કોરોનાનો કહેર ભારતભરમાં જોવા મળી રહ્યો છે, ત્યારે ગુજરાતમાં હવે કોરોનાના દર્દીઓમાં સતત વધારો જોવા મળી રહ્યો છે. ગઇકાલે સવારે અમદાવાદમાં એકસાથે 7 પોઝિટિવ કેસ સામે આવ્યાં હતા ત્યારે આજરોજ સવારે ભાવનગરમાં કોરોનાના વધુ બે કેસ પોઝિટિવ સામે આવ્યાં છે. ત્યારે રાજ્યનો કુલ આંકડો 97 પર પહોંચ્યો છે.
ભાવનગરમાં કોરોનાના પોઝિટિવ કેસમાં વધારો
વધુ બે કેસ પોઝિટિવ સામે આવ્યા
15 લોકોના રિપોર્ટમાંથી 12 નેગેટિવ આવ્યા
કોરોનાના કેસને લઇને જાણે કે ભાવનગર રાજ્યના દરેક શહેરોને પાછળ રાખી પહેલા નંબરે આવવા માટે દોડી રહ્યું હોય તેવું લાગી રહ્યું છે. શું ભાવનગરમાં લોકડાઉનનો કડક અમલ કરવામાં નથી આવી રહ્યો?
ભાવનગરમાં કોરોનાના વધુ બે કેસ પોઝિટિવ સામે આવ્યાં છે. બંને મહિલાઓ કોરોના સંક્રમિત વ્યક્તિના સંપર્કમાં આવી હતી તેવું જાણવા મળ્યું છે. શહેરમાં કુલ 15 લોકોના રિપોર્ટ મોકલવામાં આવ્યાં હતા જેમાંથી 12ના નેગેટિવ આવ્યાં હતા. જ્યારે 2 કેસ પોઝિટિવ અને 1 વ્યક્તિનો રિપોર્ટ પેન્ડિંગ જોવા મળ્યો છે.
પ્રાપ્ત મળતી માહિતી અનુસાર દિલ્હીથી આવેલા વ્યક્તિના સંપર્કમાં આ બંને પોઝિટિવ કેસના દર્દીઓ આવ્યાં હતા. દિલ્હીથી આવેલી વ્યક્તિનું થોડા દિવસ પહેલાં જ મોત નિપજ્યું હતું. મૃતકના પરિવારની બંને મહિલાના રિપોર્ટ પોઝિટિવ આવ્યાં છે. આમ ભાવનગરમાં અત્યાર સુધીમાં કુલ 9 પોઝિટિવ કેસ નોંધાયાં છે. આ બંને શહેરના સાંઢિયાવાડ વિસ્તારના છે.