કોરોનાનો કહેર / અમેરિકામાં કોરોનાને લઈને બની એવી ઘટના કે આખા વિશ્વની વધશે ચિંતા

• અમેરિકામાં કોરોનાએ વધારી ચિંતા
• 2 વેરિઅન્ટ ભેગા થઈને એક નવું હાઈબ્રિડ વર્ઝન બન્યું
• કોરોના વેરિઅન્ટ B.1.1.7 અને B.1.429 બંને ભેગા થયા

અમેરિકાના કેલિફોર્નિયામાં કોરોના વાયરસનું એક હાઈબ્રિડ વર્ઝન જોવા મળ્યું છે. વૈજ્ઞાનિકોને સ્ટડી સમયે ખ્યાલ આવ્યો છે કે બ્રિટનમાં મળેલા કોરોના વાયરસના વેરિઅન્ટ B.1.1.7 અને અમેરિકામાં મળેલા  કોરોના વેરિઅન્ટ B.1.429 બંને ભેગા થઈ ચૂક્યા છે. તેના કારણે કોરોનાનું હાઈબ્રિડ વર્ઝન તૈયાર થયું છે. 

નવા વર્ઝનનું કોઈ નામ અપાયુ નથી

બ્રિટન અને અમેરિકાના વેરિઅન્ટ એકસાથે મિક્સ થઈ જવાથી એક નવું હાઈબ્રિડ વર્ઝન તૈયાર થયું છે તેને કોઈ નામ અપાયું નથી. હજુ સુધી ફક્ત એક જ દર્દીમાં આ હાઈબ્રિડ વેરિઅન્ટ જોવા મળ્યું છે. પરંતુ વૈજ્ઞાનિકોને ડર છે કે હાઈબ્રિડ વેરિઅન્ટના અન્ય કેસ પણ હોઈ શકે છે. 

આ રીતે બને છે વાયરસના નવા વેરિઅન્ટ

એક રિપોર્ટ અનુસાર વૈજ્ઞાનિકો માની રહ્યા છે કે જ્યારે માણસના શરીરનો એક જ સેલ, વાયરસના 2 વેરિઅન્ટથી સંક્રમિત થાય છે તો વાયરસના જીનમાં ફેરફાર આવે છે. તેનાથી નવા વેરિઅન્ટ તૈયાર થઈ જાય છે. વૈજ્ઞાનિકો કહે છે કે જ્યારે એક સમયે કોઈ વ્યક્તિ 2 અલગ અલગ વેરિઅન્ટથી સંક્રમિત થયા તો તેનાથી હાઈબ્રિડ વેરિઅન્ટ તૈયાર થવાનો ખતરો રહે છે. દુનિયાના અનેક દેશોમાં કોરોનાના અલગ અલગ વેરિઅન્ટ આવ્યા છે. સાઉથ આફ્રિકામાં મળેલા કોરોના વેરિઅન્ટ વધારે સંક્રામક હોવાનું માનવામાં આવી રહ્યું છે. 

પહેલાં પણ અપાઈ હતી ચેતવણી

રિપોર્ટના અનુસાર રિસર્ચર્સે પહેલા પણ ચેતવણી આપી હતી કે કોરોનાના હાઈબ્રિડ વેરિઅન્ટ તૈયાર થઈ શકે છે. તો અમેરિકાના વૈજ્ઞાનિકોએ એ દર્દીઓને લઈને વધારે જાણકારી સાર્વજનિક કરી નથી જે કોરોનાના હાઈબ્રિડ વેરિઅન્ટથી સંક્રમિત થયા છે. હજુ સુધી એ પણ ખ્યાલ આવી શક્યો નથી કે હાઈબ્રિડ વેરિઅન્ટથી કેટલા દર્દી બીમાર થયા છે.