Coronavirus / અમદાવાદમાં કોરોનાના કેસ વધતા જ CM રૂપાણીએ કોંગ્રેસના 3 ધારાસભ્યોને બોલાવ્યા અને...

• અમદાવાદના કોટ વિસ્તારમાં વકરેલા કોરોનાનો મામલો
• કોટ વિસ્તારના 3 MLA સાથે CM રૂપાણીની બેઠક 
• ઇમરાન ખેડાવાલા,શૈલેષ પરમાર, ગ્યાસુદ્દીન શેખ સાથે બેઠક

રાજ્યમાં વધતા કોરોના મહામારીના કેસ લઇને સરકાર હાલ એકશનમાં જોવા મળી રહી છે. જ્યાં સૌથી વધારે કેસ સામે આવી રહ્યાં છે ત્યાં કડક હાથે લોકડાઉનની અમલવારી કરાવવા તંત્રએ કામગીરી હાથ ધરી છે. જેને લઇને મુખ્યમંત્રીએ અમદાવાદ શહેરના કોટ વિસ્તારના ત્રણ કોંગ્રેસ ધારાસભ્યો સાથે બેઠક કરી હતી. 
 

મુખ્યમંત્રી વિજય રૂપાણીએ અમદાવાદ શહેરના કોટ વિસ્તારના જમાલપુર, દાણીલીમડા અને શાહપુરના ધારાસભ્ય સાથે બેઠક કરી કોરોના વાયરસના વધતા કેસ અંગે ચર્ચા કરી હતી.  CM રૂપાણીએ કોંગ્રેસના ધારાસભ્ય ઇમરાન ખેડાવાલા, શૈલેષ પરમાર, ગ્યાસુદ્દીન શેખ જોડે વાતચીત કરી હતી. 

કોંગ્રેસ ધારાસભ્ય શૈલેષ પરમારનું સીએમ સાથેની મુલાકાત બાદ નિવેદન

કોંગ્રેસ ધારા સભ્ય શૈલેષ પરમારે મુખ્યમંત્રી રૂપાણી સાથેની બેઠક બાદ કહ્યું કે  અમદાવાદમાં કોરોનાના કેસ વધી રહ્યાં છે ત્યારે કોરોના માટેના ટેસ્ટ વધારવા જોઇએ. દિવસેને દિવસે શહેરના કોટ વિસ્તારમાં કેસો વધી રહ્યાં છે. કોરોના ચેપથી સરકાર ચિંતિત છે. કોરોનાને અટકવવા સરકારે કરેલી કામગીરી વિશે ચર્ચા થઇ. જેમની પાસે રેશનકાર્ડ નથી તેમને પણ અનાજ મળે તે અંગે વાતચીત કરવામાં આવી. કોંગ્રેસ ધારાસભ્ય શૈલેષ પરમારે કહ્યું કે રેશનકાર્ડધારકોને પૂરતા પ્રમાણમાં રાશન મળે.  

કોંગ્રેસ ધારાસભ્ય ગ્યાસુદ્દીન શેખનું CM રૂપાણી સાથેની મુલાકાત બાદ નિવેદન

કોંગ્રેસના ધારાસભ્યે ગ્યાસુદ્દીન શેખે મુખ્યમંત્રી રૂપાણી સાથે બેઠક બાદ જણાવ્યું હતું કે કોટ વિસ્તારની ચર્ચા કરવા સરકારે બોલાવ્યાં હતા. ગ્યાસુદ્દીન શેખે કહ્યું કે અમદાવાદમાં કોરોના વાયરસના કેસ વધી રહ્યાં છે. કોરોનાના વાયરસના કેસ વધતા સરકાર ખુબ જ ચિંતિત છે. લોકોને સામેથી તપાસ માટે અપીલ કરાઇ છે.

ગ્યાસુદ્દીન શેખે કહ્યું કે અમદાવાદના કોટ વિસ્તારમાં કોરોના કંટ્રોલ કરવો જરૂરી છે. લોકોએ પણ થોડુ સહન કરવું પડશે. સરકાર કોઇને કનડગત કરવા માગતી નથી. લોકોમાં જે માનસિકતા હતી તે દૂર કરવાનો પ્રયત્ન કર્યો છે. લોકોમાં અવિશ્વાસ છે તે પોલીસની કડક અમલવારીને લઇને છે. તે અવિશ્વાસને વિશ્વાસમાં પરિવર્તિત કરવો જોઇએ.