવાર હેઠળ છે. બે દિવસ અગાઉ નવજાત પુત્રનો રિપોર્ટ આવ્યો પોઝિટિવ હતો. જ્યારે નવજાત બાળકીનો રિપોર્ટ નેગેટિવ આવ્યો હતો.
એક જ દિવસમાં 17 પ્રેગનેટ મહિલાઓ કોરોના પોઝિટિવ
અમદાવાદમાં કોરોનાની સ્થિતિ દિવસેને દિવસે ગંભીર બની રહી છે. અમદાવાદમાં એક જ દિવસમાં અલગ-અલગ વિસ્તારોમાંથી ડિલિવરી માટે આવેલી 17 સગર્ભા મહિલાઓને કોરોનાનો રિપોર્ટ પોઝિટિવ આવ્યા હતો.
રાજ્યમાં 171 પ્રેગનેટ મહિલાઓ પોઝિટિવ
ગુરુવારે રાજ્યના આરોગ્ય વિભાગે ગુજરાતમાં અત્યાર સુધીમાં આવા 171 કેસની પુષ્ટિ કરી હતી. જેમાં સૌથી વધુ અમદાવાદના 80 કેસ સામે આવ્યા છે. ગુજરાતમાં બુધવાર સુધી નોંધાયેલા કેસોમાં 171 સગર્ભા મહિલાઓનો પણ સમાવેશ થાય છે. આ ઉપરાંત રાજ્યમાં કોરોનાથી અત્યાર સુધી મોતને ભેટેલા દર્દીઓમાં બે સગર્ભાનો પણ સમાવેશ થાય છે.
વડોદરામાં નવજાત બાળકને સહેવો પડ્યો માતાનો વિયોગ
વડોદરામાં પ્રસુતિ બાદ માતાનો રિપોર્ટ પોઝિટિવ આવતા નવજાત બાળકને 10 દિવસ સુધી અલગ રાખવામાં આવ્યું હતું. આરોગ્ય વિભાગના જણાવ્યા મુજબ ગુજરાતમાં પહેલાથી જ સગર્ભા મહિલાઓની પ્રસુતિ પહેલા તેમનો કોરોના ટેસ્ટ ફરજિયાત કરવામાં આવ્યો છે. મોટાભાગના કિસ્સાઓમાં નવજાત બાળક અને માતા સ્વસ્થ થઈને હોસ્પિટલથી ડિસ્ચાર્જ થયા છે.