કોરોના વાયરસથી હાલ સુધી દુનિયામાં 28262 લોકો બીમાર થઈ ચૂક્યા છે. જ્યારે તેમાંથી 28018 લોકો ચીનમાં છે. કોરોના વાયરસથી હાલ સુધીમાં 565 લોકોના મોત થઈ ચૂક્યા છે. હવે એક નવી વાત સામે આવી છે કે આ વાયરસ ગર્ભમાંના શિશુને માટે પણ ખતરા રૂપ હોઈ શકે છે. હાલમાં જ એક કોરોના વાયરસના ચેપ વાળી માતાના બાળકને પણ કોરોના વાયરસ હોવાનું જાણવા મળ્યું છે.
વુહાનમાં વકર્યો કોરોના વાયરસ
મહિલાના ગર્ભમાં જ લાગ્યો નવજાતને ચેપ
30 કલાક પહેલાં જન્મેલું નવજાત કોરોનાનો શિકાર
ચીનના વુહાનમાં લગભગ 30 કલાક પહેલાં જ જન્મેલા બાળકમાં કોરોના વાયરસનો ચેપ જોવા મળ્યો છે. એક ગર્ભવતી મહિલા વુહાન ચિલ્ડ્રન હોસ્પિટલમાં એડમિટ હતી. 30 કલાક પહેલાં તેણે એક બાળકને જન્મ આપ્યો. તે કોરોના વાયરસથી સંક્રમિત પણ હતી. તેણે જે બાળકને જન્મ આપ્યો તેને પણ કોરોનાનો ચેપ ગર્ભમાં જ લાગી ચૂક્યો હતો.
આ રીતે પડી ખબર
જ્યારે નવજાત જન્મ્યુ ત્યારે ખૂબ જ સ્વસ્થ હતું. તેનામાં શરદી, ઉધરસ, તાવ વગેરે કોઈ લક્ષણો દેખાતા ન હતા. પરંતુ થોડા કલાકો બાદ તેને શ્વાસ લેવામાં તકલીફ પડવા લાગી. આ સમયે તેનો એક્સ રે કરવામાં આવ્યો. જેમાં કોરોના વાયરસ જોવા મળ્યો. આ પહેલાં પણ એક કોરોના વાયરસથી ચેપી મહિલાએ બાળકને જન્મ આપ્યો હતો. પરંતુ તે સમયે બાળક સ્વસ્થ હતું અને પછી તે બાળકને પણ કોરોનાનો ચેપ લાગ્યો હતો.
હાલમાં બાળક સ્વસ્થ
મળતી માહિતી અનુસાર આ બંને નવજાતની સ્થિતિ ગંભીર નથી. તેઓની સારવાર ચાલી રહી છે. ઉલ્લેખનીય છે કે સૌથી મોટી ઉંમર એટલે કે 90 વર્ષની વ્યક્તિ પણ કોરોનાનો શિકાર બની ચૂકી છે. તે પણ વુહાન શહેરની હોસ્પિટલમાં એડમિટ છે.