એક તરફ રાજ્યમાં કોરોનાએ ફરીથી આતંક મચાવવાની તૈયારી આદરી લીધી છે ત્યારે ફરીથી જનતા માટે એક માઠા સમાચાર સામે આવ્યા છે. અમદાવાદમાં કોરોનાની સારવાર મોંઘી બનશે. ખાનગી હોસ્પિટલ સાથેના MOU તંત્રએ રદ્દ કર્યા છે. સરકારી હોસ્પિટલમાં પર્યાપ્ત બેડ હોવાનો તંત્ર દ્વારા દાવો કરવામાં આવ્યો છે.
હવે માત્ર અહીં જ મળશે મફત સારવાર
AMCએ ખાનગી હોસ્પિટલને ચૂકવેલા ખર્ચથી સરકાર નારાજ છે. સરકાર નારાજ થતા ખાનગી હોસ્પિપટલ સાથેના કરાર રદ્દ કરાયા છે. હવે કોરોનાની મફત સારવાર માત્ર સિવિલ હોસ્પિટલ, સોલા સિવિલ અને એસવીપી હોસ્પિટલ પૂરતી જ સીમિત થઈ ગઈ છે
શું કર્યા હતા MOU
શહેરમાં એક તબક્કે કોરોના કેસો વધતાં મ્યુનિ. દ્વારા ખાનગી હોસ્પિટલ સાથે એમઓયુ કરીને 66 જેટલી હોસ્પિટલોમાં 50 ટકા બેડ એએમસી ક્વોટામાં રાખ્યા હતા. જ્યારે બાકીના 50 ટકા બેડ પર હોસ્પિટલ સત્તાવાળા પોતાની રીતે દર્દીઓને દાખલ કરી, નાણાં વસૂલી શકતા હતા. જે 50 ટકા બેડ મ્યુનિ. ક્વોટામાં રખાયા હતા, તે બેડ જો ખાલી રહે તો પણ નિશ્ચિત રકમ હોસ્પિટલને ચૂકવવા નિર્ણય કરાયો હતો. જોકે હવે ખાનગી હોસ્પિટલોના મ્યુનિ. ક્વોટાના બેડ હાલ પૂરતા હોસ્પિટલને પરત કર્યા છે, જેથી દાખલ દર્દીઓ પાસેથી હોસ્પિટલ સત્તાવાળા ચાર્જ વસૂલીને સારવાર આપી શકશે.